ధర తక్కువ-నాణ్యత ఎక్కువ - 'మై స్టోర్' యాప్​లో డ్వాక్రా ఉత్పత్తులు

పొదుపు సంఘాల మహిళల కోసం అందుబాటులోకి ఆన్​లైన్​ సేల్ యాప్ - మహిళలకు మార్కెటింగ్ సదుపాయం మెరుగుపరిచేందుకు రాష్ట్ర ప్రభుత్వం చర్యలు

AP Govt Start Online Sales App For Dwakra Women:పట్టణాల్లో స్వయం సహాయక మహిళల బృందాలు ఉత్పత్తి చేసిన వస్తువులకు మార్కెటింగ్ సదుపాయం మెరుగుపరిచేందుకు రాష్ట్ర ప్రభుత్వం చర్యలు తీసుకుంటోంది. అమెజాన్, ఫ్లిప్ కార్ట్ తరహాలో ప్రత్యేక ఆన్​లైన్ సేల్​ యాప్​ను తీసుకు వచ్చింది. ప్రజలు ఈ యాప్ ద్వారా బుకింగ్ చేసుకున్న వస్తువులను డోర్ డెలివరీ చేసే విధానాన్ని అమల్లోకి తెస్తోంది. పొదుపు మహిళలను లక్షాధికారులు చేసేలా ప్రయత్నాలు చేస్తోంది. పొదుపు సంఘాల మహిళల కోసం మెప్మా అధికారులు ఆన్​లైన్​ సేల్ యాప్​ను అందుబాటులోకి తెచ్చారు.

మార్కెట్​లో పోటీ పడలేని పరిస్ధితులు: పట్టణాలు, నగరాల్లో కలిపి 28,56,000 మంది పొదుపు సంఘం మహిళలు మెప్మా సభ్యులుగా ఉన్నారు. స్వయం సహాయక సంఘాలుగా ఏర్పడి నెలనెలా బ్యాంకుల్లో నగదు జమ చేస్తూ పొదుపు చేస్తున్నారు. రాష్ట్ర ప్రభుత్వం సహకారంతో బ్యాంకుల ద్వారా రుణాలు పొందిన ఈ మహిళలు ఉపాధి కేంద్రాలను ఏర్పాటు చేసుకున్నారు. కుటీర పరిశ్రమలను ఏర్పాటు చేసుకుని పలు ఉత్పత్తులను తయారు చేస్తున్నారు. చేనేత చీరలు, వస్త్రాలు, హస్తకళా వస్తువులు, పచ్చళ్లు, స్వీట్లు, తినుబండారాలు, మిల్లెట్స్ ఉత్పత్తులు, సౌందర్యం, అలంకరణ, గృహాలంకరణ వస్తువులు తదితర ఉత్పత్తులు చేస్తున్నారు.

పరిశ్రమల నుంచి తయారైన వస్తువుల కంటే నాణ్యంగా ఉన్నప్పటికీ మార్కెట్లో పోటీ పడలేని పరిస్ధితులు ఉన్నాయి. దీనివల్ల వీరి వస్తువులకు డిమాండ్ లేక ఆదాయం కోల్పోవాల్సివస్తోంది. దీంతో మహిళల కుటుంబాల ఆర్ధిక స్థితిపై ప్రతితకూల ప్రభావం చూపుతోంది. ఈ పరిస్ధితుల్లో మహిళలను ప్రోత్సహించడం, వారిని ఆర్ధికంగా స్థితిమంతులను చేయాలని తలచిన ప్రభుత్వం వీరికి తొలుత మార్కెటింగ్ సదుపాయం మెరుగు పరచాలని నిర్ణయించింది. దీని కోసం సరికొత్త ఆన్​లైన్ యాప్​ను అందుబాటులోకి తీసుకువచ్చింది.

మున్సిపల్ కార్యాలయాల్లో సిబ్బంది:ఓపెన్ నెట్​వర్క్ ఫర్ డిజిటల్ కామర్స్ (ONDC) పేరిట ఆన్​లైన్ ప్లాట్ ఫాంను రాష్ట్ర ప్రభుత్వం ఏర్పాటు చేసింది. సులభంగా ఆన్​లైన్ ద్వారా నచ్చిన వస్తువులను కొనుగోలు చేసేలా దీన్ని రూపొందించారు. గూగుల్ ప్లే స్టోర్​లో ఈ యాప్​ అందుబాటులో ఉంటుంది. దీని ద్వారా ఉచితంగా వ్యాపార కార్యకలాపాలు చేయవచ్చు. తమ ఉత్పత్తులను ఈ యాప్ ద్వారా అమ్ముకునేలా అన్ని ఏర్పాట్లు చేశారు. యాప్ డౌన్​లోడ్ చేసుకున్నాక వ్యాపారం మొదలు పెట్టేముందు డ్వాక్రా మహిళలు అధికారుల వద్దకు వెళ్లి వారి వివరాలు సమర్పించి మై స్టోర్ యాప్​లో రిజిస్ట్రేషన్ చేసుకోవాల్సి ఉంటుంది. దీనికోసం మున్సిపల్ కార్యాలయాల్లో సిబ్బందిని ఏర్పాటు చేశారు.

