బ్యాంకులో గోల్‌మాల్ - అకౌంట్ల నుంచి కోట్ల రూపాయలు మాయం - ICICI Bank Cheating

Chilakaluripet ICICI Bank Cheating: చిలకలూరిపేటలో తమ ఖాతాల నుంచి నగదు మాయమైందంటూ ఐసీఐసీఐ బ్యాంక్ ఖాతాదారులు ఆందోళన వ్యక్తం చేశారు. తమకు న్యాయం చేయాలంటూ బాధితులు లబోదిబోమన్నారు.

Chilakaluripet ICICI Bank Cheating: పల్నాడు జిల్లా చిలకలూరిపేటలోని విజయ బ్యాంక్ సమీపంలో ఉన్న ఐసీఐసీఐ బ్యాంకులో భారీ కుంభకోణం చోటు చేసుకుంది. గతంలో మేనేజర్​గా పని చేసిన నరేశ్, గోల్డ్ అప్రైజర్ హరీశ్‌ల ఆధ్వర్యంలో కోట్ల రూపాయల నగదు ఖాతాదారుల అకౌంట్ల నుంచి వివిధ రకాల మోసాలతో తస్కరించినట్టు బాధితులు పెద్ద ఎత్తున బ్యాంకు వద్దకు వచ్చి వాపోయారు. నగదు డిపాజిట్లు, తాకట్టు బంగారం విషయంలో ఎక్కువగా మోసం జరిగినట్లు బాధితులు గగ్గోలు పెట్టారు.

ఉదాహరణకు పట్టణంలోని పొత్తూరి కోటేశ్వరమ్మ పేరుతో 45 లక్షల రూపాయలు డిపాజిట్ చేశారు. ఏడాది తర్వాత మేనేజర్ నరేశ్ రెన్యువల్ చేస్తున్నానని చెప్పి తన సొంత ఖాతాకు బదిలీ చేసుకున్నాడు. మరో నలుగురికి సంబంధించిన 79 లక్షల రూపాయలను డిపాజిట్ చేశారు. అయితే వాటి నుంచి ఓడీ రూపంలో 90 శాతం నగదు నరేశ్ తన ఖాతాకి బదిలీ చేసుకున్నారు. ఇలా డిపాజిట్లు, తాకట్టు పెట్టిన బంగారానికి సంబంధించి పెద్ద ఎత్తున మోసాలకు పాల్పడ్డారు. కోట్ల రూపాయల నగదు ఖాతాదారుల నుంచి గత మేనేజర్ నరేశ్, గోల్డ్ అప్రైజర్ హరీశ్‌​లు దోచుకున్నట్లు బాధితులు బ్యాంకు వద్దకు వచ్చి వాపోయారు.

జరిగిన మోసం పట్టణమంతా వ్యాపించడంతో పెద్ద ఎత్తున బ్యాంకుకు ఖాతాదారులు వచ్చి తమ నగదు ఏమైందోనంటూ ఆందోళన వ్యక్తం చేశారు. కొంతమంది ఆగ్రహంతో బ్యాంకు ముందు ఉన్న కుండీలను పగలగొట్టారు. పరిశీలనకు వచ్చిన ఐసీఐసీఐ బ్యాంకు జోనల్ మేనేజర్ సందీప్, రీజినల్ మేనేజర్ రమేష్​లు ఖాతాదారుల నుంచి వివరాలు నమోదు చేసుకుంటున్నారు.

జరిగిన మోసంపై వివరణ కోరినప్పటికీ, తమ ఉన్నతాధికారుల ఆదేశాల ప్రకారమే తాము నడుచుకోవాలని, అన్ని వివరాలు సేకరించి నివేదిక అందజేస్తామని అప్పటివరకు తాము ఏమీ చెప్పలేనని వారు తెలిపారు. మరోవైపు బ్యాంకు అధికారుల నుంచి ఇంకా తమకు ఎలాంటి ఫిర్యాదు అందలేదని పోలీసులు తెలిపారు. ఖాతాదారుల ఆందోళనతో బ్యాంకు వద్ద ఉద్రిక్తత నెలకొంది. తమ నగదు, బంగారానికి సంబంధించి భరోసా ఇచ్చేవరకు బ్యాంకులో ఉన్న అధికారులను, సిబ్బందిని కదలనివ్వమని బాధితులు ఆగ్రహం వ్యక్తం చేశారు.