Bellam Appalu Recipe in Telugu :మనలో చాలా మంది స్వీట్ రెసిపీలను ఎక్కువగా ఇష్టపడుతుంటారు. అలాంటి వారికోసం ఒక స్పెషల్ స్నాక్ రెసిపీ తీసుకొచ్చాం. అదే, "కేరళ స్పెషల్ బెల్లం అప్పాలు". మీరు ఇప్పటి వరకు చాలా రకాలుగా అప్పాలు చేసుకొని ఉంటారు. కానీ, ఓసారి ఈ బెల్లం అప్పాలను ట్రై చేసి చూడండి. చాలా రుచికరంగా ఉంటాయి. చూడ్డానికి సాఫ్ట్ అండ్ స్పాంజీగా కనిపించే వీటిని పిల్లలైతే చాలా ఇష్టంగా తింటారు. పైగా చాలా తక్కువ టైమ్లో ఎవరైనా ఈ అప్పాలను ఈజీగా తయారు చేసుకోవచ్చు. మరి, ఈ సూపర్ టేస్టీ స్నాక్ రెసిపీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- బియ్యం - 1 కప్పు
- ఉడికించిన అన్నం - పావు కప్పు
- పచ్చి కొబ్బరి తురుము - పావు కప్పు
- జీలకర్ర - 1 టీస్పూన్
- బెల్లం తురుము - 1 కప్పు
- నెయ్యి - 1 టేబుల్స్పూన్
- తరిగిన పచ్చికొబ్బరి ముక్కలు - 1 కప్పు
- ఉప్పు - చిటికెడు
- యాలకుల పొడి - పావుటీస్పూన్
- బేకింగ్ సోడా - పావుటీస్పూన్
- కొబ్బరి నూనె - తగినంత
పుట్నాల పప్పుతో సూపర్ "టేస్టీ చిక్కీలు"! - ఇలా తయారు చేస్తే రుచి అద్భుతం!
తయారీ విధానం :
- ఇందుకోసం ముందుగా ఒక బౌల్లో బియ్యాన్నితీసుకొని శుభ్రంగా కడిగి, ఐదు గంటల పాటు నానబెట్టుకోవాలి.
- అనంతరం నానబెట్టిన బియ్యాన్ని వాటర్ వడకట్టి మిక్సీ జార్లోకి తీసుకోవాలి. ఆపై అందులో ఉడికించిన అన్నం, పచ్చికొబ్బరి తురుము, జీలకర్ర, కొద్దిగా వాటర్ వేసుకొని మెత్తని పిండిలా గ్రైండ్ చేసుకోవాలి. ఆ తర్వాత పిండిని ఒక మిక్సింగ్ జార్లోకి తీసుకొని పక్కన పెట్టుకోవాలి.
- ఇప్పుడు స్టౌపై సాస్ పాన్ పెట్టుకొని బెల్లంతురుము, అర కప్పు వాటర్ పోసుకొని బెల్లం పూర్తిగా కరిగే వరకు మరిగించుకోవాలి.
- బెల్లం పూర్తిగా కరిగాక మరికాసేపు మరిగించుకొని స్టౌ ఆఫ్ చేసుకోవాలి. ఆపై పాన్ని దింపి పాకాన్ని పూర్తిగా చల్లారనివ్వాలి.
- అనంతరం స్టౌపై మరో పాన్ పెట్టుకొని నెయ్యి వేసుకోవాలి. అది కరిగి కాస్త వేడయ్యాక తరిగిన పచ్చికొబ్బరి ముక్కలు వేసి గోల్డెన్ బ్రౌన్ కలర్లోకి వచ్చేంత వరకు వేయించుకోవాలి. అవి వేగాక వాటిని ఒక బౌల్లోకి తీసుకొని పక్కనుంచాలి.
- ఇప్పుడు ముందుగా గ్రైండ్ చేసుకున్న బియ్యప్పిండి మిశ్రమంలో పూర్తిగా చల్లారిన బెల్లం పాకాన్ని వేసుకొని మొత్తం కలిసేలా బాగా కలుపుకోవాలి. అయితే, పిండి మిశ్రమం మరీ గట్టిగా కాకుండా కాస్త పలుచగా ఉండేలా మిక్స్ చేసుకోవాలి.
- ఆవిధంగా మిక్స్ చేసుకున్నాక అందులో ఉప్పు, యాలకుల పొడి, బేకింగ్ సోడా వేసి ఇంగ్రీడియంట్స్ అన్నీ చక్కగా కలిసేలా కలుపుకోవాలి.
- ఆ తర్వాత వేయించి పక్కన పెట్టుకున్న కొబ్బరి ముక్కలను వేసి మరోసారి బాగా మిక్స్ చేసుకొని 5 నిమిషాల పాటు పక్కనుంచాలి.
- ఇప్పుడు స్టౌపై చిన్న గుంత కడాయి పెట్టుకొని 1 టేబుల్స్పూన్ కొబ్బరి నూనె వేసుకోవాలి. నూనె వేడయ్యాక ఒకటిన్నర గంటెలు కలిపి పెట్టుకున్న పిండి మిశ్రమం వేసుకొని మూత పెట్టి లో ఫ్లేమ్ మీద 5 నిమిషాలు ఉడికించుకోవాలి.
- ఆ తర్వాత మూత తీసి అప్పంను టర్న్ చేసి రెండో వైపూ కొద్దిసేపు కాలనివ్వాలి. ఆవిధంగా కాల్చుకున్నాక దాన్ని ప్లేట్లోకి తీసుకోవాలి. ఇలానే పిండి మొత్తాన్ని ప్రిపేర్ చేసుకొని వేడి వేడిగా సర్వ్ చేసుకుంటే చాలు. అంతే, ఎంతో రుచికరంగా ఉండే కమ్మని కేరళ స్టైల్ "బెల్లం అప్పాలు" రెడీ!
కరకరలాడే "ఎగ్ కట్లెట్స్" - నిమిషాల్లో ఇలా ప్రిపేర్ చేసుకోండి - టేస్ట్ వేరే లెవల్ అంతే!
