జడేజా, అశ్విన్​ లేకుండానే తొలి టెస్ట్​ - వీరిని కాదని సుందర్​నే ఎందుకు తీసుకున్నారంటే?

మొదలైన బోర్డర్‌ గవాస్కర్‌ ట్రోఫీ మొదటి టెస్ట్‌ - తది జట్టులో అరుదైన ఘటన!

IND VS AUS 1st Test Ashwin Jadeja : బోర్డర్‌ గవాస్కర్‌ ట్రోఫీ మొదటి టెస్ట్‌ పెర్త్ వేదికగా మొదలైంది. అయితే ఈ మ్యాచ్​ తుది జట్టు కూర్పులో ఓ అరుదైన సంఘటన చోటు చేసుకుంది. టీమ్ ఇండియా ఇద్దరు స్ట్రైట్‌ స్పిన్నర్లు లేకుండానే బరిలోకి దిగింది. దీంతో దశాబ్ద కాలంగా భారత టెస్టు విజయాల్లో కీలకంగా వ్యవహరిస్తోన్న రవిచంద్రన్ అశ్విన్, రవీంద్ర జడేజా బెంచ్‌కే పరిమితమవ్వడం అందరినీ షాక్​కు గురి చేస్తోంది. అనుభవజ్ఞులైన ఇద్దరు ఆటగాళ్లను పక్కన పెట్టి, తక్కువ అనుభవం ఉన్న వాషింగ్టన్‌ సుందర్‌ను తుది జట్టులోకి తీసుకుని పెద్ద సాహసమే చేసింది. అంటే ఏకైక స్పిన్నర్‌తో బరిలోకి దిగింది.

అయితే మ్యాచ్​కు ముందు చాలా మంది, ఒకవేళ ఏకైక స్పిన్నర్​ను తీసుకుంటే అది రవిచంద్రన్‌ అశ్విన్‌ అని అనుకున్నారు. కానీ మేనేజ్‌మెంట్‌ మాత్రం ఆఖరి నిమిషంలో సుందర్‌ వైపు మొగ్గు చూపి అందరినీ షాక్​కు గురిచేసింది. ఎందుకంటే సుందర్‌ మెరుగ్గా బ్యాటింగ్‌ చేస్తాడన్న కారణంతో తీసుకుందని తెలుస్తోంది.

కొన్ని క్రికెట్ మీడియా రిపోర్ట్స్ ప్రకారం జడ్డూ మ్యాచ్​ కోసం ఫుల్ ఫిట్​గా లేడని అంటున్నారు. ఇక అశ్విన్ విషయానికొస్తే అతడు విదేశీ పిచ్​పై బ్యాటింగ్​లో చెప్పుకోదగ్గ ప్రదర్శన చేయలేదు. అదే సుందర విషయానికొస్తే అతడు మెరుగ్గా బ్యాటింగ్‌ చేస్తాడని మేనేజ్​మెంట్​ భావిస్తోందట.

ఇలా జరగడం ఐదో సారి - కాగా, 2012 నుంచి అశ్విన్-జడేజా లేకుండా భారత్ జట్టు టెస్టు ఆడటం ఇది ఐదోసారి మాత్రమే. అందులో నాలుగు సార్లు ఆస్ట్రేలియాతో ఆడిన మ్యాచ్‌లే ఉన్నాయి. మరో మ్యాచ్ దక్షిణాఫ్రికాతో ఆడింది. అయితే అశ్విన్-జడేజా లేకుండా టీమ్ ఇండియా ఆడిన గత నాలుగు మ్యాచుల్లో రెండింటిలో విజయాలు సాధించింది. 2018లో జొహెన్నెస్‌బర్గ్ వేదికగా దక్షిణాఫ్రికాపై, 2021లో బ్రిస్బేన్ వేదికగా ఆస్ట్రేలియాపై విజయం సాధించింది. 2014లో అడిలైడ్ వేదికగా, 2018లో పెర్త్ వేదికగా జరిగిన మ్యాచ్​లలో ఆస్ట్రేలియాపై ఓడింది. మొత్తంగా జడేజా - అశ్విన్​ లేకుండానే మేనేజ్​మెంట్​ రచించిన ఈ వ్యూహం తాజా మ్యాచ్​లో సక్సెస్‌ అవుతుందా లేదా బెడిసికొడుతుందా అన్నది చూడాలి.

ఇకపోతే ఈ మ్యాచ్‌లో నాలుగు పేస్ బౌలింగ్ ఆప్షన్స్​తో బరిలోకి దిగింది భారత్‌. అందులో ఒకరు సీమ్ బౌలింగ్ ఆల్​రౌండర్​ నితీశ్‌ కుమార్‌ రెడ్డి కాగా రెండో ఆటగాడు రైట్ ఆర్మ్ మీడియం ఫాస్ట్ బౌలర్ హర్షిత్‌ రాణా. ఇంకా ఈ పెర్త్‌ పిచ్‌ పేస్‌ బౌలర్లకు అనుకూలించనుండటం వల్ల భారత్​ ఈ మ్యాచ్‌లో ముగ్గురు స్పెషలిస్ట్‌ పేసర్లు, ఓ పేస్‌ బౌలింగ్‌ ఆల్‌రౌండర్‌తో బరిలోకి దిగింది.