Damacharla Vs Balineni in Prakasam District : ప్రకాశం జిల్లా రాజకీయం రోజుకో మలుపు తిరుగుతోంది. నిన్నటి వరకు రాజకీయ ప్రత్యర్థులుగా హోరాహోరీగా తలపడిన ఎమ్మెల్యే దామచర్ల జనార్దన్, మాజీమంత్రి బాలినేని శ్రీనివాసరెడ్డిల మధ్య మరోసారి వార్ మొదలైంది. బాలినేని శ్రీనివాసరెడ్డి వైఎస్సార్సీపీని వీడి అధికార కూటమిలోని జనసేనలో చేరేందుకు రంగం సిద్ధం చేసుకున్నారు. ఈ పరిణామాన్ని టీడీపీతోపాటు జనసేన నాయకులూ జీర్ణించుకోలేకపోతున్నారు.
ప్రకాశం జిల్లాలో ఎక్కడా లేని విధంగా గత ఎన్నికల్లో నగరంలోనే ఉద్రిక్త పరిస్థితులు, దాడులు, దౌర్జన్యాలు చోటు చేసుకున్నాయి. టీడీపీ కార్యకర్తలపై అక్రమ కేసులు నమోదయ్యాయి. పలువురు జైలు పాలయ్యారు. అధికార కూటమిలోని జనసేనలో మాజీ మంత్రి బాలినేని చేరికను జనసేన నాయకులతో పాటూ టీడీపీ నేతలు తీవ్రంగా వ్యతిరేకిస్తున్నారు. తూర్పునాయుడుపాలెంలో జరిగిన కార్యక్రమంలో బాలినేనిని ఉద్దేశించి ఎమ్మెల్యే దామచర్ల ఘాటు వ్యాఖ్యలు చేయగా, ఒంగోలులో బాలినేని ప్రతి సమాధానమిచ్చారు.
మీ అనినీతి మొత్తం వెలికి తీస్తాం : ఎమ్మెల్యే దామచర్ల జనార్దన్
‘మీరు, మీ కుమారుడు చేసిన అవినీతి పనులు మొత్తం వెలికి తీస్తాం. ఏ పార్టీలో చేరినా వాటి నుంచి తప్పించుకోలేరు. కేసులు పెడతారని తెలిసే పార్టీ మారుతున్నార’ని మాజీ మంత్రి బాలినేని శ్రీనివాసరెడ్డిని ఉద్దేశించి ఒంగోలు ఎమ్మెల్యే దామచర్ల జనార్దన్ వ్యాఖ్యానించారు. టంగుటూరు మండలం తూర్పునాయుడుపాలెంలో ఆదివారం నిర్వహించిన మాజీ మంత్రి దామచర్ల ఆంజనేయులు వర్ధంతి సభలో ఆయన మాట్లాడారు. ‘ప్రభుత్వం మారి వంద రోజులైంది. గతంలో చేసిన పాపాలు, అవినీతి నుంచి తప్పించుకునేందుకు ఓ పెద్దమనిషి పార్టీ మారుతున్నారు. అప్పుడే మా వారికి ఏదైనా ఇబ్బంది జరిగితే అధిష్ఠానానికి ఫిర్యాదు చేస్తానని బెదిరిస్తున్నారు.
జిల్లాలో టీడీపీ లేకుండా చేస్తానన్న ఆయన ఇప్పుడు మరో గత్యంతరం లేకే పార్టీ మారుతున్నారు. అయినా వదిలి పెట్టం. ఆయన అక్రమాలన్నీ బయటపెడతాం. అప్పుడు ఎవరూ ఆయనను కాపాడలేరు. వైఎస్సార్సీపీ పాలనలో అక్రమ కేసులు పెట్టి ఎంతమందిని ఇబ్బంది పెట్టారో అందరికీ తెలుసు. మహిళల్ని సైతం వదిలిపెట్టలేదు. నాపైనే 23 కేసులు పెట్టారు. మా నాయకుడు చంద్రబాబు, జనసేన అధినేత పవన్‌కల్యాణ్‌ను దూషించారు. పార్టీ ఆవిర్భావం నుంచి మేం టీడీపీలోనే ఉన్నాం. ఏదైనా ఇబ్బంది వస్తే రాజకీయాల నుంచి తప్పుకుంటామే తప్ప ఇతర పార్టీల వైపు కన్నెత్తి చూడం. గత ఎన్నికల్లో మా విజయానికి టీడీపీ, జనసేన, బీజేపీ కార్యకర్తలు విశేషంగా కృషి చేశారు. అక్రమ కేసులు ఎదుర్కొన్నారు. వారందరికీ తోడుగా ఉంటామ’ని పేర్కొన్నారు.