APCRDA Alternative Plots E-lottery Third Phase: రాజధానికి భూములు ఇచ్చిన రైతులకు ప్రత్యామ్నాయ ప్లాట్ల కేటాయింపులో సీఆర్డీఏ ఈ-లాటరీ ప్రక్రియ ప్రకటనపై స్పందన లేకపోవటంతో మూడో విడత లాటరీ నిర్వహించేందుకు ప్రకటన జారీ చేసింది. గ్రామాల వారీగా నివాస, వాణిజ్య స్థలాలను కేటాయించేందుకు ఈ-లాటరీ ప్రక్రియ నిర్వహించేందుకు ప్రకటనలు జారీ చేస్తున్నా సీఆర్డీఏ వైఖరికి నిరసనగా దీనికి గైర్హాజరు అవుతున్నారు. దీంతో రాజధాని రైతులకు ప్రత్యామ్నాయ ప్లాట్ల కేటాయింపు లాటరీ ప్రక్రియకు మరోమారు సీఆర్డీఏ ప్రకటన జారీ చేసింది.
ఫిబ్రవరి 5 నుంచి 8వ తేదీ వరకు: మూడో విడత ఈ- లాటరీకి మరో అవకాశం కల్పిస్తున్నట్టు సీఆర్డీఏ కమిషనర్ వివేక్ యాదవ్ ప్రకటన జారీ చేశారు. ఫిబ్రవరి 5 నుంచి 8 తేదీ వరకూ రైతులు ప్రత్యామ్నాయ ప్లాట్లకు ఈ-లాటరీ కోసం మరో అవకాశం ఇస్తున్నట్టు ఆయన ప్రకటనలో పేర్కొన్నారు. నివాస, వాణిజ్య స్థలాల ప్లాట్లు తిరిగి ఇచ్చే ప్రక్రియకు రైతులు హాజరు కాకపోవటంతో ఈ-లాటరీ ప్రక్రియ వాయిదాలపై వాయిదాలు పడుతోంది.
గ్రామాలవారీగా ప్లాట్ల కేటాయింపునకు సీఆర్డీఏ ఈ-లాటరీ నిర్వహిస్తున్నా రాజధాని గ్రామాల రైతులు ఆ కార్యక్రమానికి గైర్హాజరు అవుతున్నారు. దీంతో ప్రత్యామ్నాయ ప్లాట్ల కేటాయింపునకు మూడో విడత ఈ-లాటరీ ప్రక్రియను సోమవారం నుంచి నాలుగు రోజుల పాటు సీఆర్డీఏ ప్రధాన కార్యాలయంలో నిర్వహిస్తామని వెల్లడించింది.
సమ్మతి లేకుండా ప్లాట్ల కేటాయింపులపై అభ్యంతరం- లాటరీ విధానం ఆపేయాలంటున్న అమరావతి రైతులు
వివిధ గ్రామాలకు తేదీలను ప్రకచించిన సీఆర్డీఏ: గతంలో జరిగిన పొరబాట్లను సరిదిద్దటంతో పాటు ప్రత్యామ్నాయ ప్లాట్ల కేటాయింపు కోసం చర్యలు చేపట్టినట్టు సీఆర్డీఏ తెలిపింది. రాజధాని ప్రాంతంలోని ఐనవోలు, నేలపాడు, శాఖమూరు, తూళ్లూరు, అనంతవరం గ్రామాలకు ఫిబ్రవరి 5 తేదీన, కురగల్లు, నెక్కల్లు, నిడమర్రు, గ్రామాలకు ఫిబ్రవరి 6 తేదీన, వెలగపూడి, ఉద్దండరాయునిపాలెం, మందడం, కొండమరాజపాలెం గ్రామాలకు ఫిబ్రవరి 7వ తేదీన, నవులూరు, లింగాయపాలెం, వెంకటపాలెం, రాయపూడి గ్రామాల రైతులకు ఫిబ్రవరి 8వ తేదీన ఈ-లాటరీ ప్రక్రియ నిర్వహిస్తామని సీఆర్డీఏ తెలియచేసింది.
ఇప్పటికే పలుమార్లు వ్యతిరేకించిన రైతులు:అదే విధంగా శనివారం వెంకటపాలెం, రాయపూడి పరిధిలోని గ్రామాలకు నిర్వహించిన ఈ-లాటరీ ప్రక్రియం సైతం కోరం లేక వాయిదా పడింది. మరోవైపు రైతులు ఆందోళన చెందుతున్నట్టుగా మాస్టర్ ప్లాన్లో ఎలాంటి మార్పులూ చేయలేదని, 16 గ్రామాల రైతులకు లేఆవుట్ ప్లాన్లు అందుబాటులో ఉంచుతున్నట్టు సీఆర్డీఏ ప్రకటనలో పేర్కొంది. సందేహాల నివృత్తి కోసం విజయవాడ సీఆర్డీఏ కార్యాలయంలో సంబంధిత గ్రామాల సిబ్బంది ఆదివారం రోజు కూడా అందుబాటులో ఉంటారని తెలిపారు. ఇప్పటికే పలుమార్లు ఈ-లాటరీకి అధికారులు ఏర్పాట్లు చేసినా రైతుల నుంచి వ్యతిరేకతే ఎదురవుతోంది.
అమరావతిపై జగన్ సర్కార్ మరో కుట్ర! - మాస్టర్ ప్లాన్ విచ్ఛిన్నం చేసే ప్రయత్నం
