ధర ఎంతైనా కానీ - హైదరాబాద్‌ వాసులకు మాత్రం 3 బీహెచ్‌కే ఇండ్లే కావాలి!

Buyers Prefer 3 BHK Houses in Hyderabad : ఒకప్పుడు తలదాచుకోవటానికి ఏదో ఒక గూడు ఉంటే చాలు అనుకునేవారు. అలాంటిది ఇప్పుడు ఫలానా ఇళ్లే కావాలి అన్న ధోరణికి ప్రజలు మారిపోయారు. మరీ ముఖ్యంగా హైదరాబాద్ వంటి నగరాల్లో అయితే ధర ఎంతైనా కానీ 3 బీహెచ్​కే, విశాలమైన వరండా వంటివి వాటికే కొనుగోలుదారులు ఇష్టపడుతున్నారు. గతంలో 2 బీహెచ్​కే ఇళ్లు/ఫ్లాట్స్​కు ప్రాధాన్యత ఇచ్చిన వినియోగదారులు, ఇప్పుడు పూర్తిగా 3 బీహెచ్​కేకే మొగ్గు చూపుతున్నారు. మరి అటువంటి ఇళ్ల కొనుగోలు తీరుపై తాజాగా ఫిక్కీ-అనరాక్‌ సంస్థ వెల్లడించిన సర్వే వివరాలు ఏంటో చూద్దామా!

Buyers Prefer 3 BHK Houses in Hyderabad :ఒకప్పుడు ప్రజలు నివసించడానికి రెండు పడక గదుల ఇల్లు/ఫ్లాట్‌ ఉంటే చాలు అనుకునేవారు. వాటికి అనుగుణంగా నిర్మాణ సంస్థలూ వాటినే పెద్ద మొత్తంలో నిర్మించేవి. కానీ పరిస్థితులు మారాయి. ఇప్పుడు మాత్రం, ధర అధికమైనా సరే 3 బీహెచ్​కే హౌజ్, విశాలమైన బాల్కనీ (Spacious Balcony) ఉండే ఇళ్లనే కొనుగోలుదారులు ఇష్టపడుతున్నారు.

FICCI Anarock Survey 2023 :గృహ కొనుగోలుకు సంబంధించి వినియోగదారుల్లో చాలా మార్పు వచ్చిందని ఇళ్ల కొనుగోలు తీరుపై 2023 జులై-డిసెంబరు మధ్య ఫిక్కీ అనరాక్ నిర్వహించిన సర్వేలో పలు విషయాలు వెల్లడయ్యాయి. ఇళ్ల ధరలు ఆకాశాన్నంటే ఆర్థిక రాజధాని ముంబయిలో మాత్రం 44% మంది కొనుగోలుదారులు ఇప్పటికీ 2-బీహెచ్‌కే వైపే చూస్తున్నారు. చాలా చోట్ల 1-బీహెచ్‌కే ఇళ్లపై ఆసక్తి తగ్గినా, ముంబయి, పుణేలో మాత్రం వీటికి గిరాకీ బాగనే ఉంది.

Huge Demand For 3 BHK Houses in Hyderabad :పెద్ద ఇళ్లకు గిరాకీ పెరుగుతుండటంతో, వాటికి తగ్గట్టుగానే నిర్మాణాలూ అధికంగానే ఉంటున్నాయని అనరాక్‌ గ్రూప్‌ ఛైర్మన్‌ అనుజ్‌ పురి తెలిపారు. గత ఏడాదితో పోలిస్తే సగటు ఫ్లాటు విస్తీర్ణం 11% పెరిగిందని తెలిపారు. 2022లో సగటు ఫ్లాటు విస్తీర్ణం 1,175 చదరపు అడుగులు ఉండగా, 2023లో 1,300 అడుగులకు చేరుకుందని పేర్కొన్నారు. కొత్త ప్రాజెక్టులతో(New Project) పోలిస్తే సిద్ధంగా ఉన్న ఇళ్లకు గిరాకీ తక్కువగా ఉందని, ఇలాంటి పరిస్థితి రావటం ఇది తొలిసారని వెల్లడించారు.

FICCI Anarock Survey on Housing Market : దేశంలోని ఏడు ప్రధాన నగరాల్లో 2022తో పోలిస్తే 2023వ సంవత్సరం ఇళ్ల విక్రయాల్లో 31% వృద్ధి కనిపించింది. మొత్తం 4.77 లక్షల ఇళ్లు గత ఏడాదిలో అమ్ముడయ్యాయి. కొత్తగా 4.46 లక్షల ఇళ్లు/ఫ్లాట్ల నిర్మాణాన్ని హౌసింగ్​ డెవలపర్లు ప్రారంభించారు. రూ.40-45 లక్షల శ్రేణి ఇళ్ల నిర్మాణం గతంతో పోలిస్తే ఇప్పుడు గణనీయంగా తగ్గింది.

ఇండ్లు కొనుగోలుదారులు ఎక్కువగా రూ.45-90 లక్షల ఇల్లు /ఫ్లాట్‌ వైపు మొగ్గు చూపిస్తున్నారు. మరికొందరు రూ.90లక్షల నుంచి రూ.1.5 కోట్ల విలువైన ఇళ్లను కొనాలనే(House Sale) ఆసక్తితో ఉన్నట్లు సర్వే వెల్లడించింది. 2020 వరకూ చూస్తే, సిద్ధంగా ఉన్న ఇండ్లు కొనుగోలుకు ఎక్కువ మంది ప్రయత్నించేవారు. ఇప్పుడు నిర్మాణ సంస్థ పేరు, ప్రాజెక్టును ఎప్పటిలోగా పూర్తి చేస్తారనే అంశాలు ధ్రువీకరించుకుని, నిర్ణయం తీసుకుంటున్నారని సర్వే పేర్కొంది.

3BHK Flats in Hyderabad : కొవిడ్‌ మహమ్మారి తర్వాత ఇంటి నుంచి పనిచేయడం పెరిగినందున, ఉద్యోగులకు నెలవారీ మిగులు బడ్జెట్‌ పెరిగింది. ఈ నిధులను పెట్టుబడి పెట్టి, ఇండ్లు కొనుగోలుపై వారు దృష్టి సారిస్తున్నారు అని ఫిక్కీ రియల్‌ ఎస్టేట్‌ కమిటీ(FICCI REAL ESTATE COMMITTEE) ఛైర్మన్‌ రాజ్‌ మెందా అన్నారు.