Ayodhya 400 KG Lock :ప్రాణ ప్రతిష్ఠ సమయం దగ్గర పడుతున్న కొద్దీ అయోధ్య రాముడికి పెద్ద ఎత్తున కానుకలు వస్తున్నాయి. ఇప్పటికే భారీ డోలు, విల్లు, గంటను భక్తులు పంపించగా- తాజాగా అలీగఢ్ నుంచి ఓ పెద్ద తాళం కానుకగా వచ్చింది. దీని బరువు 400 కిలోలు ఉంటుందని తెలుస్తోంది. అలీగఢ్లోని నోరంగాబాద్‌కు చెందిన సత్య ప్రకాష్ శర్మ, ఆయన భార్య రుక్మిణి శర్మ రెండేళ్ల క్రితం ఈ తాళాన్ని తయారు చేశారు. సత్య ప్రకాష్ శర్మ ఇటీవల స్వర్గస్తులయ్యారు. ఈ తాళాన్ని అయోధ్య రామమందిరానికి బహుమతిగా ఇవ్వాలని ఆయన కోరిక అని రుక్మిణి తెలిపింది.
తాళానికి పూజలు చేసిన అనంతరం అయోధ్యకు తీసుకొచ్చారు మహామండలేశ్వర్ అన్నపూర్ణ భారతి పూరీ అనే మహిళ. ఈ తాళం అలీగఢ్ పరిశ్రమకు ఊతమిస్తుందని చెబుతున్నారు. "అలీగఢ్ తాళాలకు ప్రసిద్ధి. అలీగఢ్ను ప్రధాని నరేంద్ర మోదీ తాళాల నగరంగా అభివర్ణించారు. అంతర్జాతీయ స్థాయిలో అలీగఢ్కు ప్రాచుర్యం కల్పించేందుకు ఈ తాళాన్ని అయోధ్యకు ఇవ్వాలని నిర్ణయించాం. అక్కడికి వచ్చే దేశ, విదేశ ప్రజలు దీన్ని చూసి అభినందిస్తారు. ఇది అలీగఢ్ తాళాల పరిశ్రమకు ప్రయోజనం కలిగిస్తుంది. ఆర్థికంగా నగరానికి మంచి చేస్తుంది" అని అన్నపూర్ణ భారతి వివరించారు.
రూ.1.65లక్షల రామాయణం
ప్రాణప్రతిష్ఠ నేపథ్యంలో అయోధ్యలో రూ.1.65లక్షల విలువ చేసే రామాయణ ప్రతిని ప్రదర్శనకు ఉంచారు. 45 కేజీల బరువు ఉండే ఈ రామాయణం 3 బాక్సుల్లో వస్తుంది. పుస్తకాలతో పాటు స్టాండ్ను కూడా ప్రత్యేకంగా తీర్చిదిద్దినట్లు తయారీదారులు తెలిపారు. కవర్ మెటీరియల్ను విదేశాల నుంచి దిగుమతి చేసుకున్నట్లు చెప్పారు. బాక్స్ స్టాండ్ను ఎటువైపైనా తిప్పుకునేలా ఉంటుందని వివరించారు.