2026 Commonwealth Games : గ్లాస్గో వేదికగా జరగనున్న కామన్వెల్త్ క్రీడల నుంచి హాకీ, రెజ్లింగ్, బ్యాడ్మింటన్, టేబుల్ టెన్నిస్, క్రికెట్, స్క్వాష్‌, షూటింగ్, నెట్‌ బాల్, రోడ్‌ రేసింగ్ను తొలగించనున్నారు. తాజాగా ఈ విషయాన్ని కామన్వెల్త్ క్రీడల సమాఖ్య ప్రకటన చేసింది. దీంతో క్రీడాభిమానులు ఒక్కసారిగా షాకయ్యారు. ముఖ్యంగా భారత అభిమానులు ఈ నిర్ణయం పట్ల ఒకింత అసహనం వ్యక్తం చేస్తున్నారు.
2022లో బర్మింగ్‌హామ్ వేదికగా 19 ఈవెంట్‌లను నిర్వహించారు. అయితే, ఈ సారి మాత్రం ఖర్చులను తగ్గించుకోవడానికి 10 ఈవెంట్‌లను మాత్రమే నిర్వహించాలని నిర్ణయించినట్లు తెలుస్తోంది. నాలుగేళ్లకు ఓ సారి జరిగే ఈ కామన్వెల్త్ క్రీడలు 2026లో స్కాట్లాండ్‌లోని గ్లాస్గోలో జరగనున్నాయి. వచ్చే ఏడాది జులై 23 నుంచి ఆగస్టు 2 వరకు ఈ టోర్నమెంట్‌ను నిర్వహించనున్నారు.
ఇదిలా ఉండగా, తాజాగా కామన్వెల్త్ నిర్వాహకులు తీసుకున్న ఈ నిర్ణయం భారత్కు ఒకరకంగా ఇబ్బందికరమే అని క్రీడానిపుణులు ఆవేదన వ్యక్తం చేస్తున్నారు. ఎందుకంటే రెజ్లింగ్, బ్యాడ్మింటన్, హాకీ, క్రికెట్, షూటింగ్ లాంటి క్రీడల్లో భారత్కు పతక అవకాశాలు ఎక్కువగానే ఉన్నాయి. ఇప్పుడీ క్రీడాంశాలను తొలగించడం వల్ల మెడల్స్ సంఖ్య గణనీయంగా తగ్గే ఛాన్స్ ఉన్నట్లు తెలుస్తోంది.