Actor Nagarjuna Condemns Minister Konda Surekha Comments :మంత్రి కొండా సురేఖ వ్యాఖ్యలను సినీ నటుడు నాగార్జున తీవ్రంగా ఖండించారు. రాజకీయాలకు దూరంగా ఉండే సినీ ప్రముఖుల జీవితాలని మీ ప్రత్యర్ధులను విమర్శించేందుకు వాడుకోవద్దని కోరారు. సాటి మనుషుల వ్యక్తిగత విషయాలను గౌరవించాలన్నారు. బాధ్యత గల పదవిలో ఉన్న మహిళగా మా కుటుంబంపై చేసిన ఆరోపణన పూర్తిగా అబద్దమని నాగార్జున తెలిపారు. మంత్రి కొండా సురేఖ తన వ్యాఖ్యలను వెంటనే ఉపసంహరించుకోవాలని నాగార్జున కోరారు. ఈ మేరకు ఆయన ఎక్స్‌లో పోస్టు చేశారు.
"గౌరవనీయ మంత్రివర్యులు శ్రీమతి కొండా సురేఖగారి వ్యాఖ్యలని తీవ్రంగా ఖండిస్తున్నాను. రాజకీయాలకు దూరంగా ఉండే సినీ ప్రముఖుల జీవితాలని, మీ ప్రత్యర్థులని విమర్శించేందుకు వాడుకోకండి. దయచేసి సాటి మనుషుల వ్యక్తిగత విషయాలని గౌరవించండి. బాధ్యత గలిగిన పదవిలో ఉన్న మహిళగా మీరు చేసిన వ్యాఖ్యలు, మా కుటుంబం పట్ల మీరు చేసిన ఆరోపణలు పూర్తిగా అసంబద్ధం, అబద్ధం. తక్షణమే మీ వ్యాఖ్యలను వెనక్కి తీసుకోవాల్సిందిగా కోరుతున్నాను."-సినీ నటుడు నాగార్జున ట్వీట్
ఇంతకీ మంత్రి కొండా సురేఖ ఏమన్నారంటే :బీసీ మహిళనైన తనపై అసభ్యకర పోస్టులు పెట్టడం బాధాకరమని మంత్రి కొండా సురేఖ ఆవేదన వ్యక్తం చేశారు. మహిళలను కించపరిచేలా పోస్టులు పెట్టాలని బీఆర్ఎస్ వర్కింగ్ ప్రెసిడెంట్ కేటీఆరే ఆ పార్టీ కార్యకర్తలకు చెప్పినట్లు ఉందన్నారు. బుధవారం ఆమె మీడియాతో మాట్లాడుతూ, కేటీఆర్‌పై తీవ్ర విమర్శలు చేశారు. ఆయన తీరుతో చలనచిత్ర పరిశ్రమలో కొంతమంది ఇబ్బంది పడ్డారని అన్నారు. కొందరు హీరోయిన్లు త్వరగా మ్యారేజ్ చేసుకుని సినిమా ఫీల్డ్‌ నుంచి తప్పుకోవడానికి కారణం కూడా మాజీ మంత్రి కేటీఆర్ అని ఆరోపించారు. అంతేకాదు, అక్కినేని నాగార్జున కుటుంబంలో చోటు చేసుకున్న పరిస్థితులకు కూడా కేటీఆర్ కారణమని ప్రస్తావించారు.