'మరణాంతరం చూడగలిగే ఏకైక అవకాశం నేత్రదానమే'- ప్రజల్లో అవగాహనకు ఎల్​వీ ప్రసాద్ వైద్యుల కృషి - Eye Donation Awareness Program

Eye Donation Awareness Program at LV Prasad Institute: అవయదానాల్లోనూ నయనం ప్రధానం. దీనిపై ఇప్పటికీ చాలా మందికి సరైన అవగాహన లేదు. ఈ నేపథ్యంలో విజయవాడ సమీపంలోని తాడిగడప ఎల్.వీ ప్రసాద్ నేత్ర వైద్య విజ్ఞాన సంస్థ క్యాంపస్​లో అవగాహన కార్యక్రమం చేపట్టారు. ఆసుపత్రికి వైద్యం కోసం వచ్చిన వారికి నేత్రదానం విశిష్టతను వైద్యులు వివరించారు.

Eye Donation Awareness Program at LV Prasad Institute:మరణాంతరం జ్ఞాపకాలు భూమ్మీద సజీవంగా ఉండాలంటే అవయవదానంతోనే సాధ్యం. అయితే, అవయదానాల్లో నేత్రదానం అతి ముఖ్యమైనది. మనం చనిపోయిన తరువాత కూడా ఈ సృష్టిని చూసేందుకు చక్కటి అవకాశం. అయితే దీనిపై చాలా మందిలో సరైన అవగాహన లేదు. అలాంటి వారికి అవగాహన కల్పించాలనే ఉద్దేశంతో విజయవాడ సమీపంలోని తాడిగడప ఎల్.వీ ప్రసాద్ నేత్ర వైద్య విజ్ఞాన సంస్థ క్యాంపస్​లో అవగాహన కార్యక్రమం చేపట్టారు. ఆసుపత్రికి వైద్యం కోసం వచ్చిన వారికి నేత్రదానం విశిష్టతను ఇక్కడి నేత్ర వైద్యులు వివరించారు.

ఈ నెల 25వ తేదీ నుంచి సెప్టెంబర్ 8వ తేదీ వరకు నేత్రదాన పక్షోత్సవాలు దేశవ్యాప్తంగా నిర్వహిస్తున్నారు. నేత్రదానం చేస్తే కళ్లులేని వారికి చూపునిచ్చే వారవుతారు. మరణానంతరం ఈ సృష్టిని చూసే అవకాశం ఉండాలంటే నేత్రదానమే ఏకైక మార్గం. అయితే నేత్ర దానం చేసే వారికి ప్రాణాంతక అనారోగ్య సమస్యలు ఉండకూడదు. అలాంటి వారి నేత్రాలు ఇతరులకు ఉపయోగపడవు. అయితే ఓ వ్యక్తి నుంచి సేకరించే నేత్రాలతో ఇద్దరు, ముగ్గురికి చూపునిచ్చే అవకాశం ఉందంటున్నారు వైద్యులు. అయితే, సేకరించిన కార్నియాను సరైన పద్దతిలో 14 రోజులు మాత్రమే భద్రపరచగలరు. ఆ తరువాత ఆ కార్నియా ఇతరులకు అమర్చడానికి ఉపయోగపడదు. అలాంటి కార్నియాలను నేత్ర విభాగంలో చదువుతున్న వైద్య విద్యార్థుల కోసం వినియోగిస్తారు.

నేత్రదానం విశిష్టతపై చిత్రాలు:నేత్రదానం ప్రాధాన్యం, విశిష్టతను వివరిస్తూ విద్యార్థులకు ఎల్.వీ ప్రసాద్ నేత్ర వైద్య విజ్ఞాన సంస్థ ఆధ్వర్యంలో చిత్రలేఖనం పోటీలు నిర్వహించారు. ఈ పోటీల్లో వివిధ పాఠశాలకు చెందిన సుమారు రెండు వందల మంది విద్యార్థులు పాల్గొన్నారు. నేత్రదానం విశిష్టతను వివరిస్తూ రకరకాల చిత్రాలను గీశారు. అందమైన ఈ ప్రపంచాన్ని ఆస్వాదించాలంటే నేత్రాలు సరిగ్గా కనిపించాలన్న సందేశంతో విద్యార్థులు చిత్రాలను తీర్చిదిద్దారు.

ప్రతీ ఏడాది వివిధ విద్యాసంస్థలకు చెందిన విద్యార్థులకు నేత్రదానం ప్రాధాన్యతను వివరిస్తూ డ్రాయింగ్ పోటీలు నిర్వహిస్తుంటామని నిర్వాహకులు చెబుతున్నారు. అలానే ఈ ఏడాది నిర్వహించిన చిత్రలేఖనం పోటీలకు మంచి స్పందన వచ్చిందని తెలిపారు. భవిష్యత్తులో అవయవదానం, నేత్రదానంపై ప్రభుత్వంతో పాటు స్వచ్ఛంద సంస్థలు కలిసి అన్ని ప్రాంతాల్లో అవగాహన కార్యక్రమాలు నిర్వహించాలని అప్పుడే మరింత మంది ముందుకు వచ్చేందుకు అవకాశం లభిస్తుందని తెలిపారు.