వైరల్ వీడియో : 'పిల్లి' ఎంగిలి చేసిన 'పరోటాలు' కస్టమర్లకు - మేడ్చల్ జిల్లాలో ఘటన

పిల్లి ఎంగిలి చేసిన పిండితో పరోటాలు - సామాజిక మాధ్యమాల్లో వైరల్​ అవుతున్న వీడియో

Chef cooked parotta after Cat Tasted Flour : పిల్లి ఎంగిలి చేసిన పిండితో పరోటాలు చేసి ప్రజలకు విక్రయించిన ఘటన మేడ్చల్​ జిల్లా దమ్మాయిగూడ మున్సిపాలిటీ పరిధిలోని అహ్మద్​గూడలో జరిగింది. బాధితులు తెలిపిన వివరాల ప్రకారం, మేడ్చల్ జిల్లా కీసర మండలం దమ్మాయిగూడ మున్సిపాలిటీ పరిధిలోని అహ్మద్​గూడ ఎస్ఆర్ పరోటా సెంటర్​లో ఈ ఘటన చోటుచేసుకుంది. రద్దీగా ఉండే ఎస్ఆర్ పరోటా సెంటర్​కు కొంతమంది వినియోగదారులు తినడానికి వచ్చారు. ఈ క్రమంలో ఫుడ్​ ఆర్డర్​ చేసి బయట వెయిట్​ చేస్తున్న సమయంలో అనుకోకుండా ఓ పిల్లి వచ్చి పరోటా పిండిని ఎంగిలి చేసింది.

ఆహార భద్రత లేకపోవడంతోనే : ఇది గమనించిన ఆ ఫుడ్​ కస్టమర్స్​, పిల్లి పరోటా పిండిని ఎంగిలి చేస్తున్న దృశ్యాలను తమ మొబైల్​ ఫోన్​లో రికార్డు చేశారు. అనంతరం సామాజిక మాధ్యమాల్లో పోస్టు చేయగా, ప్రస్తుతం ఇది వైరల్​గా మారింది. పరోటా సెంటర్​లోని ​మాస్టర్ చెఫ్ ఆహార భద్రత పాటించకుండా నిర్లక్ష్యంగా ఉండడంతోనే పిల్లి దర్జాగా వచ్చి ఆ పిండిని ఎంగిలి చేసిందని వినియోగదారులు మండిపడుతున్నారు. ఇటీవల హైదరాబాద్​లో పలు హోటళ్లు పరిశుభ్రత పాటించడం లేదని ఫుడ్​ సేఫ్టీ అధికారుల తనిఖీల్లో తేలింది. అయినా కూడా రెస్టారెంట్ నిర్వాహకుల తీరులో ఏ మార్పూ రావడం లేదు.