Darshan Renuka Swamy:రేణుకా స్వామి హత్య కేసులో సంచలన విషయాలు ఒక్కొక్కటిగా బహిర్గతం అవుతున్నాయి. ఇప్పటికే ఈ కేసులో ప్రముఖ హీరో దర్శన్, నటి పవిత్ర గౌడను అదుపులోకి తీసుకుని విచారిస్తున్నారు. అయితే రేణుకా స్వామి మృతి కేసులో పోస్టుమార్టం రిపోర్ట్‌లో మరిన్ని దిగ్భ్రాంతికర విషయాలు వెల్లడయ్యాయి. భీకర దాడి కారణంగానే రేణుకా స్వామి మరణించాడని పోస్ట్‌మార్టం నివేదిక వెల్లడించింది. ఈ కేసును విచారిస్తున్న మాక్షిపాళ్య స్టేషన్‌ పోలీసులు రిమాండ్‌ పిటిషన్‌లో కీలక విషయాలను పేర్కొన్నారు. ఈ రిమాండ్‌ పిటిషన్‌లో రేణుకా స్వామి మృతికి కారణాలను వైద్యులు చాలా స్పష్టంగా పేర్కొన్నట్లు పోలీసులు పేర్కొన్నారు.
తీవ్ర రక్తస్రావం!
కరెంట్ షాక్‌తో పాటు తీవ్రంగా దాడి చేయడం వల్ల అంతర్గతంగా రక్తస్రావమై రేణుకా స్వామి మరణించినట్లు పోస్టుమార్టం నివేదికలో వైద్యులు పేర్కొన్నారు. తీవ్ర గాయాలు, విద్యుత్‌ షాక్, అంతర్గత రక్తస్రావం వల్ల రేణుకా స్వామి మరణించినట్లు డాక్టర్లు సమర్పించిన నివేదికలో పేర్కొన్నారని వైద్యులు తెలిపారు. మృతదేహాన్ని ఫోరెన్సిక్ సైన్స్ లేబరేటరీకి తరలించి ఆ నివేదిక కోసం ఎదురుచూస్తున్నట్లు పోలీసులు పిటిషన్‌లో పేర్కొన్నారు. రేణుకా స్వామి హత్యకు గురైన పట్టానగర్‌లోని షెడ్డుకు కాపలాగా ఉన్న సెక్యూరిటీ గార్డును విచారించిన పోలీసులు అతని వాంగ్మూలాన్ని నమోదు చేశారు. CRPC-164 కింద కోర్టులో అతడి వాంగ్మూలం రికార్డు చేశారు.
ఫోన్ల కోసం గాలింపు
రేణుకా స్వామి హత్య అనంతరం నిందితులు పారేసిన మొబైల్ ఫోన్లను గుర్తించేందుకు పోలీసులు, అగ్నిమాపక, అత్యవసర సేవల సిబ్బంది సహాయాన్ని కోరారు. మొబైల్ కోసం పోలీసులు తీవ్రంగా గాలిస్తున్నారు. హత్యకు గురైన రేణుకాస్వామి, నిందితుడు రాఘవేంద్ర ఫోన్లు గత 11 రోజులుగా కనపడక పోవడం వల్ల ఆ ఫోన్లను కనుగొనడానికి అగ్నిమాపక సిబ్బంది సాయం కోరినట్లు పోలీసులు తెలిపారు. నిందితుడి ఫోన్‌లో రేణుకాస్వామిపై దాడి చేసేటప్పుడు వీడియో ఉందని పోలీసులు అనుమానిస్తున్నారు. పట్టనగెరెలోని షెడ్డులో ఉన్న రేణుకాస్వామిపై రాఘవేంద్ర దాడి చేశాడు. రేణుకాస్వామి ఫోన్‌లో ఇంకా ఏమైనా ఆధారాలు ఉండే అవకాశం ఉందని పోలీసులు అనుమానిస్తున్నారు.