திருப்பத்தூர்:திருப்பத்தூர் மாவட்டத்தில் இயங்கி வரும் தனியார் மருத்துவமனையில், 23 வயதான இளம்பெண் ஒருவர் லேப் டெக்னீசியனாக பணியாற்றி வந்துள்ளார். அதே மருத்துவமனையில் பணியாற்றும் மருத்துவர் ஒருவர், அப்பெண்ணிற்கு மருத்துவமனையில் பாலியல் தொல்லை கொடுத்தது மட்டுமல்லாமல், கொலை மிரட்டலும் விடுத்துள்ளதாக கூறப்படுகிறது.
இதனால் அப்பெண் பெரும் மன உளைச்சலுக்கு ஆளாகி உள்ளார். அது மட்டுமல்லாமல், நேற்று முன்தினம் (பிப்.21) அவர் தற்கொலைக்கு முயன்ற நிலையில், அவரை மீட்ட பெற்றோர், சிகிச்சைக்காக அருகில் உள்ள மருத்துவமனையில் அனுமதித்துள்ளனர். அங்கு மருத்துவர்கள் அவருக்கு தீவிர சிகிச்சை அளித்த நிலையில், தனக்கு பாலியல் தொல்லை கொடுத்து, கொலை மிரட்டல் விடுத்த மருத்துவர் மீது உரிய நடவடிக்கை எடுக்கக்கோரி காவல் நிலையத்தில் அப்பெண் புகார் அளித்துள்ளார்.