మేడిగడ్డ విషయంలో బీఆర్​ఎస్​ తీరు హాస్యాస్పదం : మంత్రి ఉత్తమ్​

Minister Uttam Kumar Reddy on Medigadda Project Issue : ప్రాజెక్టుల విషయంలో గత ప్రభుత్వం భారీ తప్పులు చేసిందని నీటిపారుదల శాఖ మంత్రి ఉత్తమ్​ కుమార్​ రెడ్డి అన్నారు. అందుకే మేడిగడ్డ, అన్నారం, సుందిళ్లపై సత్వర విచారణ జరగాలని కోరామని స్పష్టం చేశారు. సచివాలయంలోని తన ఛాంబర్​లో జరిగిన సమావేశంలో ఆయన మాట్లాడారు.

Minister Uttam Kumar Reddy on Medigadda Project Issue : మేడిగడ్డ విషయంలో బీఆర్​ఎస్​ తీరు హాస్యాస్పదంగా ఉందని నీటి పారుదల శాఖ మంత్రి ఉత్తమ్​ కుమార్ రెడ్డి ధ్వజమెత్తారు. ధ్వంసమైన బ్యారేజీని చూసిన బీఆర్​ఎస్​ నేతలు ఇప్పటికై ప్రజలకు క్షమాపణ చెప్పాలన్నారు. మేడిగడ్డ వెళ్తున్న బీఆర్​ఎస్​ నేతల బస్సు టైర్ పేలిపోయిందని కారు సహా ఆ పార్టీ వాహనాలన్నీ ఇక షెడ్డుకేనని పరిమితమని మంత్రి ఎద్దేవా చేశారు. హైదరాబాద్​లో మీడియాతో నిర్వహించిన చిట్​చాట్​లో మంత్రి ఉత్తమ్​ కుమార్​ రెడ్డి(Uttam Kumar Chitchat) ఈ విధంగా స్పందించారు.

కాళేశ్వరం ప్రాజెక్టు డిజైన్, నిర్మాణంలో బీఆర్​ఎస్​ భారీ తప్పిదాలు చేసిందని కమీషన్లకు కక్కుర్తిపడి రైతుల ప్రయోజనాలను పణంగా పెట్టిందని మంత్రి ఉత్తమ్​ కుమార్​ రెడ్డి ధ్వజమెత్తారు. కాళేశ్వరం ప్రాజెక్టుకు సంబంధించి బీఆర్​ఎస్​ పాపాల్లో కేంద్రంలోని బీజేపీ ప్రభుత్వానికీ భాగస్వామ్యం ఉందని ఆరోపించారు. సరైన అనుమతులు లేకుండానే కేంద్ర ప్రభుత్వ సంస్థలు వేల కోట్ల రూపాయల రుణాలు ఎలా ఇచ్చాయని మంత్రి ఉత్తమ్​ కుమార్​ రెడ్డి ప్రశ్నించారు. వాస్తవానికి రుణాలను కేసీఆర్, కేటీఆర్ కూడబెట్టుకున్న సంపాదన నుంచే కట్టాలి కానీ ప్రభుత్వంపై ఆ భారం పడిందన్నారు. నాగార్జున సాగర్ నిర్వహణను రాష్ట్ర ప్రభుత్వమే చేపట్టేందుకు వీలుగా సీఆర్​పీఎఫ్ బలగాలను తొలగించాలని కోరామన్నారు.

రాష్ట్ర ప్రభుత్వ వినతి మేరకు ఎన్డీఎస్ఏ(NDSA) కమిటీ వేయడాన్ని స్వాగతిస్తున్నామని ఉత్తమ్ కుమార్ రెడ్డి అన్నారు. మేడిగడ్డతో పాటు అన్నారం, సుందిళ్ల బ్యారేజీలను యుద్ధప్రాతిపదినక పరిశీలించి నిర్మాణాత్మక సూచనలు ఇవ్వాలని ఎన్డీఎస్ఏను మంత్రి ఉత్తమ్ కుమార్ రెడ్డి కోరారు. నెల రోజుల్లో ప్రాథమిక నివేదిక ఇవ్వనున్నట్లు జాతీయ డ్యాం సేఫ్టీ అథారిటీ తెలిపిందన్నారు. శనివారం దిల్లీ వెళ్లి కేంద్ర అధికారులను కలిసి దీనిపై చర్చించనున్నట్లు మంత్రి తెలిపారు.

చాలా నివేదికలు లేవు : రాజ్యాంగబద్ధమైన ఎన్డీఎస్ఏ సూచనల మేరకు కాళేశ్వరం ప్రాజెక్టును ఎలా పునరుద్ధరించాలో నిర్ణయం తీసుకుంటామని చెప్పారు. అయితే రాష్ట్ర ప్రభుత్వం పలు డాక్యుమెంట్లు, వివరాలు ఇవ్వడం లేదని కేంద్ర ప్రభుత్వ సలహాదారుడు పేర్కొనడం సమంజసం కాదన్నారు. జియోలాజికల్ ప్రొఫైల్, క్వాలిటీ కంట్రోల్, థర్డ్ పార్టీ రిపోర్టులు లేవు కావున తమ ప్రభుత్వం ఇవ్వలేదని వివరించారు. చాలా నివేదికలు అసలు లేవని గత ప్రభుత్వం పనితీరు అలా ఉందని మంత్రి అన్నారు. ఎన్డీఎస్ఏ కమిటీకి తమ వద్ద ఉన్న వివరాలు, సమాచారం పూర్తిగా ఇస్తామని చెప్పారు.

Minister Uttam Kumar Chit Chat :మేడిగడ్డ(Medigadda Barrage) కుంగుబాటుపై ఎవరెవరు బాధ్యులనే వివరాలతో నేడో, రేపో విజిలెన్స్ మరో నివేదిక ఇవ్వనుందని మంత్రి ఉత్తమ్ కుమార్ రెడ్డి తెలిపారు. విజిలెన్స్ నివేదికపై న్యాయ నిపుణుల సూచనలు తీసుకొని క్రిమినల్ కేసులు నమోదు చేసి బాధ్యులపై చట్టపరంగా చర్యలు తీసుకుంటామన్నారు. ఎల్అండ్ టీకి రూ.400 కోట్ల బిల్లులు నిలిపివేశామని ఉత్తమ్ కుమార్ రెడ్డి తెలిపారు. ప్రాణహిత చేవెళ్ల పూర్తి చేస్తే కాంగ్రెస్ పార్టీకి పేరు వస్తుందన్న అక్కుసుతో ప్రాజెక్టును కేసీఆర్ రీడిజైన్ చేశారని తీవ్రస్థాయిలో ఆరోపణలు చేశారు. తుమ్మిడిహట్టి వద్ద నీళ్లే లేవని అబద్ధాలు ప్రచారం చేశారని మంత్రి దుయ్యబట్టారు. మేనిఫెస్టోలో ప్రస్తావించినట్లుగా తుమ్మిడిహట్టి నిర్మిస్తామని దానికి ఎన్డీఎస్​ఏ నివేదికతో సంబంధం లేదన్నారు.