పిల్లలు తప్పిపోతే పేరెంట్స్​కు లైవ్ లొకేషన్- హోమ్​వర్క్ చేయకపోతే రిమైండర్- స్మార్ట్​బ్యాగ్​ విశేషాలివే - Students Smart Tracking Bag

Smart Tracking Bag For Students : స్కూల్​ పిల్లలకు రక్షణగా స్మార్ట్ బ్యాగ్​ను రూపొందించాడు ఓ బీటెక్ విద్యార్థి. పిల్లలు స్కూల్​ నుంచి ఇంటికి రాకపోయినా, తప్పిపోయినా వారి సమాచారాన్ని తల్లిదండ్రులకు అందిస్తుందీ ఈ బ్యాంగ్. అలాగే హోమ్​వర్క్ చేయమని విద్యార్థులను అలర్ట్ చేస్తుంది. ఇంతకీ ఆ బ్యాగ్ ఎలా పనిచేస్తుంది? దాని ధర ఎంతో ఈ స్టోరీలో తెలుసుకుందాం.

Smart Tracking Bag For Students : విద్యార్థుల కోసం స్మార్ట్ ట్రాకింగ్ బ్యాగ్​ను తయారుచేశాడు ఉత్తర్​ప్రదేశ్​లోని గోరఖ్​పుర్ ఇన్​స్టిట్యూట్ ఆఫ్ టెక్నాలజీ అండ్ మేనేజ్​మెంట్​కు చెందిన విద్యార్థి అన్షిత్. ఈ బ్యాగ్ పిల్లల లొకేషన్​ను ట్రాక్​ చేస్తుంది. పిల్లలు పాఠశాల నుంచి ఇంటికి రాకపోయినా, తప్పిపోయినా తల్లిదండ్రులకు అలర్ట్​ చేస్తుంది. అంతేకాకుండా, హోమ్​వర్క్​ గురించి విద్యార్థులకు గుర్తుచేస్తుంది.

స్మార్ట్ బ్యాగ్​తో అన్షిత్ (ETV Bharat)

సాధారణంగా ఉండే బ్యాగ్​లకు మాదిరిగానే ఈ స్మార్ట్​ ట్రాకింగ్ బ్యాగ్​లను తయారు చేశాడు అన్షిత్. పిల్లలు స్కూల్​కు వెళ్లినప్పుడు తప్పిపోకుండా ఉండేందుకు ఈ స్మార్ట్​ బ్యాగ్​ చక్కగా ఉపయోగపడుతుంది. బ్లూటూత్​ ద్వారా తల్లిదండ్రల మొబైల్​ఫోన్స్​కు ఈ బ్యాగ్​ కనెక్ట్ అవడం వల్ల, పిల్లలు స్కూల్​కు కాకుండా ఎక్కడికైనా వెళ్లినా, తప్పిపోయినా తెలిసిపోతుంది. ఈ బ్యాగ్​ విద్యార్థల రక్షణకు మాత్రమే కాకుండా వారు చేయాల్సిన హోమ్​వర్క్​గురించి రిమైండర్స్​ ఇస్తుందని అన్షిత్ తెలిపాడు.

స్మార్ట్ బ్యాగ్​లను తయారు చేస్తున్న అన్షిత్ (ETV Bharat)

"పిల్లల భద్రత దృష్ట్యా స్మార్ట్ ట్రాకర్ బ్యాగ్​ను తయారుచేశాను. దీని ట్రయల్స్ కూడా ప్రారంభమయ్యాయి. త్వరలో మార్కెట్లోకి విడుదల చేసేందుకు సన్నాహాలు చేస్తున్నాం. దీని ధర దాదాపు రూ.4 వేలు ఉంటుంది. ఇది సాధారణ బ్యాగ్​లతో పోలిస్తే రూ. 1000-రూ.1500 వరకు ఎక్కువగా ఉంటుంది. ఈ స్మార్ట్ ట్రాకింగ్ బ్యాగ్ తయారీలో జీపీఎస్ మాడ్యూల్, జీఎస్ఎం మాడ్యూల్, 3.7 వోల్ట్ బ్యాటరీ, సిమ్ కార్డ్​ను ఉపయోగించాను. ఈ బ్యాగ్​తో విద్యార్థుల లైవ్​ లొకేషన్​ వాళ్ల తల్లిదండ్రులకు తెలుస్తుంది. విద్యార్థి పాఠశాలకు వెళ్లకుండా వేరే చోటికి వెళ్లినా తెలిసిపోతుంది."

-అన్షిత్, బీటెక్ విద్యార్థి

చిన్న చిన్న ఆలోచనలతోనే విద్యార్థులు స్టార్టప్‌ను ప్రారంభించవచ్చని గోరఖ్​పుర్ కళాశాల డైరెక్టర్ డాక్టర్ ఎన్‌కే సింగ్, మీడియా ఇంఛార్జ్ డాక్టర్ మనోజ్ మిశ్రా తెలిపారు. యువత వ్యాపార ఆలోచనలు ప్రజలకు ఉపాధిని కూడా కల్పిస్తాయని అభిప్రాయపడ్డారు. విద్యార్థులను స్టార్టప్‌లు స్థాపించేందుకు ప్రోత్సహిస్తామని పేర్కొన్నారు. తద్వారా వారు సొంతంగా వ్యాపారాన్ని ప్రారంభించి స్వావలంబన పొందుతారని వెల్లడించారు. మరోవైపు, స్మార్ట్​బ్యాగ్​ను​ రూపొందించిన అన్షిత్​ను గోర్​ఖ్​పుర్ కళాశాల యజమాన్యం అభినందించింది.