AP Woman Dead Due to Heart Attack in Bus : భర్తకు సహాయంగా ఉండాలని, పిల్లలను బాగా చదివించుకోవాలనే ఉద్దేశంతో అప్పులు చేసి మరీ జీవనోపాధి కోసం ఓ మహిళ మస్కట్ వెళ్లారు. అక్కడ ఇబ్బందులు తట్టుకోలేక తన స్వగ్రామానికి తిరిగి వస్తూ గుండెపోటుతో మార్గమధ్యలో బస్సులోనే మృతి చెందారు. ఈ హృదయ విదారక ఘటన ఆలస్యంగా వెలుగులోకి వచ్చింది. కుటుంబీకుల సమాచారం ప్రకారం ఏపీలోని తూర్పుగోదావరి జిల్లా కోరుమామిడికి చెందిన బొంతా సత్యపద్మకు పశ్చిమ గోదావరి జిల్లా అత్తిలి మండలం మంచిలికి చెందిన ప్రభాకర్‌తో 15 ఏళ్ల క్రితం వివాహం జరిగగా వీరికి ఇద్దరు పిల్లలు ఉన్నారు.
ఇదీ జరిగింది :కూలి పనులు చేస్తూ దాచిన సొమ్ముకు మరికొంత నగదు అప్పు చేసి ఆ మొత్తం సొమ్ము రూ.2 లక్షలు విజయవాడకు చెందిన మహిళా ఏజెంట్‌కు చెల్లించి రెండేళ్ల క్రితం మహిళ మస్కట్కు వెళ్లారు. మస్కట్లో యజమానుల ఇబ్బందులు తట్టుకోలేక దానికితోడు ఆరోగ్యం కూడా క్షీణించడంతో ఆమె తిరిగి వెళ్లిపోతానని ఆరు నెలలుగా వారికి మొర పెట్టుకుంటున్నారు. సత్యపద్మను వెనక్కి పంపించాలని భర్త ఎన్నో సార్లు మహిళా ఏజెంట్‌ను వేడుకున్నప్పటికీ ఆమె మనసు కరగలేదు. మరో రూ.2 లక్షలు చెల్లించాలని చెప్పడంతో ఆమెకు ఆ డబ్బులను ఇచ్చారు. మరో వారం రోజుల్లో ఇంటికి తిరిగొస్తుందనుకుంటే ఆమె విగతజీవిగా మారి తిరిగొచ్చారు.