CM Chandrababu Naidu Brother Nara Rammurthy Naidu Died :సీఎం నారా చంద్రబాబు నాయుడు సోదరుడు, మాజీ ఎమ్మెల్యే నారా రామ్మూర్తి నాయుడు అనారోగ్యంతో మృతి చెందారు. చిన్నాన్నఆరోగ్య పరిస్థితి విషయమని తెలుసుకున్న వెంటనే మంత్రి నారా లోకేశ్ అన్ని కార్యక్రమాలను రద్దు చేసుకొని హుటాహుటిన హైదరాబాద్‌ బయల్దేరి వెళ్లారు. హైదరాబాద్‌లో ఓ ఆసుపత్రిలో గత కొంత కాలంగా రామ్మూర్తి నాయుడు చికిత్స పొందుతు మృతి చెందారు. ఈ విషయాన్ని ఏఐజీ ఆస్పత్రి వర్గాలు ధృవీకరించాయి.
Nara Rohit Father Nara Rammurthy Naidu Died : 1952లో రామ్మూర్తినాయుడు నారా కర్జూరనాయుడు, అమ్మన్నమ దంపతుల రెండో కుమారుడు. తెలుగుదేశం అధినేత చంద్రబాబు తమ్ముడు. రామ్మూర్తి నాయుడికి ఇద్దరు పిల్లలు ఉన్నారు. వారిలో ఒకరు నటుడు రోహిత్, మరొకరు నారా గిరీష్. 1994లో రామ్మూర్తి నాయుడు చిత్తూరు జిల్లా చంద్రగిరి అసెంబ్లీ నుంచి ఎమ్మెల్యేగా గెలుపొంది 1999 వరకు ప్రజలకు సేవలందించారు. అనంతరం ఆయన అనారోగ్యంతో రాజకీయాల నుంచి విరామం తీసుకున్నారు.
ప్రముఖుల సంతాపం: తమ్ముడు రామ్మూర్తినాయుడు నన్ను విడిచి వెళ్లిపోయాడని బాధాతప్త హృదయంతో అందరికీ తెలియచేస్తున్నానని సీఎం చంద్రబాబు అన్నారు. రామ్మూర్తి నాయుడు ప్రజాజీవితంలో పరిపూర్ణ మనసుతో ప్రజలకు సేవలు చేశాడని కొనియాడారు. మా నుంచి దూరమై కుటుంబంలో ఎంతో విషాదం నింపాడని, రామ్మూర్తినాయుడి ఆత్మకు శాంతి కలగాలని కోరుకుంటున్నానని సీఎం చంద్రబాబు అన్నారు.
ఏపీ సీఎం చంద్రబాబు నాయుడు సోదరుడు రామ్మూర్తినాయుడు మృతి పట్ల తెలంగాణ సీఎం రేవంత్‌రెడ్డి దిగ్భ్రాంతి వ్యక్తం చేశారు. రామ్మూర్తి కుటుంబసభ్యులకు రేవంత్‌రెడ్డి ప్రగాఢ సానుభూతి తెలిపారు. రామ్మూర్తి మరణంపై నందమూరి రామకృష్ణ సంతాపం ప్రకటించారు. వెంటనే ఆసుపత్రికి చేరుకున్న రామకృష్ణ కుటుంబ సభ్యులకు ప్రగాఢ సానుభూతి తెలిపారు.