కరకరలాడే 'పిచ్చుక గూళ్లు' - ఈ వెరైటీ స్వీట్ మీరెప్పుడైనా టేస్ట్ చేశారా?

కోనసీమ జిల్లాలో నోరూరించే పిచ్చుక గూళ్లు - పండగలు, శుభకార్యాల్లో ఈ ప్రత్యేక వంటకం ఉండాల్సిందే - మీరెప్పుడైనా టేస్ట్ చేశారా?

Pichuka Gullu Sweet Recipe : ఆంధ్రప్రదేశ్​లోని కోనసీమ జిల్లా అంటే అందరికీ గుర్తొచ్చేది పచ్చని పంటపొలాలు, ఆహ్లాదకరమైన వాతావరణంతో పాటు అదరగొట్టే రుచులు. ఇక్కడి వంటకాలను టేస్ట్ చేస్తే ఫిదా కావాల్సిందే. అందులోనూ ఇక్కడ దొరికే కరకరలాడే పిచ్చుక గూళ్లకు ప్రత్యేక ఫ్యాన్ బేస్ ఉంటుందనడంలో ఎలాంటి అతిశయోక్తి లేదు. అదేంటి? పిచ్చుక గూళ్లను తినడమేంటని ఆశ్చర్యంగా చూస్తున్నారా? అయితే కోనసీమ రుచుల సంగతేంటో తెలుసుకోవాల్సిందే.

కోనసీమలో తయారయ్యే 'గర్రాజులు' అనే ఈ వంటకం రుచి తీయగా ఉంటుంది. ఆకారం మాత్రం పిచ్చుక గూళ్లను పోలి ఉండటంతో ఇక్కడి వారంతా దీనిని పిచ్చుక గూళ్లు అని పిలుస్తారట. 216 జాతీయ రహదారికి ఇరువైపులా నగరం నుంచి మామిడికుదురు వరకు దాదాపు 70 వరకు దుకాణాల్లో ఈ గర్రాజుల (పిచ్చుక గూళ్లు)ను తయారు చేస్తూ విక్రయిస్తుంటారు. ఆ వైపుగా వెళ్లే వాహనచోదకులు, ప్రయాణికులు వీటిని టేస్ట్ చేయకుండా ఉండలేరు! ఏవైనా పండుగలు, శుభకార్యాలు జరిగితే ప్రత్యేకంగా ఆర్డర్ ఇచ్చి మరీ విందులో వీటిని ఏర్పాటు చేస్తుంటారు.

ఎలా తయారు చేస్తారంటే..? ఈ గర్రాజులను తయారు చేసేందుకు ముందుగా బియ్యాన్ని నానబెడతారు. నానబెట్టిన ఆ బియ్యాన్ని పిండిగా చేసుకుని, పంచదార లేదా పాకం పట్టిన బెల్లం అందులో కలిపి ధారగా పడేలా పల్చగా కలుపుకుంటారు. ఆ మిశ్రమాన్ని బాగా కాగిన నూనెలో రంధ్రాలున్న నిలువు చట్రం ద్వారా పిండిని తిప్పుతూ గుండ్రంగా వచ్చేలా అందులో పోస్తారు. కొంచెం వేగిన తర్వాత దానిని అర్ధ చంద్రాకారంలో మలిచి, దోరగా వేగే వరకు ఉంచుతారు. ఆ తర్వాత నూనెలో నుంచి తీసేస్తే కరకరలాడే గర్రాజులు రెడీ అయిపోయినట్లే.

నెయ్యితోనూ తయారీ : వీటిని తయారు చేసేందుకు కొందరు నూనెకు బదులుగా నెయ్యిని కూడా వాడతారు. కొందరైతే పంచదార, బెల్లంతో కాకుండా తేనెతో తయారు చేయించుకుంటుంటారు. సుమారు 30 నుంచి 40 గ్రాములు ఉంటే ఈ గర్రాజులు ఒక్కో పీస్ రూ.10 నుంచి రూ.12కు విక్రయిస్తుంటారు. వీటిని గాలి తగలకుండా జాగ్రత్త చేసుకుంటే 3 వారాల వరకు నిల్వ ఉంటాయట.

బర్మా నుంచి ఆంధ్రప్రదేశ్​కు : అయితే ఈ గర్రాజులు ఇక్కడివి కావట. దాదాపు 35 ఏళ్ల క్రితం మామిడికుదురు మండలం నగరం గ్రామానికి చెందిన కొందరు ముస్లింలు ఉపాధి నిమిత్తం బర్మా వెళ్లారు. అక్కడ ఈ వంటకాన్ని చూసిన వారు, దాన్ని ఇక్కడకు తీసుకొచ్చారు. టేస్టే బాగుండటంతో వారిళ్లలో జరిగే శుభకార్యాలు, పండగల్లో ఓ సంప్రదాయ మిఠాయిగా నిలిచింది. అలా నగరంతో పాటు మామిడికుదురు మండల పరిధిలో దాదాపు 200 కుటుంబాలు ఈ పిచ్చుక గూళ్ల తయారీతో ఉపాధి పొందుతున్నాయి. కోనసీమ మీదుగా ఉన్న 216 హైవే వల్ల ఇవి బాహ్య ప్రపంచానికి పరిచయమయ్యాయి. దీంతో ఉమ్మడి గోదావరి జిల్లాల్లో వీటి విక్రయాలు రోజురోజుకూ పెరుగుతున్నాయి. ఇక్కడ తయారయ్యే ఈ గర్రాజులను ఏపీలోని పలు ప్రాంతాలతో పాటు యూఎస్‌ఏ, గల్ఫ్‌ దేశాలకు వెళ్లే వారు ఇష్టంగా తీసుకువెళ్తుంటారు. ఇంకెందుకు ఆలస్యం మీరూ ఎప్పుడైనా కోనసీమ వైపు వెళితే, వీటిని ఓసారి టేస్ట్ చేయండి.