ఉత్పత్తుల ఫొటోలు, ధర, నాణ్యతకు సంబంధించిన వివరాలు సహా మహిళల బ్యాంకు ఖాతాల వివరాలు, గ్రూప్ వివరాలను నమోదు చేసి వారి వస్తువులు కొనుగోలుకు ఏర్పాట్లు చేస్తారు. ఉత్పత్తులను కొనుగోలు చేసిన వినియోగదారులు ఆన్​లైన్ ద్వారా చెల్లించిన నగదును మహిళల బ్యాంకు ఖాతాలో జమ అయ్యేలా ఏర్పాట్లు చేస్తారు. విక్రయించే వ్యక్తికి జీఎస్టీ నెంబర్ ఉంటే చాలు, నేరుగా వారే యాప్​లో రిజిస్ట్రేషన్ చేసుకోవచ్చు. బుక్ చేసుకున్న వస్తువును కేవలం 7 రోజుల లోపే వినియోగదారులకు డోర్ డెలివరీ చేసే ఏర్పాట్లను చేశారు.

నిబంధనలు అమలు: మై స్టోర్ యాప్ ద్వారా మహిళలు విక్రయించే వస్తువులను నాణ్యత ఎక్కువ, ధర తక్కువ ఉండేలా అధికారులు చర్యలు తీసుకుంటున్నారు. మహిళలు ఉత్పత్తి చేస్తోన్న వస్తువులను క్షుణ్నంగా పరిశీలించాకే విక్రయాలకు అనుమతిస్తారు. తినుబండారాలు, ఆహార పదార్థాలు నాణ్యత విషయంలో ప్రత్యేక జాగ్రత్తలు తీసుకుంటున్నారు. ఫుడ్ సేఫ్టీ అండ్ సెక్యూరిటీ అథారిటీ ఆఫ్ ఇండియాలో తప్పనిసరిగా రిజిస్ట్రేషన్ చేయించుకుని ఉండాలనే నిబంధన అమలు చేస్తున్నారు. ప్రస్తుతం స్వయం సహాయక సంఘాల సభ్యులే ఆన్​లైన్ ద్వారా కొనుగోలు, అమ్మకాలు జరిపేలా అవగాహన కార్యక్రమాలు నిర్వహిస్తున్నారు. ఇకపై మహిళలు ఉత్పత్తులను అమ్ముకునేందుకు ప్రయాస పడకుండా, నష్టాల పాలు కాకుండా ఉండటానికే ఆన్​లైన్ యాప్​ను తీసుకువస్తున్నట్లు అధికారులు తెలిపారు.

మహిళలు ఆశాభావం: ఆన్​లైన్ ద్వారా ఉత్పత్తుల అమ్మకాల కోసం ప్రభుత్వం తెచ్చిన మై స్టోర్ యాప్ తమకు ఎంతో ఉపయుక్తంగా ఉంటుందని మహిళలు ఆశాభావం వ్యక్తం చేస్తున్నారు. ప్రస్తుతం ఆన్​లైన్ మార్కెటింగ్ పెరిగిన దృష్ట్యా వాటిలో పొదుపు మహిళలను చేర్చి వారి ఉత్పత్తులను అమ్మకాలు చేయడం ద్వారా లాభాలు పెరిగి మహిళలకు ఆర్ధిక స్వావంలంబన సమకూరుతుందని అంటున్నారు. కూటమి ప్రభుత్వం వచ్చాక మహిళలు ఉత్పత్తి చేసిన వివిధ రకాల వస్తువులకు మార్కెటింగ్ సదుపాయం కల్గించేందుకు మెప్మా బజార్లను పెద్దఎత్తున నిర్వహిస్తున్నారని అన్నారు. ఇకపై ఆన్​లైన్ యాప్ సైతం అందుబాటులోకి వస్తే ఉత్పత్తుల మార్కెటింగ్ పెద్దఎత్తున ఊపందుకోనుందని తద్వారా మహిళలు లక్షాధికారులను చేయాలన్న సంకల్పాన్ని సాధించడం కష్టమేమీ కాదని అధికారులు చెబుతున్నారు.