విత్తనాలడిగితే రైతులపై లాఠీఛార్జ్ చేస్తారా? - ఇదేనా మీ ఇందిరమ్మ రాజ్యం? : కాంగ్రెస్​పై బీఆర్ఎస్ ఫైర్ - BRS SLAMS GOVT ON SEEDS SHORTAGE

BRS Slams Congress Govt Over Seeds Shortage : వానాకాలం పంటకు రైతులంతా రంగం సిద్ధం చేసుకుంటున్నాయి. అయితే విత్తనాలు దొరక్క తీవ్ర ఇబ్బందులు ఎదుర్కొంటున్నారు. విత్తనాల కోసం గంటల తరబడి బారులు తీరినా ఫలితం ఉండకపోవడంతో ఆదిలాబాద్ జిల్లాలో రైతులు ఆందోళనకు దిగారు. వారిని అడ్డుకునేందుకు పోలీసులు యత్నించగా ఉద్రిక్తత చోటుచేసుకుంది. ఈ క్రమంలో విత్తనాలు లేక రైతులు ఎదుర్కొంటున్న సమస్యలపై బీఆర్ఎస్ స్పందిస్తూ ఇదేనా కాంగ్రెస్ తీసుకొస్తానన్న ఇందిరమ్మ రాజ్యం అంటూ ధ్వజమెత్తింది.

BRS On Seeds Shortage in Telangana : వానాకాలం పంట సాగుకు రైతులు సంసిద్దమవుతున్నతరుణంలో అధికారుల నిర్లక్ష్యం రైతుల పాలిట శాపంగా మారింది. ఉమ్మడి ఆదిలాబాద్ జిల్లాలో ఎక్కడచూసినా విత్తనాల కోసం అన్నదాత అరిగోస పడుతున్నాడు. డిమాండ్‌ మేరకు విత్తనాలు అందుబాటులో లేకపోవడంతో ఆందోళనకు దిగారు. పోలీసులు వారిని నియంత్రించే క్రమంలో కాస్త తోపులాటకు దారితీసింది.

అధికారుల ముందస్తు ప్రణాళిక లోపించడంతో సరిపడా విత్తనాలు లభ్యం కావడం లేదని రైతులు వాపోతున్నారు. ఈ విత్తనాల కోసం ఉదయం నుంచి ఎండలోనే పడిగాపులు కాయాల్సిన పరిస్థితి ఏర్పడుతోందని ఆవేదన వ్యక్తం చేస్తున్నారు.విత్తన యాజమాన్యాలతో చర్చలు జరుపుతున్నామని త్వరలో రైతులందరికి తాము కోరుకున్న విత్తనాలను సరఫరా చేస్తామని అధికారులు చెబుతున్నారు. అయితే ఈ తోపులాట వీడియో కాస్త సోషల్ మీడియాలో వైరల్ కావడంతో దీనిపై బీఆర్ఎస్ నేతలు స్పందిస్తున్నారు.

KTR Slams Congress Over Farmers Problems :బీఆర్ఎస్ పార్టీ కార్యనిర్వాహక అధ్యక్షుడు కేటీఆర్ స్పందిస్తూ, రైతులు విత్తనాలు అడిగితే వారిపై పోలీసులు దౌర్జన్యం చేస్తున్నారని మండిపడ్డారు. రైతులపై పోలీసుల లాఠీ ఛార్జ్​ను కేటీఆర్ తీవ్రంగా ఖండించారు. కర్షకులపై దాడికి తెగబడ్డ ప్రభుత్వం వారికి క్షమాపణలు చెప్పాలని డిమాండ్ చేశారు. రాష్ట్రంలో రైతులపై దాడులు జరుగుతుంటే ముఖ్యమంత్రి దిల్లీలో పర్యటించడం సిగ్గుచేటని అన్నారు. రాజకీయాలు పక్కన బెట్టి సీఎం రేవంత్ రైతుల గురించి పట్టించుకోవాలని వ్యాఖ్యానించారు.

