ఎట్టకేలకు తల్లి వద్దకు నావల్నీ మృతదేహం- చనిపోయాక కూడా చిత్రహింసే!

Alexei Navalny Dead Body : రష్యా ప్రతిపక్ష నేత అలెక్సీ నావల్నీ మృతదేహాన్ని ఎట్టకేలకు ఆయన తల్లికి అప్పగించారు. ఈ విషయాన్ని నావల్నీ అనుచరుడు సోషల్ మీడియాలో వెల్లడించారు. మృతదేహం అప్పగించేలా రష్యా ప్రభుత్వంపై ఒత్తిడి తెచ్చినవారికి ఆయన కృతజ్ఞతలు తెలిపారు.

Alexei Navalny Dead Body :రష్యా ప్రతిపక్ష నాయకుడు అలెక్సీ నావల్నీ మృతదేహాన్ని ఎట్టకేలకు ఆయన తల్లికి అప్పగించింది ఆ దేశ ప్రభుత్వం. ఈ విషయాన్ని నావల్నీ అనుచరుడు, ఆయనకు సంబంధించిన అవినీతి నిరోధక ఫౌండేషన్ డైరెక్టర్ ఇవాన్ జ్దానోవ్ సోషల్ మీడియా వేదికగా వెల్లడించారు. మృతదేహం అప్పగింతకు రష్యాపై ఒత్తిడి తెచ్చినవారికి కృతజ్ఞతలు తెలిపారు.

అలెక్సీ నావల్నీ నివాళులు అర్పించిన అభిమానులు

'క్రైస్తవ మతాన్ని పుతిన్ కించపరుస్తున్నారు'
ఇటీవల ఆర్కిటిక్‌ ప్రాంతంలోని ఒక జైలులో అనుమానాస్పద పరిస్థితుల్లో నావల్నీ ప్రాణాలు కోల్పోయారు. అయితే ఆయన మృతదేహాన్ని అక్కడే రహస్యంగా సమాధి చేయడానికి ఒప్పుకోవాల్సిందిగా ఆయన తల్లిపై రష్యా అధ్యక్షుడు వ్లాదిమిర్‌ పుతిన్‌ ఒత్తిడి తెస్తున్నారని నావల్నీ భార్య యూలియా నావల్నయా మొదట ఆరోపించారు. పుతిన్‌ తన చర్యలతో మతాన్ని కించపరుస్తున్నారని ఓ వీడియోలో యూలియా విమర్శలు గుప్పించారు. నావల్నీ మృతదేహం ఇప్పటికే కుళ్లిపోవడం ఆరంభించినందున, వెంటనే ఖననం చేయడానికి ఒప్పుకోవాలని ఆయన తల్లిని అధికారులు వేధిస్తున్నారని ఆమె తెలిపారు.

అలెక్సీ నావల్నీ నివాళులు అర్పించిన అభిమానులు

'నావల్నీని చనిపోయాక కూడా చిత్రవధ చేస్తున్నారు'
తన భర్త నావల్నీని బతికుండానే కాకుండా చనిపోయిన తరవాత కూడా చిత్రవధ చేస్తున్నారని యూలియా ఆవేదన వ్యక్తం చేశారు. ఆయన మృతదేహాన్ని అవహేళన చేస్తున్నారనీ అన్నారు. నావల్నీ మృతదేహాన్ని వెంటనే అప్పగించాలని డిమాండ్‌ చేశారు. ఆ తర్వాత కాసేపటికే మృతదేహం అప్పగింత సమాచారం వెలుగుచూసింది. నావల్నీ అంత్యక్రియలు జరగాల్సి ఉంది. అయితే నావల్నీ మృతికి పుతిన్‌ కారకుడన్న ఆరోపణల్ని రష్యా అధ్యక్ష భవనం ఖండించింది.

అలెక్సీ నావల్నీ నివాళులు అర్పించిన అభిమానులు

అలెక్సీ నావల్నీ (47) ఈ నెల 16న ఆర్కిటిక్ పీనల్​ కాలనీ జైలులో అనుమాదస్పద స్థితిలో మరణించారు. సడెన్‌ డెత్‌ సిండ్రోమ్‌ వల్లే మృతిచెందారని జైలు అధికారులు తెలిపారు. అయితే జైల్లో హింసించి చంపేశారని నావల్నీ మద్దతుదారులు ఆరోపిస్తున్నారు. అంతేకాకుండా నావల్నీని 'కేజీబీ వన్‌-పంచ్‌' టెక్నిక్‌తో చంపేసుంటారన్న అనుమానాలు కూడా వ్యక్తం అవుతున్నాయి. రష్యా గూఢచార సంస్థ 'కేజీబీ' ప్రత్యర్థులను మట్టుబెట్టేందుకు ఈ టెక్నిక్​ను ఉపయోగిస్తుంది.

అలెక్సీ నావల్నీ నివాళులు అర్పించిన అభిమానులు

ప్రపంచవ్యాప్తంగా నావల్నీ గుర్తింపు
రష్యాలో అవినీతికి వ్యతిరేకంగా పోరాడిన నేతగా నావల్నీకి పేరుంది. ముఖ్యంగా రష్యా ప్రభుత్వం, పుతిన్‌కు వ్యతిరేకంగా చేసిన ఆందోళనల వల్ల ప్రపంచవ్యాప్తంగా నావల్నీ గుర్తింపు పొందారు. రష్యాలో ప్రభుత్వ ఉన్నతాధికారుల అవినీతిని బయటపెట్టిన నావల్నీ, రష్యా అధ్యక్షుడు పుతిన్‌కు వ్యతిరేకంగా నిరసన చేపట్టారు. అధ్యక్ష ఎన్నికల్లో పుతిన్‌పై పోటీ చేయడం వల్ల దేశవ్యాప్తంగా ఆయనకు ఆదరణ లభించింది. గతంలో పలుమార్లు జైలుకు వెళ్లి వచ్చారు. ఈ పూర్తి వార్త కోసం ఇక్కడ క్లిక్ చెయ్యండి.