How to Make Puri in Hotel Style : హోటల్లో పూరీ తింటే ఎలా ఉంటుందో అందరికీ తెలుసు. చక్కగా ఉబ్బుతాయి. ఇంకా మెత్తగా కూడా ఉంటాయి. కానీ.. ఇంట్లో పూరీలు తయారు చేస్తే మాత్రం తేడాగా ఉంటాయి. సరిగా పొంగవు. మెత్తగా కూడా ఉండవు. ఇంకా.. రొట్టెల్లా గట్టిపడతాయి. మరి.. ఎందుకిలా? హోటల్లో మాదిరిగా మన ఇంట్లో పూరీలు కూడా చక్కగా పొంగుతూ రావాలంటే ఏం చేయాలి? అన్నది ఇప్పుడు చూద్దాం.
మైదా..
పూరీలు మెత్తగా ఉబ్బుతూ రావాలంటే.. ఎలాంటి పిండిని సెలక్ట్ చేసుకుంటున్నాం అనేది ముఖ్యమని ప్రముఖ షెఫ్స్ సూచిస్తున్నారు. పూరీలు తయారు చేయడానికి గోధుమతోపాటుగా మైదా పిండిని కూడా వాడాల్సి ఉంటుంది. అయితే.. ఏ పిండి ఎంత వాడుతున్నామన్నది చాలా ముఖ్యమని అంటున్నారు. మొత్తం పిండిలో పావు వంతు మైదా పిండి ఉండేలా చూసుకోవాలని సూచిస్తున్నారు. అంటే.. ఉదాహరణకు కేజీ పిండితో మీరు పూరీలు చేయాలని అనుకుంటే.. అందులో 750 గ్రాములు గోధుమ పిండి ఉండాలని, మిగిలిన 250 గ్రాములు మైదా పిండి ఉండాలని సూచిస్తున్నారు. ఇలా పిండి మిక్స్ చేసినప్పుడు పూరీలుగా మెత్తగా, పొంగుతూ వస్తాయని చెబుతున్నారు.
చక్కెర..
చాలా మందికి తెలియని విషయం ఏమంటే.. పూరీల తయారీలో కాస్త చక్కెర కూడా వినియోగిస్తారు. పూరీలు బెలూన్ మాదిరిగా ఉబ్బుతూ రావడానికి చక్కెర ఎంతో ఉపయోగపడుతుందని చెబుతున్నారు. మరి.. ఈ పంచదార ఎంత వేయాలి అన్నప్పుడు.. ఉదాహరణకు ఒక కప్పు పూరీ పిండి తీసుకుంటే.. అందులో హాఫ్ స్పూన్ చక్కెర కలుపుకోవాలని సూచిస్తున్నారు. దీనివల్ల పూరీలు చక్కగా ఉబ్బడమే కాదు.. మంచి బంగారు రంగులో కూడా వస్తాయి.
సెమోలినా..
సెమోలినా కూడా కాస్త కలుపుకుంటే బాగుంటుంది. సెమోలినా అంటే.. గోధుమల నుంచి తయారైన ఒకరకమైన పిండి. ఇది కూడా సూపర్ మార్కెట్లో దొరుకుతుంది. గోధుమ, మైదా పిండి కలుపుకునేటప్పుడే దీన్ని కూడా కాస్త వేసుకుంటే సరిపోతుంది. ఒక కప్పు గోధుమ పిండిలో రెండు స్పూన్ల సెమోలినా వేస్తే సరిపోతుంది. ఇది వేసుకొని పిండిని చక్కగా కలిపి పూరీలు తయారు చేసుకోవాలి.