Side Effects of Using Skin Brightening Creams: తెల్లగా మెరిసిపోవాలని.. ప్రతి ఒక్కరూ తమ అందాన్ని గుర్తించాలని చాలా మంది కోరుకుంటారు. ఇందులో అమ్మాయిలే అధికం. అందుకే.. నల్లగా ఉన్నవారు, చామన ఛాయగా ఉన్నవారు.. తెల్లగా కనిపించటానికి మార్కెట్లో లభించే అనేక రకాల ఫెయిర్నెస్ క్రీమ్స్ వాడుతుంటారు. దీనికోసం వేలల్లో ఖర్చు చేస్తుంటారు. అయితే.. ఈ సమస్యకు క్రీమ్స్, బ్లీచింగ్ పరిష్కారం కాదనే విషయం తెలుసుకోవాలని నిపుణులు అంటున్నారు.
సాధారణంగా.. చర్మం కమిలినప్పుడో, నల్లమచ్చ ఏర్పడినప్పుడో వీటిని వాడాలని డాక్టర్లు చెబుతారని.. అదికూడా సిఫారసు చేసినంత కాలమే వాడుకోవాలని వివరిస్తున్నారు. అలా కాకుండా సొంతంగా షాపుల్లోంచి క్రీమ్స్ కొనుక్కొని, ఎలా పడితే అలా వాడితే చాలా దుష్ప్రభావాలు తలెత్తొచ్చని హెచ్చరిస్తున్నారు. అందుకు గల కారణాలను వివరిస్తున్నారు.
చాలా ఫెయిర్నెస్ క్రీమ్స్లో పాదరసం ఉంటుంది. ఇది భార లోహ విషానికి, కిడ్నీ వైఫల్యానికి దారితీయొచ్చంటున్నారు. అలాగే నరాలు దెబ్బతినడం, కొన్నిసార్లు మొటిమలు, చర్మ అలర్జీకి కారణం కావొచ్చని హెచ్చరిస్తున్నారు. ఇవి చర్మం మీద ప్రతికూల ప్రభావం చూపి మరింత ఇబ్బందికి గురిచేస్తాయని అంటున్నారు. 2019లో ప్రపంచ ఆరోగ్య సంస్థ(World Health Organization) వివరాల ప్రకారం.. ఫెయిర్నెస్ క్రీమ్స్లోని పాదరసం కారణంగా.. నరాలు దెబ్బతినడం, కిడ్నీలు ఫెయిల్ అవ్వడం వంటి పలు సమస్యలు ఇబ్బందిపెడతాయట. ఈ పరిశోధనలో WHOలో పబ్లిక్ హెల్త్ డిపార్ట్మెంట్లో సైంటిస్ట్ డాక్టర్ Annette Prüss-Ustün పాల్గొన్నారు.
ఈ పద్ధతులు ట్రై చేయండి:కాబట్టి తెల్లగా మారాలని క్రీమ్స్ ఉపయోగించే బదులు.. సహజ పద్ధతుల్లోనే చర్మాన్ని మెరిపించవచ్చని నిపుణులు సూచిస్తున్నారు. అందుకోసం..
పెరుగు, శనగపిండి:
- పెరుగు, శనగపిండి, కొద్దిగా నిమ్మరసం కలిపి ముద్దగా చేసి చర్మానికి రాసుకోవాలి.
- పది నిమిషాల తర్వాత శుభ్రంగా కడుక్కోవాలి.
- ఈ క్రమంలో ముఖానికి టాల్కమ్‌ పౌడర్, ఇతర క్రీములు రాసుకోకుండానూ చూసుకోవాలి. ఎందుకంటే ఇవి ఎండతో జరిపే ప్రతిచర్య మూలంగా చర్మం మరింత నల్లబడే ప్రమాదముంది.
- ఇలా క్రమం తప్పకుండా చేయడం వల్ల మంచి ఫలితం ఉంటుందంటున్నారు.