Kolkata Doctor Murder Case :బంగాల్‌ హత్యాచార ఘటనలో ఇప్పటివరకు వెలుగులోకి వచ్చిన విషయాలను పోలీసులు తోసిపుచ్చుతున్నారు. ఈ మేరకు ఆ విషయాల స్పష్టతనిచ్చారు. మృతురాలి కటిభాగంలోని ఎముకలో పగుళ్లు వచ్చినట్లు సోషల్ మీడియాలో ప్రచారం జరుగుతోందని ఆ విషయంలో ఎటువంటి నిజం లేదన్నారు. మెజిస్ట్రేట్‌ ఎదుట చేసిన శవపరీక్షకు సంబంధించిన వీడియోలో ఎటువంటి ఫ్రాక్చర్‌ గురించిన వివరాలు ప్రస్తావించలేదని పోలీసులు స్పష్టం చేశారు.
సామాజిక మధ్యమంలో విస్తృతంగా తిరుగుతున్న మరో వార్త మృతురాలి శరీరంలో 150 మిల్లీగ్రాముల వీర్యం ఉందని, ఈ నేపథ్యంలో సాముహిక అత్యచారం జరిగినట్లు కథనాలు వెలువడ్డాయి. కోల్కతా హైకోర్టులో మృతురాలి కుటుంబం దాఖలు చేసిన పిటిషనే ఈ సమాచారానికి మూలమని పలు కథనాలు ఉటంకించాయి. ఈ వార్తలను పోలీసు ఉన్నతాధికారులు ఖండించారు. ఈ సమాచారం సామాజిక మధ్యమాల్లో విస్తృతంగా తిరగడంపై విస్మయం వ్యక్తం చేశారు. ఇటువంటి వార్తలను ప్రచారం చేసి ప్రజలను గందరగోళానికి గురిచేస్తున్నారని మండిపడ్డారు.
జూనియర్‌ డాక్టర్ మృతిని అసహజ మరణంగా నమోదు చేయడంపై పోలీసులు స్పష్టం చేశారు. ఈ కేసును అసహజ మరణం కింద నమోదు చేసి దానిని ఆత్మహత్య కింద మారుస్తున్నారని కొంతమంది తప్పుడు సమాచారన్ని వ్యాప్తి చేస్తున్నారని పోలీసులు తెలిపారు. ఆ మహిళ మృతిపై ఎవరు ఫిర్యాదు చేయని పక్షంలో ఈ కేసును అసహజ మరణంగా రికార్డు చేసినట్లు వెల్లడించారు. తక్షణ ఫిర్యాదు లేని కేసులను అసహజ మరణాలుగా నమోదు చేస్తారన్న పోలీసులు, శవపరీక్ష నివేదిక ఆధారంగా దాన్ని ఆత్మహత్య, హత్య, ప్రమాదవశాత్తుగా కేసు మార్చి విచారణ చేస్తామన్నారు. ఈ విషయాలను భారతీయ న్యాయ సంహిత సీఆర్‌పీసీ 174 వివరిస్తుందన్నారు.