French Surgeon Raping Children : వైద్యో నారాయణో హరి అంటారు. వైద్యులు దేవుళ్లతో సమానమని అర్థం. అలాంటి పవిత్రమైన వైద్య వృత్తిలో ఉన్న సమయంలో ఓ డాక్టర్‌ అత్యంత దారుణానికి పాల్పడ్డాడు. దాదాపు 30 ఏళ్ల సర్వీసులో 299 మంది రోగులపై అత్యాచారానికి పాల్పడ్డాడు. బాధితుల్లో ఎక్కువ మంది చిన్నారులే ఉన్నారు. నిందితుడి ఇంట్లో జరిపిన సోదాల్లో 3 లక్షలకు పైగా ఫొటోలు , 650కి పైగా అశ్లీల వీడియోలు, నోట్‌బుక్స్‌ బయటపడ్డాయి. ఫ్రాన్స్‌లో ఆలస్యంగా వెలుగుచూసిన ఈ కేసులో నిందితుడైన 74 ఏళ్ల "జోయెల్‌ లి స్కౌర్నెక్‌పై" విచారణ కొనసాగుతోంది.
మత్తు మందు ఇచ్చి లైంగిక దాడి
ఫ్రాన్స్‌లోని బ్రిటానీ అనే ప్రాంతంలో నిందితుడు జోయెల్‌ ఓ ఆసుపత్రిలో సర్జన్‌గా పని చేసేవాడు. 30 ఏళ్ల పాటు తన వద్దకు వచ్చే రోగులపై దారుణాలకు పాల్పడ్డాడు. వారికి మత్తు మందు ఇచ్చి లైంగిక దాడి చేసేవాడు. ఇన్నేళ్లు ఈ దారుణాలు కొనసాగినా, అతడి అకృత్యాలు 2017లో బయటపడ్డాయి. తన పొరుగింట్లో ఉన్న ఓ ఆరేళ్ల చిన్నారిపై అసభ్యంగా ప్రవర్తించడం వల్ల జోయెల్‌పై కేసు నమోదైంది. దర్యాప్తు నిమిత్తం పోలీసులు అతడి ఇంట్లో సోదాలు చేపట్టగా ఏకంగా 3 లక్షలకు పైగా ఫొటోలు బయటపడ్డాయి. 650లకు పైగా అశ్లీల వీడియోలు, నోట్‌బుక్స్‌ను కూడా గుర్తించారు.
చిన్నారులే టార్గెట్
చిన్నారులకు ఎక్కువగా ఆకర్షితుడై శృంగార కార్యకలాపాలు నెరిపినట్లు అతడి డైరీల్లో ఉండటం చూసి అధికారులు ఆశ్యర్యపోయారు. ఎవరెవరిపై లైంగిక దాడి జరిపాడో ఆ వివరాలను ఈ మాజీ సర్జన్‌ ఎప్పటికప్పుడు నోట్‌ చేసుకున్నట్లు గుర్తించారు. ఆ ఘటన తర్వాత మరో నలుగురు చిన్నారులు కూడా అతడి బాధితులని తేలారు. దీనితో 2020లో కోర్టు జోయెల్‌ను దోషిగా తేల్చి 15 ఏళ్ల జైలు శిక్ష విధించింది. ఈ కేసును మరింత లోతుగా దర్యాప్తు చేయగా, అతడి పాపాల చిట్టా బయటపడింది. బాధితుల్లో చాలా మందికి తాము అత్యాచారానికి గురైన విషయం కూడా తెలియదు. జోయెల్‌ డైరీలో తమ పేర్లను చూసే ఈ విషయం తెలుసుకున్నామని బాధితులు ఆవేదన వ్యక్తంచేస్తున్నారు.
అబ్బాయిలను కూడా వదల్లేదు!
నాలుగు నెలలుగా ఈ కేసులో విచారణను ముమ్మురం చేయగా, తాజాగా అతడు కోర్టులో నేరాన్ని అంగీకరించాడు. 1989 నుంచి 2014 మధ్య 158 మంది అబ్బాయిలు, 141 మంది అమ్మాయిలపై అత్యాచారానికి పాల్పడినట్లు న్యాయస్థానంలో తెలిపాడు. ఆ సమయంలో బాధితుల వయస్సు సగటున 11 ఏళ్లుగా ఉన్నట్టు తెలుస్తోంది. తాను చాలా క్రూరమైన పనులు చేశానని, ఆ పిల్లల మనసుకు అయిన ఈ గాయం ఎన్నటికీ మానదని తెలిసినా అలా ప్రవర్తించాని పేర్కొన్నాడు. ఈ చర్యలకు పూర్తి బాధ్యత వహిస్తున్నట్టు తెలిపాడు. కొన్ని ఘటనలు మాత్రం గుర్తు లేవని చెప్పాడు. ప్రస్తుతం ఈ కేసుపై విచారణ కొనసాగుతోంది. ఒకవేళ అతడిని దోషిగా తేలిస్తే మరో 20 ఏళ్లు శిక్ష పడే అవకాశం ఉన్నట్లు తెలుస్తోంది. ఫ్రాన్స్‌లో మహిళలు, చిన్నారులపై అఘాయిత్యాలను అరికట్టేందుకు కఠినమైన చట్టాలు తీసుకురావాలని సామాజికవేత్తలు ఆందోళన నిర్వహిస్తున్నారు.
