Brinjal Dal Fry Recipe in Telugu : ఎప్పుడూ రొటీన్ రెసిపీలే కాకుండా ఓసారి ఇలా "వంకాయ కందిపప్పు ఫ్రై" ట్రై చేయండి. అమ్మమ్మల కాలం నాటి ఈ కమ్మటి వంకాయ కూర ఇంట్లో అందరికీ చాలా బాగా నచ్చేస్తుంది. తెలిసీతెలియని పులుపుతో, కమ్మని కొబ్బరి పచ్చిమిర్చి ఘాటుతో ఎంతో రుచికరంగా ఉంటుంది ఈ కర్రీ. వేడి వేడి అన్నంలో కాస్త నెయ్యితో దీన్ని తింటుంటే కలిగే ఫీలింగ్ అద్భుతమని చెప్పుకోవచ్చు. అలాగే, పండగల టైమ్లో ఉల్లి, వెల్లుల్లి తినని వారికీ ఇది బెస్ట్ రెసిపీగా నిలుస్తుంది. మరి, ఈ సూపర్ రెసిపీకి కావాల్సిన పదార్థాలేంటి? ఎలా తయారు చేసుకోవాలో ఇప్పుడు చూద్దాం.
కావాల్సిన పదార్థాలు :
- వంకాయలు - అరకిలో
- కందిపప్పు - పావు కప్పు
- చింతపండు - ఉసిరికాయ సైజంత
- పచ్చిమిర్చి - కారానికి తగినన్ని
- పచ్చికొబ్బరి ముక్కలు - అరకప్పు
- నూనె - 3 టేబుల్స్పూన్లు
- ఆవాలు - 1 టీస్పూన్
- మినపప్పు - 1 టేబుల్స్పూన్
- శనగపప్పు - 1 టేబుల్స్పూన్
- కరివేపాకు - 2 రెమ్మలు
- కొత్తిమీర తరుగు - కొద్దిగా
ఈ పొడి కాస్త వేసి "వంకాయ ముద్ద కర్రీ" చేయండి - గుత్తి వంకాయను మించిన టేస్ట్!
తయారీ విధానం :
- ఇందుకోసం ముందుగా ఒక గిన్నెలో కందిపప్పును తీసుకొని శుభ్రంగా కడిగి, ముప్పావు కప్పు వరకు వాటర్ పోసి గంటకు పైగా నానబెట్టుకోవాలి.
- ఇక్కడ మీరు కందిపప్పుకి బదులుగా పెసరపప్పు, శనగపప్పు కూడా తీసుకోవచ్చు. అలాగే, చింతపండుని నానబెట్టుకోవాలి.
- కందిపప్పు నానేలోపు రెసిపీలోకి కావాల్సిన నీలం రంగు పొడవు వంకాయలను తీసుకొని శుభ్రంగా కడగాలి. ఆపై రెండు అంగుళాల పొడవుతో ముక్కలుగా కట్ చేసుకొని పక్కనుంచాలి.
- ఇప్పుడు స్టౌపై ఒక గిన్నెలో 400ఎంఎల్ వరకు వాటర్ తీసుకొని మరిగించుకోవాలి. వాటర్ మరుగుతున్నప్పుడు అందులో కట్ చేసి పెట్టుకున్న వంకాయ ముక్కలు, నానబెట్టిన చింతపండు నుంచి తీసిన అర కప్పు పులుసు యాడ్ చేసుకొని ఒకసారి కలపాలి.
- ఆ తర్వాత మూతపెట్టి హై-ఫ్లేమ్ మీద 3 నుంచి 4 నిమిషాల పాటు ఉడికించుకోవాలి. అంటే, వంకాయ ముక్కలు చింతపండు నీటిలో 80% వరకు ఉడకాలి. అంతేకానీ, మరీ ఎక్కువగా ఉడికించుకోవద్దు.
- ఆ విధంగా ఉడికించుకున్నాక వంకాయ ముక్కలను వాటర్ వడకట్టి ఒక బౌల్లో వేసి పక్కనుంచాలి.
- ఇప్పుడు మిక్సీ జార్ తీసుకొని అందులో పచ్చిమిర్చి, సన్నని పచ్చికొబ్బరి ముక్కలు వేసి మెత్తని పేస్ట్లా గ్రైండ్ చేసుకోవాలి.
- అనంతరం స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక ఆవాలు, మినపప్పు, శనగపప్పు వేసి తాలింపుని ఎర్రగా వేయించుకోవాలి. ఆ తర్వాత కరివేపాకు వేసి వేపుకోవాలి.
- తాలింపు వేగాక అందులో ఉడికించి పక్కన పెట్టుకున్న వంకాయ ముక్కలు, నానబెట్టిన కందిపప్పుని వాటర్ వడకట్టి వేసుకొని నెమ్మదిగా గరిటెతో కలుపుతూ 3 నుంచి 4 నిమిషాల పాటు వేయించుకోవాలి.
- ఆ తర్వాత ముందుగా మిక్సీ పట్టుకున్న పచ్చిమిర్చి కొబ్బరి పేస్ట్, ఉప్పు వేసి కలిపి మీడియం ఫ్లేమ్ మీద మధ్యమధ్యలో గరిటెతో నెమ్మదిగా కలుపుతూ కందిపప్పు మెత్తబడే వరకు కుక్ చేసుకోవాలి.
- ఇక చివర్లో కొత్తిమీర తరుగు వేసుకొని కలిపి దింపేసుకుంటే చాలు. అంతే, ఎంతో రుచికరంగా ఉండే ఆంధ్ర స్పెషల్ "వంకాయ కందిపప్పు ఫ్రై" రెడీ!
నోరూరించే తెలంగాణ స్టైల్ "వంకాయ పచ్చికారం" - వేడివేడి అన్నం, జొన్న రొట్టెల్లోకి కిర్రాక్ కాంబినేషన్!
