పొట్టి గొర్రెలు, పొడవాటి చెవుల మేకలు - ఆ ఫాంహౌస్​లో అంతా విచిత్రమే

వివిధ రకాల వింత జంతువులు, పక్షులను పెంచుతున్న ప్రకాశం జిల్లాకు చెందిన వ్యక్తి - పర్యటనలకు వెళ్లిన సమయాల్లో ప్రసిద్ధి చెందిన వాటిని కొనుగోలు చేస్తుంటానని వెల్లడి

Man Raising Different Types of Animals Yerragondapalem:ఆ తోటలోకి అడుగు పెట్టినవారికి అక్కడ కనిపించే జంతువులను చూసి ఏదేని విచిత్ర జంతువుల ప్రదర్శనశాలకు వచ్చామా అనే అనుభూతి కలుగుతుంటుంది. మనం రోజూ చూసే సాధారణ పక్షులు, జంతువులకు భిన్నమైనవి అక్కడ కనిపించడమే అందుకు కారణం. అక్కడ రకరకాల జాతులకు చెందిన వింత జంతువులు దర్శమనమిస్తుంటాయి.

విదేశీ బాతులు ఓ వైపు పరుగులు తీస్తుంటే పొడవాటి చెవుల మేకలు, ఎక్కువ ఊలుతో ఉన్న పొట్టి గొర్రెలు మరో వైపు చెంగుచెంగున ఎగురుతుంటాయి. ముచ్చటగొలిపేలా ఉన్న చిట్టి పొట్టి ఆవులు కూడా కనిపిస్తుంటాయి. ఇక కోళ్లలో అయితే అనేక రకాలు కనువిందు చేస్తాయి. వీటన్నింటినీ ప్రకాశం జిల్లాకు చెందిన ఓ వ్యక్తి ఎంతో ఇష్టంతో పెంచుకుంటున్నారు.

జంతువులపై ప్రేమతోనే ఇదంతా: జిల్లాలోని యర్రగొండపాలేనికి చెందిన రువ్వుల శ్రీనివాస్‌ జంతువులు, పక్షుల ప్రేమికుడు. వృత్తిరీత్యా పర్యటనలకు వెళ్లిన సమయాల్లో అక్కడ ప్రసిద్ధి చెందిన జంతువులు, పక్షుల గురించి కనుక్కొని కొనుగోలు చేస్తుంటారు. స్వగ్రామంలో తనకున్న రెండెకరాల ఫాంహౌస్‌కు తెచ్చి పెంచుతుంటారు. అంతే కాకుండా వాటిని చాలా జాగ్రత్తగా చూసుకుంటుంటారు. ఇప్పటి వరకు హైదరాబాద్‌ నుంచి పొడవాటి చెవులున్న జమునపరి మేకలను, అధిక ఊలుతో ఉన్న పొట్టి గొర్రెలు, బెంగాల్‌ నుంచి కొన్ని రకాల మేకలను కొనుగోలు చేసి తన ఫాంహౌస్​కు తీసుకొచ్చారు.

వీటితోపాటు చిత్తూరు జిల్లా నుంచి పుంగనూరు ఆవులు, తమిళనాడు నుంచి ఫ్యాన్సీ కోళ్లు, దుబాయి నుంచి మాస్కోబి డస్ట్‌ పక్షులు, గుంటూరు నుంచి ఖజానా బాతులను తెచ్చి పెంచుతున్నారు. శ్రీనివాస్‌ ప్రతిరోజూ ఉదయం, సాయంత్రం వేళల్లో పక్షులు, జంతువులతో కొంత సమయం గడుపుతూ వాటి సంరక్షణ బాధ్యతలు చూసుకుంటుంటారు. అంతే కాకుండా వాటితో కొంత సమయం గడిపితే మనసుకు ఆహ్లాదకరంగా ఉంటుందని శ్రీనివాస్ అంటున్నారు.

తనకు జంతువులు, పక్షులు అంటే చిన్నప్పటి నుంచి ఇష్టమని అందుకే ఇలా రకరకాల జంతువులు, పక్షులను కొనుగోలు చేసి పెంచుతున్నట్లు తెలిపారు. ఇకపై రాబోయే రోజుల్లో కూడా కొత్త కొత్త జాతులకు చెందిన జంతువులు, పక్షులను తెచ్చి పెంచుతానని శ్రీనివాస్ అంటున్నారు.