"ఐదు నెలల్లోనే రాష్ట్రం వ్యవసాయ సంక్షోభంలో కూరుకుపోవడం ముమ్మాటికి ప్రభుత్వ పరిపాలన వైఫల్యమే. రాష్ట్రంలో రైతన్నల సమస్యల పైన ముఖ్యమంత్రి వెంటనే ఒక ఉన్నత స్థాయి సమీక్ష సమావేశం నిర్వహించాలి. రైతన్నలపై లాఠీఛార్జ్ చేసిన అధికారుల పైన కేసులు నమోదు చేసి, చర్యలు తీసుకోవాలి. రైతన్నలపై ప్రభుత్వ దాడులు బీఆర్​ఎస్ ఉపేక్షించదు. విత్తనాల కోసం బారులు తీరిన రైతన్నలపై లాఠీచార్జ్ అత్యంత దారుణం, ఇది రైతన్నలపై ప్రభుత్వ దాడి. అన్నదాతలకు మేం అండగా ఉంటాం. అవసరమైతే పార్టీ తరపున విస్తృతమైన నిరసన కార్యక్రమాలకు పిలుపునిస్తాం." అని కేటీఆర్ అన్నారు.

Harish Rao On Seeds Shortage :మరోవైపు ఈ ఘటనపై మాజీ మంత్రి హరీశ్ రావు స్పందిస్తూ కాంగ్రెస్ తెస్తానన్న మార్పు ఇదేనా? ఇందిరమ్మ రాజ్యం అంటే ఇదేనా అంటూ ప్రశ్నించారు. ఆదిలాబాద్ జిల్లా కేంద్రంలో పత్తి విత్తనాల కోసం బారులు తీరిన రైతులపై లాఠీలు ఝులిపించడం దారుణమని, అత్యంత బాధాకరమని ఆవేదన వ్యక్తం చేశారు. సాగునీరు, కరెంటు మాత్రమే కాదని విత్తనాలు కూడా రైతులకు అందించలేని స్థితికి కాంగ్రెస్ ప్రభుత్వం చేరుకుందని హరీశ్ రావు విమర్శించారు.

కాంగ్రెస్ పాలనలో రైతన్న బతుకులు ఆగమయ్యాయని ఆవేదన వ్యక్తం చేశారు. ఐదు నెలల్లోనే రైతులు రోడ్డెక్కాల్సిన దుస్థితి వచ్చిందని మండిపడ్డారు. రైతన్నలపై లాఠీలు ఝుళిపించినందుకు కాంగ్రెస్ ప్రభుత్వం తక్షణం క్షమాపణ చెప్పాలని డిమాండ్ చేశారు. ఇందుకు కారణమైన వారిపై చర్యలు తీసుకోవాలని పేర్కొన్నారు. రైతులకు ఎలాంటి ఇబ్బందులు లేకుండా, విత్తనాలను పంపిణీ చేసే విధంగా ప్రభుత్వం వెంటనే చర్యలు చేపట్టాలని కోరారు.

రైతులపై లాఠీఛార్జ్ చేయడం అమానుషం : ఇదే ఘటనపైమాజీ వ్యవసాయ శాఖ మంత్రి సింగిరెడ్డి నిరంజన్ రెడ్డి స్పందించారు. కాంగ్రెస్ తెచ్చిన మార్పు లాఠీఛార్జేనా అని ప్రశ్నించారు. పాలన గాలికి వదిలేసి ముఖ్యమంత్రి, ఉప ముఖ్యమంత్రి, మంత్రులు ఇతర రాష్ట్రాల ప్రచారానికి వెళ్లారని ఫైర్ అయ్యారు. జీలుగ విత్తనాల కోసం కూడా రైతులు ఆందోళనలు చేయాల్సి రావడం దురదృష్టకరమని ఆవేదన వ్యక్తం చేశారు. అసలు విత్తనాలు ఇస్తారన్న నమ్మకం రైతుల్లో ఎలా కలిగిస్తారని, విత్తనాలు ఇవ్వలేని అసమర్ధ కాంగ్రెస్ ప్రభుత్వం రైతాంగానికి క్షమాపణ చెప్పాలని డిమాండ్ చేశారు.