కోళ్లు గెలిచిన డుగ్​ డుగ్​ బండ్లు - సంతోషంలో యజమానులు

ఉత్సాహంగా కోడిపందేలు - గెలిచినవారికి వినూత్న బహుమతులు - చేతులు మారిన కోట్లు

Bullet Byke for Cockfight Winners: రాష్ట్రంలో మూడు రోజులు సంక్రాంతి పండగ సంబరంగా జరిగింది. ప్రపంచవ్యాప్తంగా ఎక్కడెక్కడో ఉన్న రాష్ట్రానికి చెందిన ప్రజలు గ్రామాలకు చేరుకుని సంతోషంగా గడిపారు. ఇక ఈ మూడు రోజులు అన్ని ప్రాంతాల్లో భారీ స్థాయిలో అనేక రకాల పోటీలు జరిగాయి. ఇందులో ముఖ్యమైనవి కోడి పందేలు. ఈ కోడి పందేల్లో కోట్ల రూపాయలు చేతులు మారాయి. ఈ కోడిపందేలను చూసేందుకే ఈ రాష్ట్రానికి చెందిన వారే కాకుండా దేశంలోని అన్ని ప్రాంతాలు వస్తారంటే ఆశ్చర్యపోక తప్పదు.

ఇక ఈ కోడిపందేలకు చేసిన ఏర్పాట్లు చూసి ప్రతి ఒక్కరూ ఆశ్చర్యపోయారు. కొన్నిచోట్ల పెళ్లిపందిళ్లకు మించి ఏర్పాట్లు చేశారు. అంతేకాదు పోటీల్లో పాల్గొన్నవారందరికీ బ్రహ్మాండమైన భోజనాలను సైతం వడ్డించారు. కమ్మటి రుచులతో పసందైన కోడిపందేలు చూస్తూ ప్రతి ఒక్కరూ ఎంజాయ్​ చేశారు. కోడిపందేలకు వచ్చిన వారు డబ్బుల కోసం ఎక్కడెక్కడికో వెళ్లకుండా బరులు ఏర్పాటు చేసిన దగ్గరే మినీ ఏటీఎంలను సైతం ఏర్పాటు చేశారు.

ఈ మూడు రోజులు రోడ్లన్నీ నిర్మానుష్యంగా మారిపోయాయి. వాహనాలన్నీ కోడిపందేల బరులవైపే బారులు తీరాయి. ఇక కోడిపందేల బరులన్నీ క్రికెట్​ స్టేడియాలను తలపించాయి. ఈ పందేలకు రాజకీయ పార్టీ సభలకు వచ్చిన తరహాలో వాహనాలు రావడం విశేషం. పలుచోట్ల ఈసారి కోడిపందేల విజేతలకు వినూత్నంగా బహుమతులు అందజేశారు. ఎక్కువ పందేలు గెలిచిన కోళ్ల యజమానులకు థార్​ వాహనం, బుల్లెట్లు అందజేశారు.

ఏలూరు జిల్లా జిల్లా కొయ్యలగూడెం మండలం రామానుజపురం గ్రామంలో కోడిపందాలు ఆకర్షణీయంగా నిలిచాయి. పందాలు కోళ్లకే కాదు వాటిని పెంచి బరిలో దింపిన వారికి కూడా అని ప్రచారాలు చేశారు. దీంతో భారీస్థాయిలో ఈ పందేలలో పాల్గొన్నారు. చెప్పిన విధంగానే మొత్తం 9 కోడిపందేలు జరగగా, అందులో 5 పందేలు గెలిచిన వారికి లేటెస్ట్ మోడల్ బుల్లెట్ బహుమతిగా అందజేశారు.

ఈ పోటీల్లో గుంటూరు జిల్లాకు చెందిన కడియాలు శివ, ఏలూరు జిల్లా జంగారెడ్డిగూడెంకు చెందిన బండారు నాని మరియు జంగారెడ్డిగూడెం మండలం తిరుమలాపురం గ్రామానికి చెందిన శ్రీకాంత్​కు ఈ బహుమతులు దక్కాయి. తెలుగు సాంప్రదాయ పద్ధతిలో జరిగిన ఈ పోటీల్లో బహుమతులు రావడం తమకు సంతోషంగా ఉందని విజేతలు తెలిపారు.