వాష్​రూమ్​ నుంచి వస్తుండగా వెనుక నుంచి హగ్​- వేధింపులు మితిమీరాయ్​!: మాలీవుడ్ నటి - Sexual Assault Allegations Case

Kerala Sexual Assault Allegations Case : జస్టిస్ హేమ కమిటీ నివేదిక మలయాళీ చిత్ర పరిశ్రమను కుదిపేస్తుండగా తాజాగా మరో నటి ప్రముఖ నటుడు జయసూర్యతో పాటు మరో ముగ్గురు నటులపై లైంగిక వేధింపుల ఆరోపణలు చేశారు. 2013లో ఓ సినిమా చిత్రీకరణ సమయంలో జయసూర్య తన సమ్మతి లేకుండా ముద్దు పెట్టుకుని కౌగిలించుకున్నట్లు ఓ జాతీయ ఛానల్‌కు ఇచ్చిన ఇంటర్వ్యూలో తెలిపారు. మలయాళీ మూవీ ఆర్టిస్ట్ అసోసియేషన్‌లో సభ్యత్వం కోసం అసోసియేషన్ సెక్రటరీ ఇడవేల బాబు దగ్గరకు వెళితే లైంగికంగా వేధించినట్లు ఆరోపించారు.

Kerala Sexual Assault Allegations Case :మలయాళ చిత్ర పరిశ్రమలో మహిళలు ఎదుర్కొంటున్న ఇబ్బందికర పరిస్థితుల గురించి జస్టిస్‌ హేమ కమిటీ ప్రభుత్వానికి నివేదిక ఇవ్వగా బాధితులు ఒక్కొక్కరిగా బయటకు వస్తున్నారు. కాస్టింగ్‌ కౌచ్‌ మొదలు వివక్ష వరకు మాలీవుడ్‌లో మహిళలు పలు సమస్యలు ఎదుర్కొంటున్నారని జస్టిస్‌ హేమ కమిటీ నివేదిక పేర్కొంది. ఈ నివేదిక కేరళ ప్రభుత్వానికి చేరగానే పలువురు నటీమణులు బయటకు వచ్చి తమకు ఎదురైన చేదు అనుభవాలను మీడియాకు వెల్లడించారు.

మూత్రశాలకు వెళ్లి వస్తుండగా!
నలుగురు సహచర నటులు తనను లైంగికంగా వేధించి, దూషించారని ఓ నటి జాతీయ మీడియాకు ఇచ్చిన ఇంటర్వ్యూలో ఆరోపించారు. ఓ సినిమా చిత్రీకరణ సమయంలో జయసూర్య కారణంగా చేదు అనుభవం ఎదురైందని తెలిపారు. మూత్రశాలకు వెళ్లి వస్తుండగా ప్రముఖ నటుడు జయసూర్య వెనక నుంచి వచ్చి తనను కౌగలించుకొని, ముద్దు పెట్టాడని ఆరోపించారు. ఆ ఘటన జరిగిన వెంటనే అక్కడి నుంచి వెళ్లిపోయానని ఆమె చెప్పారు. తనతో ఉంటే ఎక్కువ అవకాశాలు కల్పిస్తానని జయసూర్య ఆ తర్వాత చెప్పాడని ఆమె వెల్లడించారు.

నివాసానికి వెళితే శారీరకంగా!
మలయాళీ మూవీ ఆర్టిస్ట్ అసోసియేషన్‌లో సభ్వత్వం గురించి అసోసియేషన్ సెక్రటరీ ఇడవేల బాబును సంప్రదిస్తే ఇంటికి రమ్మని చెప్పాడని మలయాళీ నటి ఆరోపించారు. ఆయన నివాసానికి వెళితే శారీరకంగా వేధించాడని ఆమె ఆరోపణలు చేశారు. నటుడు, సీపీఎం పార్టీకి చెందిన ఎమ్మెల్యే ఎం.ముకేశ్‌, మణియన్‌పిళ్ల రాజుపై కూడా ఆమె ఈ తరహా ఆరోపణలు చేశారు. అన్నింటినీ తట్టుకుని సినిమా కోసం పని చేయాలని నిర్ణయించుకున్నప్పటికీ వారి వేధింపులు మితిమీరాయని వెల్లడించారు. మలయాళం చిత్ర పరిశ్రమను వదిలి చెన్నైకు వెళ్లిపోయేలా చేశారని చెప్పారు. ఈ సంఘటన వల్ల తాను మానసికంగా ఎంతో కుంగిపోయానని, న్యాయం జరగాలని కోరుకుంటున్నానని వెల్లడించారు. వారు చేసిన పనికి తగిన శిక్ష అనుభవించాలని ఆమె పేర్కొన్నారు.

ఆరోపణల వెనుక స్వార్థ ప్రయోజనాలు!
మలయాళీ నటి ఆరోపణలపై నటుడు మణియన్‌పిళ్ల రాజు స్పందించారు. ఆమె ఆరోపణల వెనుక స్వార్థ ప్రయోజనాలు ఉన్నాయని వ్యాఖ్యానించారు. కొంతమంది పరిస్థితులను వాడుకోవడానికి ప్రయత్నిస్తారని అన్నారు. ఆమె ఆరోపించిన వ్యక్తుల్లో అమాయకులతో పాటు నిందితులు ఉంటారని చెప్పారు. ఆమె ఆరోపణలపై ప్రభుత్వం విచారణ చేపట్టాలని కోరారు. అటు జస్టిస్ హేమ కమిటీ ఇచ్చిన నివేదికపై విచారణ చేపట్టాలని కేరళ ప్రభుత్వం నిర్ణయించింది. ఇందుకోసం ఏడుగురు సభ్యులతో సిట్‌ను ఏర్పాటు చేసింది.

జస్టిస్ హేమ కమిటీ తన నివేదికలో సంచలన విషయాలను వెల్లడించింది. కొంత మంది నటులు, నిర్మాతలు, దర్శకులు మద్యం తాగి నటీమణులు బస చేస్తున్న గది వద్దకు వెళ్లి శృంగారం కోసం తలుపులు తట్టేవారని పేర్కొంది. సెక్స్‌కు అంగీకరించని వారిని ఇబ్బందులకు గురిచేసి, వేధించేవారని కమిటీ తన నివేదికలో పేర్కొంది. దీని వెనుక పెద్ద మాఫియా ఉందని తెలిపింది. ఓ నటి వేధింపుల గురించి ఫిర్యాదు చేస్తే ఓ దర్శకుడు ముద్దు సీన్‌ను 17 సార్లు తీసి సదరు నటిని ఇబ్బందులకు గురిచేశాడని ఆరోపించింది. షూటింగ్ ప్రదేశాలలో మహిళలు దుస్తులు మార్చుకునేందుకు ప్రత్యేక గదులు, మూత్రశాలలను కూడా నిర్మాతలు ఏర్పాటు చేయలేదని తెలిపింది. అయితే కేరళ ప్రభుత్వం 2017 నవంబరులో జస్టిస్ హేమ కమిటీని ఏర్పాటు చేసింది. మలయాళ చిత్ర పరిశ్రమలో మహిళలు ఎదుర్కొంటున్న సమస్యలు గురించి నివేదిక సిద్ధం చేయాలని ఆదేశించింది.