சிதம்பரம் நடராஜர் கோயில் வழக்கு: காவல்துறைக்குச் சென்னை உயர் நீதிமன்றம் உத்தரவு! - Chidambaram Nataraja temple

Chidambaram Nataraja temple: சிதம்பரம் நடராஜர் கோயிலில் பக்தர்களின் தினசரி வழிபாட்டிற்கு எந்த இடையூறும் ஏற்படுத்தக் கூடாதென காவல்துறைக்குச் சென்னை உயர்நீதிமன்றம் உத்தரவிட்டுள்ளது.

சென்னை: சிதம்பரம் நடராஜர் கோயிலில் கனகசபை மீது ஏறி பக்தர்கள் தரிசனம் செய்ய அனுமதி அளித்த அரசாணையை எதிர்த்துப் பதிவு செய்யப்பட்ட வழக்கு, நீதிபதிகள் மகாதேவன் மற்றும் ஆதிகேசவலு அமர்வில் இன்று மீண்டும் விசாரணைக்கு வந்தது. அப்போது, மனுதாரர் தரப்பில் கனகசபை மீது 25 பேர் நின்றால் நூறு பக்தர்கள் சுவாமி தரிசனம் செய்ய முடியாத நிலை ஏற்படும் என்றும், தீட்சிதர்கள் தவிர வேறு எவரும் கனகசபை மீது ஏற உரிமையில்லை என்றும் வாதிடப்பட்டது.

அப்போது குறுக்கிட்ட நீதிபதிகள், கனகசபை மீது நின்று பக்தர்கள் தரிசனம் செய்ய உரிமை இல்லை என்று எப்படிக் கூற முடியும்? என்ன ஆதாரம் உள்ளது? என்று மனுதாரர் தரப்புக்குக் கேள்வி எழுப்பினர். கடந்த 2023ஆம் ஆண்டு கோயிலில் நடந்த நிகழ்வைச் சுட்டிக் காட்டிய தீட்சிதர்கள் தரப்பு வழக்கறிஞர், காவல் துறையினர் கோயிலுக்குள் நுழைந்து இடையூறு ஏற்படுத்தியதாகப் புகார் தெரிவித்தனர்.

தமிழ்நாடு அரசின் அரசாணைக்கு எந்த தடையும் விதிக்காத நிலையில் கனகசபை மீது நின்று தரிசனம் செய்யப் பக்தர்கள் அனுமதிக்கப்படுவதாக அறநிலையத்துறை தரப்பில் விளக்கம் அளிக்கப்பட்டது. இதையடுத்து, சிதம்பரம் நடராஜர் கோயிலில் பின்பற்றப்படும் மரபைத் தொடர்ந்து கடைப்பிடிக்க வேண்டும் என்று அறிவுறுத்திய நீதிபதிகள், கோயிலில் அன்றாட வழிபாட்டுக்கு காவல்துறையினர் எந்த இடையூறும் ஏற்படுத்தக் கூடாது என்று உத்தரவிட்டனர். பின்னர், இந்த வழக்கின் இறுதி விசாரணையை ஏப்ரல் 26ஆம் தேதிக்கு நீதிபதிகள் தள்ளி வைத்தனர்.

இதையும் படிங்க: நாடாளுமன்றத் தேர்தல் விழிப்புணர்வு: கடலுக்கு அடியில் 60 அடி ஆழத்தில் சென்று வாக்களித்த நீச்சல் வீரர்கள்! - Lok Sabha Elections Awareness