గత 30 ఏళ్లలో పూర్తికాని ప్రాజెక్టులను కేసీఆర్​ పాలనలో నాలుగేళ్లలోనే పూర్తి చేశాం : హరీశ్​రావు

BRS MLA Harish Rao about KCR on Kaleshwaram : గత ప్రభుత్వాల హయంలో 30 ఏళ్లలో పూర్తికాని ప్రాజెక్టులను కేసీఆర్​ పాలనలో నాలుగేళ్లలోనే పూర్తి చేశామని బీఆర్​ఎస్​ ఎమ్మెల్యే హరీశ్​రావు అన్నారు. ఇవాళ సిద్దిపేటలోని పర్యటించిన ఆయన జిల్లాలోని పలు అభివృద్ధి పనులకు శ్రీకారం చుట్టారు.

BRS MLA Harish Rao about KCR on Kaleshwaram :గత ప్రభుత్వాల హయాంలో 30 ఏళ్లలో పూర్తికాని ప్రాజెక్ట్​లను, కేసీఆర్ పాలనలో నాలుగేళ్లలోనే పూర్తి చేశామని మాజీ మంత్రి, బీఆర్​ఎస్​ ఎమ్మెల్యే హరీశ్​రావు తెలిపారు. రాష్ట్రంలో నీళ్లు లేక పంటలు ఎండిపోతున్నాయని, సిద్దిపేటలోని చిన్న కోడూరు మండలంలో మాత్రం వేసవిలో కూడా చెరువులో నీళ్లు ఉన్నాయంటే దానికి కారణం కాళేశ్వరం, కేసీఆరే అని ఆయన అన్నారు. ఇవాళ సిద్దిపేటలో పర్యటించిన ఆయన, గణేశ్​ నగర్ హనుమాన్ దేవాలయం వద్ద శ్రీరామ కల్యాణ మండపం ప్రారంభించారు. అనంతరం చిన్న కోడూరు మండల కేంద్రంలో గౌడ కమ్యూనిటీ హల్​ను స్థానిక జడ్పీ ఛైర్మన్ రోజా శర్మతో కలిసి శ్రీకారం చుట్టారు. ఈ క్రమంలో పెద్ద కోడూరులో ఉచిత కుట్టు మిషన్​లను పంపిణీ చేశారు.

ఈ సందర్బంగా మాజీ మంత్రి హరీశ్​రావు మాట్లాడారు. ఆంజనేయ స్వామి, తనకు ప్రజలకు సేవ చేసే శక్తి ఇచ్చారని, మానవుడు ఎంత సంపాదించినా దేవుని సన్నిధిలోనే మనశ్శాంతి దొరుకుతుందని హరీశ్​రావు అన్నారు. సిద్దిపేట గణేశ్​ నగర్ హనుమాన్ దేవాలయం దినదిన అభివృద్ధి చెందుతుందని పేర్కొన్నారు. హనుమాన్ మాల వేసిన స్వాములకు సేవ చేయడం, దేవునికి సేవ చేయడమే అని ఆయన తెలిపారు. బీఆర్​ఎస్​ ప్రభుత్వంలో గౌడ కమ్యూనిటీకి చెట్ల పన్ను రద్దు చేశామన్న ఆయన, వైన్స్ టెండర్లలో గీత కార్మికులకు రిజర్వేషన్లు తెచ్చిన ఘనత కేసీఆర్​కు దక్కిందన్నారు. 20 లక్షల రూపాయలతో గౌడ కమ్యూనిటీ భవనం ప్రారంభం చేశామని చెప్పారు.

'బోర్లు, మోటార్లు కాలిపోతున్నాయి. పొలాలు కూడా మేకలు పశువుల మేతకు అయిందన్న వార్తలు చూస్తున్నాం. కానీ మన చిన్న కోడూరులో మాత్రం పచ్చటి పొలాలు కనిపిస్తున్నాయంటే అది కేసీఆర్​ కృషి. కాళేశ్వరం వల్లే చిన్న కోడూరు చెరువులో ఎండాకాలంలో కూడా నీళ్లు ఉన్నాయి. తెలంగాణ రావడం వల్ల, కేసీఆర్​ ముఖ్యమంత్రి కావడం వల్ల నీటి ప్రాజెక్టులు పూర్తి చేసుకున్నాం.'- హరీశ్​రావు, మాజీ మంత్రి, బీఆర్​ఎస్​ ఎమ్మెల్యే

Harish Rao about GramPanchayat Employees Wages :గ్రామ పంచాయతీ ఉద్యోగులు, కార్మికులకు వెంటనే వేతనాలు ఇవ్వాలని హరీశ్​రావు ఎక్స్ వేదికగా డిమాండ్ చేశారు. రాష్ట్రంలోని 12,769 గ్రామ పంచాయతీల్లో పారిశుద్ధ్య నిర్వహణ సహా అనేక ముఖ్యమైన విధుల్లో నిత్యం శ్రమిస్తున్న 60 వేలకు పైగా గ్రామ పంచాయతీ ఉద్యోగులు, కార్మికులకు నెలల పాటు జీతాలు అందడం లేదని ఎక్స్​లో పేర్కొన్నారు. వేతనాలు అందక ఉద్యోగులు, కార్మికులు అనేక ఆర్థిక ఇబ్బందులు ఎదుర్కొంటున్నారని తెలిపారు. పేద వర్గాలకు చెందిన వారి కష్టాలను అర్థం చేసుకొని, వెంటనే వేతనాలు చెల్లించాలని రాష్ట్ర ప్రభుత్వాన్ని మాజీ మంత్రి డిమాండ్ చేశారు.