Fake Bail In Chanchalguda Jail : నిందితులు తప్పు చేసి జైళ్లకి వెళ్తుంటారు. జైళ్లో శిక్షలు అనుభవించే నిందితులకు ఎలాంటి సౌకర్యాలు ఉండవు. వారు అక్కడి నుంచి తప్పించుకోవడానికి ఎలాంటి దారులూ ఉండవు. నిత్యం సీసీ ఫుటేజీలతో గట్టి నిఘా ఉంటుంది. అయితే చంచల్గూడ జైలులోని ఓ ఖైదీ మాత్రం తెలివిగా తప్పించుకున్నాడు. నకిలీ బెయిల్‌ పత్రాలు సృష్టించి, పోలీస్ అధికారులను నమ్మించి విడుదలైన ఘటన అందరినీ ఆశ్చర్యపరిచింది.
డబీర్పురా ఠాణా సీఐ నానునాయక్‌ కథనం ప్రకారం : సంతోశ్నగర్‌కు చెందిన సుజాత్ అలీ ఖాన్ (27)పై నవంబర్ 2న నార్సింగి పోలీస్ స్టేషన్లో ఓ కేసు నమోదైంది. అదే రోజు అతడిని అరెస్ట్ చేసి చంచల్గూడ జైలుకు తరలించారు. అనంతరం అతడిపై మరో కేసు కూడా పెట్టారు. మొదటి కేసులో రాజేంద్రనగర్‌ కోర్టు నుంచి బెయిల్‌ ఉత్తర్వులు వచ్చినట్లు జైలు అధికారులకు ఇచ్చారు. మరో కేసు ఉండటంతో అతడిని విడుదల చేయలేదు. నవంబర్ 26న రెండో కేసులోనూ బెయిల్‌ మంజూరు కావడంతో అతడిని విడుదల చేశారు. అయితే ఆన్‌లైన్‌లో రావాల్సిన బెయిల్‌ ఉత్తర్వులు జైలుకు చేరలేదు. వారంట్లు తనిఖీ చేయగా, రెండో బెయిల్‌ ఉత్తర్వులు నకిలీవని తేలింది.