ఓపెన్‌ ఏఐ విజిల్​బ్లోయర్ సుచిర్‌ బాలాజీ అనుమానాస్పద మృతి- ఆరోపణలు చేసిన 3 నెలలకే!

ఓపెన్‌ ఏఐ ప్రజా వేగు సుచిర్‌ బాలాజీ (26) అనుమానాస్పద స్థితిలో మృతి - ఆలస్యంగా వెలుగులోకి వచ్చిన ఘటన - మూడు నెలల ముందు ఓపెన్ ఏఐపై బాలాజీ ఆరోపణలు

OpenAI Whistleblower Suchir Balaji Dead :ప్రముఖ టెక్ కంపెనీ చాట్​జీపీటీ మాతృ సంస్థ ఓపెన్‌ ఏఐ ప్రజా వేగు సుచిర్‌ బాలాజీ (26) అనుమానాస్పద స్థితిలో మృతి చెందారు. భారత సంతతికి చెందిన బాలాజీ అమెరికాలోని శాన్‌ఫ్రాన్సిస్కోలోని తన అపార్ట్​మెంట్​లో విగతజీవిగా కనిపించారు. నవంబర్‌ 26న అతడు మరణించగా, ఆ విషయం ఆలస్యంగా ఈ విషయం వెలుగులోకి వచ్చింది. ఈ మేరకు తాజాగా అంతర్జాతీయ మీడియా కథనాలు ప్రచురించింది. ఇది ఆత్మహత్య అయ్యి ఉండొచ్చని ప్రాథమికంగా పోలీసులు భావిస్తున్నారు. ప్రస్తుతానికి ఈ ఘటనలో ఎలాంటి అనుమానాస్పద ఆధారాలు లభ్యం కాలేదని వెల్లడించారు.

ఓపెన్ ఏఐపై సుచిర్ ఆరోపణలు
ఓపెన్‌ ఏఐ ఆపరేషన్లు, అనుసరిస్తున్న విధానాలు ఆందోళనకరంగా ఉన్నట్లు గతంలో తన రీసెర్చ్‌ ద్వారా బాలాజీ వెల్లడించారు. ఓపెన్ ఏఐ పలు కాపీరైట్​ ఉల్లంఘనలకు పాల్పడుతోందని ఆరోపణలు చేశారు. ఆ ఆరోపణలు చేసిన మూడు నెలల తర్వాత బాలాజీ మృతి చెందడం సర్వత్రా చర్చనీయాంశమైంది. బాలాజీ లింక్డిన్‌ ప్రొఫైల్ ప్రకారం 2020 నవంబర్‌ నుంచి 2024 ఆగస్టు వరకు ఓపెన్‌ ఏఐలో పని చేశారు బాలాజీ. గతంలో న్యూయార్క్‌ టైమ్స్‌తో ఈ యువ టెకీ మాట్లాడారు. సమాజానికి మేలుకంటే హాని చేసే టెక్నాలజీల కోసం ఇక ఏమాత్రం పనిచేయాలని తాను కోరుకోవడం లేదని, అందుకే ఆ సంస్థను వీడానని తెలిపారు.

ఓపెన్ ఏఐపై తీవ్ర ఆరోపణలు
2022లో ఓపెన్ ఏఐపై రచయితలు, ప్రోగ్రామర్లు, జర్నలిస్టుల తీవ్ర ఆరోపణలు గుప్పించారు. తన ప్రోగ్రామ్​ను డెవలప్ చేయడానికి ఓపెన్ ఏఐ తమ కాపీరైట్ కంటెంట్​న ఉపయోగించుకుందని ఆరోపించారు. దాంతో తన వాల్యుయేషన్​ను 150 బిలియన్ డాలర్లకు పెంచుకుందని పేర్కొన్నారు. కాగా, చాట్ జీపీటీని ట్రైన్ చేయడానికి వారి సమాచారాన్ని ఉపయోగించి, పలు వ్యాపారాలు, ఆంత్రప్రెన్యూర్లపై ఓపెన్​ ఏఐ ప్రతికూల ప్రభావం చూపించిందని అక్టోబర్ 23న న్యూయార్క్ టైమ్స్​ పత్రిక కథనంలో బాలాజీ పేర్కొన్నారు. భారత్​లో కూడా ఓపెన్ ఏఐపై కాపీరైట్ ఉల్లంఘనల కేసు నమోదైంది.