అయ్యే పాపం పులి - ఇప్పుడు ఎలా ఉందో ఏంటో?

అహోబిలం ఘాట్‌ రోడ్డులో గాయపడిన పెద్దపులి - గాలింపు చర్యలు చేపట్టిన అధికారులు

CAR HIT TIGER: అటవీ జంతువులు దారి తప్పి పట్టణాలలోకి రావడం చూస్తుంటాం. కానీ అటవీ ప్రాంతంలో ఉన్నా కూడా ఆ పులికి పెద్ద కష్టమే వచ్చింది. ఎంత ఆకలిగా ఉందో ఏమో, అటవీ ప్రాంతంలో ఆహారం కోసం అని వచ్చి ప్రమాదానికి గురైంది. గాయపడిన పెద్దపులి కోసం అటవీ అధికారులు గాలింపు చర్యలు చేపట్టారు.

ఇంతకీ ఏం జరిగిందంటే:నంద్యాల జిల్లా రుద్రవరం అటవీ రేంజ్ పరిధిలోని అహోబిలం నల్లమల అడవుల్లో అహోబిలం వెళ్లే రోడ్డులో పెద్దపులిని కారు ఢీకొట్టింది. అటవీ ప్రాంతంలో రహదారిపై ఉన్న కోతులపై దాడి చేసేందుకు ఈ పులి రోడ్డు పైకి వచ్చింది. అదే సమయంలో అహోబిలం వైపునకు వెళుతున్న కారు వేగంగా వచ్చి పెద్ద పులిని ఢీకొట్టింది.

ఈ ప్రమాదంలో పెద్దపులి గాయపడి అడవిలోకి వెళ్లినట్లు స్థానికులు చెబుతున్నారు. అయితే తొలుత ఈ ఘటనను దాచి పెట్టేందుకు అటవీ శాఖ అధికారులు చాలా వరకు ప్రయత్నించారు. ఈ ఘటనలో కారుకు డ్యామేజ్ కాగా పెద్దపులి సైతం గాయపడింది. దీనిపై సమాచారం అందుకున్న రుద్రవరం రేంజ్ సబ్​ డీఎఫ్​ఓ శ్రీనివాసరెడ్డి, రేంజ్ అధికారి శ్రీపతి నాయుడు, డిప్యూటీ రేంజ్ అధికారి ముత్తు జావలి, సిబ్బంది, ప్రొటెక్షన్ వాచర్లు ఘటనా స్థలానికి చేరుకొన్నారు. గాయపడిన పెద్దపులి కోసం అటవీ అధికారులు గాలింపు చర్యలు చేపట్టారు.