Pat Cummins IPL 2024:సన్రైజర్స్ హైదరాబాద్ కెప్టెన్ ప్యాట్ కమిన్స్ తెలుగు క్రికెట్ ఫ్యాన్స్కు రోజు రోజుకు దగ్గరవుతున్నాడు. ప్రస్తుత సీజన్లో జట్టును విజయవంతంగా నడిపిస్తూ, అభిమానుల మన్ననలు పొందుతున్న కమిన్స్ తాజాగా మరోసారి అందరి మనసు దోచేశాడు. కమిన్స్ హైదరాబాద్లో శుక్రవారం ఓ ప్రభుత్వ పాఠశాలకు వెళ్లాడు. అక్కడి విద్యార్థులతో కాసేపు సరదాగా గడిపాడు.
పాఠశాల గ్రౌండ్లో పిల్లలతో కలిసి కమిన్స్ క్రికెట్ ఆడాడు. కొంతమంది పిల్లలు కమిన్స్కు బౌలింగ్ చేశారు. తర్వాత కమిన్స్ వికెట్ కీపింగ్ చేస్తూ ఆకట్టుకున్నాడు. ఇక తమతో కలిసి కమిన్స్ క్రికెట్ ఆడడం పిల్లలు బాగా ఎంజాయ్ చేశారు. ఈ వీడియో సోషల్ మీడియాలో తెగ వైరల్గా మారింది. పిల్లలతో కలిసి క్రికెట్ ఆడిన కమిన్స్పై ప్రశంసలు కురిపిస్తున్నారు. 'పిల్లలను అతడికి అప్పగిస్తే, స్కూల్ టోర్నీలు కూడా గెలిపిస్తాడు', 'కమిన్స్ లాంటి ఛాంపియన్తో క్రికెట్ ఆడడం పిల్లలకు ఎప్పటికీ గుర్తుండిపోయే జ్ఞాపకం' అంటూ నెటిజన్లు కామెంట్ చేస్తున్నారు.
2024 ఐపీఎల్లో ప్యాట్ కమిన్స్ సారథ్యంలోని సన్రైజర్స్ హైదరాబాద్ జట్టు అదరగొడుతోంది. ఈ సీజన్లో సన్రైజర్స్ ఎలాంటి బెదురు లేకుండా ఆడడానికి కారణం జట్టు కెప్టెన్ కమిన్సే అనడంలో సందేహం లేదు. ఈ సీజన్లో ఇప్పటివరకు 13మ్యాచ్లు ఆడగా ఏడింట్లో నెగ్గి, 5 ఓడింది. ఒక మ్యాచ్ రద్దైంది. దీంతో 15 పాయింట్లతో ఉన్న సన్రైజర్స్ మూడో స్థానంలో కొనసాగుతోంది. ఆఖరి లీగ్ మ్యాచ్లోనూ గెలిస్తే టాప్- 2కు చేరుకుంటుంది. ఇక కమిన్స్ కెప్టెన్సీలో సన్రైజర్స్ ఈ సీజన్ ఛాంపియన్గా నిలుస్తుందని ఫ్యాన్స్ ఆశిస్తున్నారు.