Paris Olympics Day 5 India:పారిస్ ఒలింపిక్స్లో ఐదో రోజు భారత్కు మంచి ఫలితాలే దక్కాయి. స్టార్ షట్లర్లు పీవీ సింధు, లక్ష్యసేన్ బ్యాడ్మింటన్ సింగిల్స్లో ప్రీ క్వార్టర్స్కు అర్హత సాధించారు. బుధవారం జరిగిన గ్రూప్ స్టేజ్ మ్యాచ్లో క్రిస్టిన్‌ కూబా (ఎస్టోనియా)పై 21-5, 21-10 తేడాతో నెగ్గి రౌండ్ 16 (ప్రీ క్వార్టర్స్)కు అర్హత సాధించింది. మ్యాచ్లో సింధు పూర్తి ఆధిపత్యం ప్రదర్శించడం వల్ల ఆట 34 నిమిషాల్లోనే ముగిసింది. మరోవైపు లక్ష్యసేన్ పురుషుల సింగిల్స్ గ్రూప్ స్టేజ్లో జొనాథన్ (ఇండోనేసియా)తో తలపడ్డాడు. ఈ మ్యాచ్లో 21-18, 21-12 తేడాతో నెగ్గి ప్రీ క్వార్టర్స్కు వెళ్లాడు.
టేబుల్ టెన్నిస్లో రికార్డ్ కానీ అంతలోనే
యంగ్ ప్లేయర్లు మనీకా బాత్రా, ఆకుల శ్రీజ బుధవారం రికార్డు సృష్టించారు. మహిళల సింగిల్స్ టేబుల్ టెన్నిస్ వేర్వేరు పోటీల్లో మనీకా, శ్రీజ విజయం సాధించి ప్రీ క్వార్టర్స్కు దూసుకెళ్లారు. ఈ క్రమంలో ఒలింపిక్స్ టేబుల్ టెన్నిస్లో ప్రీ క్వార్టర్ ఫైనల్స్కు అర్హత సాధించిన అథ్లెట్లుగా రికార్డు సృష్టించారు. మనికా బాత్ర 4-0 తేడాతో నెగ్గగా, తెలుగు అమ్మాయి ఆకుల శ్రీజ సెర్బియన్ ప్లేయర్ జియాన్ జెంగ్పై 4-2 తేడాతో నెగ్గింది.
అయితే టేబుల్ టెన్నిస్లో రికార్డు సృష్టించిన మనికా బాత్ర ప్రీ క్వార్టర్స్లో నిరాశ పర్చింది. రౌండ్ 16లో మ్యూ హిరానో (జపాన్)తో పోటీపడ్డ మనికా బాత్ర 4-1 తేడాతో ఓడింది.
ఫైనల్కు స్వప్నిల్
పురుషుల 50మీటర్ల రైఫిల్ 3పొజిషన్స్ ఈవెంట్లో స్వప్నిల్ కుసాలే ఫైనల్కు దూసుకెళ్లాడు. 590-38x పాయింట్లతో క్వాలిఫైయర్లో 7వ స్థానంలో నిలిచి పతక పోరుకు అర్హత సాధించాడు. ఆగస్టు 01న స్వప్నిల్ ఫైనల్లో ఆడనున్నాడు. మరోవైపు ఇదే ఈవెంట్లో షూటర్ ఐశ్వరీ ప్రతాప్ 589-33x పాయింట్లతో 11వ స్థానం దక్కించుకున్నాడు.