నిద్ర ఒక్కటే కాదు కళ్ల కింద డార్క్ సర్కిల్స్​కు ఇవీ కారణాలే!​ - ఈ చిట్కాలు పాటిస్తే వెంటనే క్యూర్​! - Dark Circles Causes and Treatment

Dark Circles Causes: కళ్ల కింద ఏర్పడే నల్లటి వలయాలు మన అందాన్ని దెబ్బతీస్తాయనడంలో ఎటువంటి సందేహాం లేదు. అందుకే వీటిని మాయం చేయడానికి ఎన్నో రకాల ప్రయత్నాలు చేస్తుంటారు. క్రీములు, లోషన్​లు, లేపనాలు ముఖానికి పట్టిస్తుంటారు. అయితే, వీటికన్నా ముందు అసలు నల్లటి వలయాలు ఎందుకు వస్తున్నాయి అన్న విషయాన్ని పసిగట్టి.. దానికి అనుగుణంగా చికిత్స తీసుకుంటే మంచి ఫలితం ఉంటుందని చెబుతున్నారు వైద్యులు.

Dark Circles Causes and Treatment:మానవ శరీరంలో కళ్లు ఎంతో కీలకమైనవి. ఇవి మన అందాన్ని ఎంతగానో పెంచుతాయి. అయితే, అలాంటి ముఖ్యమైన కళ్ల కింద ఏర్పడే నల్లటి వలయాలు మాత్రం మన అందాన్ని తగ్గిస్తాయి. చాలా మంది చాలినంత నిద్ర లేనప్పుడు, తరచూ తీవ్రమైన ఒత్తిడి, డిప్రెషన్​తో సమతమతమవుతున్నప్పుడు కళ్ల కింద నల్లటి వలయాలు ఏర్పడుతుంటాయని అనుకుంటారు. అయితే, వీటిలో కొంతమేర నిజం ఉన్నా.. కేవలం ఇవి మాత్రమే కాకుండా కంట్లో ఏమైనా ఇన్​ఫెక్షన్లు ఉన్నప్పుడు.. చర్మవ్యాధులు, రక్తహీనత, విటమిన్ల లోపం ఉన్నప్పుడు, ఏదైనా దీర్ఘకాలిక సమస్యతో బాధపడుతున్నప్పుడు, తరచూ డీహైడ్రెషన్​ అవుతున్నప్పుడు, వయసు పైబడినప్పుడు కూడా ఇలాంటి నల్లటి వలయాలు వస్తాయని ప్రముఖ డెర్మటాలజిస్ట్​ డాక్టర్ పీఎల్​ చంద్రావతి చెబుతున్నారు. ఈ నేపథ్యంలోనే డార్క్​ సర్కిల్​కు కారణాలు? తగ్గడానికి తీసుకోవాల్సిన జాగ్రత్తలు ఏంటో ఈ స్టోరీలో తెలుసుకుందాం.

డార్క్ సర్కిల్స్​కు కారణాలు

• రాత్రి పూట సరిగ్గా నిద్రపోకపోవడం
• రక్తహీనత సమస్య
• కళ్ల చుట్టూ దురద, అలర్జీలు
• కళ్లు లోతుగా, చర్మం పలచగా ఉండడం
• వంశపారపర్యంగా
• మద్యపానం
• ధూమపానం
• ఎండలో ఎక్కువగా తిరగడం
• గంటల తరబడి చదవడం
• టీవీలు ఎక్కువగా చూడడం
• కంప్యూటర్​, స్మార్ట్​ఫోన్​ లాంటి ఎలక్ట్రానిక్ వస్తువుల అధిక వినియోగం

డార్క్ సర్కిల్స్​కు తీసుకోవాల్సిన జాగ్రత్తలు:కంటి కింద నల్లటి వలయాలను మాయం చేయడానికి మనలో చాలా మంది అనేక ప్రయత్నాలు చేస్తుంటారు. మార్కెట్​లో దొరికే క్రీములు, లోషన్​లు పట్టిస్తుంటారు. అయితే, వీటిలో ఫోజిక్ యాసిడ్, అర్బూటిన్​ పదార్థాలు ఉన్న క్రీములు కొంత ఫలితానిస్తాయని వైద్యులు చెబుతున్నారు. ఇవే కాకుండా కళ్ల కింద నల్లటి వలయాలు తగ్గడానికి కొన్ని జాగ్రత్తలు తీసుకోవాలని సూచిస్తున్నారు. అవేంటో ఇప్పుడు తెలుసుకుందాం.

• కళ్లకు సరైన విశ్రాంతి ఇవ్వాలి.
• మానసిక ఒత్తిడి, ఆందోళన తగ్గించుకోవాలి.
• కళ్లను ఎక్కువగా నలపకూడదు.
• కళ్లద్దాలు ధరించి బయటకు వెళ్లాలి.
• పొడి చర్మం ఉన్నవారు మాయిశ్చరైజర్​ రాసుకోవాలి.
• గులాబి రేకుల రసాన్ని కళ్లకు పట్టించాలి.
• పుచ్చకాయ, స్టాబెర్రీ గుజ్జును నల్లటి వలయాలపై రాయాలి.
• అనాస రసంలో ముంచిన దూదితో నల్లటి వలయంపై రుద్దాలి.
• బంగాళదుంప, కీర దోసలను సన్నగా తరిగి కళ్లపై ఉంచుకోవాలి.

కళ్ల కింద నలుపును, నల్లటి వలయాలను మాయం చేయడానికి ఆధునిక వైద్యంలో చాలా చికిత్స విధానాలు అందుబాటులో ఉన్నాయని డాక్టర్​ చెబుతున్నారు. ఇందులో సాధారణ చికిత్స నుంచి లేజర్​ చికిత్స, సర్జరీ వంటి అధునాతన చికిత్సలు ఉన్నాయనన్నారు. కంటికి సంబంధించిన అలర్జీలు ఉన్నప్పుడు నిర్లక్ష్యం చేయకుండా వైద్య చికిత్స తీసుకోవాలని వివరిస్తున్నారు. ఎండ మూలంగా నల్లటి వలయాలు వస్తున్నప్పుడు కళ్లకు అద్దాలు, తలకు టోపీలు ధరించాలని సూచిస్తున్నారు.

NOTE :ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.