இறுதிப் போட்டிக்கு முன்னேறிய வினேஷ் போகத்.. சோதனைகளை கடந்து சாதனை படைத்த வீரமங்கை! - Paris Olympics 2024

WRESTLER VINESH PHOGAT: ஒலிம்பிக் மல்யுத்த அரையிறுதியில் கியூபா வீராங்கனையை வீழ்த்தி இறுதிப் போட்டிக்கு முன்னேறியுள்ளார் இந்தியா வீராங்கனை வினேஷ் போகத். இதன் மூலம் இந்தியா மேலும் ஒரு தங்கம் அல்லது வெள்ளிப் பதக்கம் வெல்வது உறுதி செய்யப்பட்டுள்ளது.

பாரீஸ்:பல்வேறு போராட்டங்களைக் கடந்து பாரீஸ் ஒலிம்பிக் போட்டியில் பங்கேற்ற இந்திய வீராங்கனை வினேஷ் போகத், மல்யுத்த இறுதிப் போட்டிக்கு முன்னேறியுள்ளார். முன்னதாக நடைபெற்ற மல்யுத்தம் பெண்கள் 50 கிலோ எடை பிரிவுக்கான கால் இறுதி ஆட்டத்தில் உக்ரைனைச் சேர்ந்த ஒக்ஸானா லிவாச் என்பவரை 3-க்கு 0 என்ற கணக்கில் என்ற வீழ்த்தி அரையிறுதி போட்டிக்கு முன்னேறினார்.

இதனைத் தொடர்ந்து நேற்று இரவு 10.30 மணிக்கு நடைபெற்ற அரையிறுதி போட்டியில், இந்திய வீராங்கனை வினேஷ் போகத் - கியூபா வீராங்கனை யூஸ்னிலிஸ் குஸ்மான் லோபனை எதிர் கொண்டார். பரபரப்பாகவும், விறுவிறுப்பாகவும் நடைபெற்ற இந்த போட்டியில் ஆரம்பம் முதலே ஆதிக்கம் செலுத்தினார் வினேஷ் போகத். இதன் விளைவாக 5-0 என்ற புள்ளி கணக்கில் கியூபா வீராங்கனையை வீழ்த்தி இறுதிப் போட்டிக்கு முன்னேறியுள்ளார்.

இதன் மூலம் இந்தியாவுக்கு இவர் தங்கம் அல்லது வெள்ளிப் பதக்கம் வெல்வது உறுதி செய்யப்பட்டுள்ளது. இறுதிப் போட்டியில் இந்திய வீராங்கனை வினேஷ் போகத் அமெரிக்காவை சேர்ந்த சாரா ஹில்டெப்ரண்ட்-ஐ எதிர்கொள்ள இருக்கிறார். இந்த போட்டி, இந்திய நேரப்படி இன்று இரவு 11.23 மணிக்கு தொடங்கவுள்ளது.

இதுவரை கடந்த வந்த பாதை:பாரீஸ் ஒலிம்பிக் மகளிர் மல்யுத்தத்தில் 50 கிலோ எடைப் பிரிவில் நடந்த ரவுன்ட் ஆப் 16 சுற்று போட்டியில் இந்திய வீராங்கனை வினேஷ் போகத், நடப்பு ஒலிம்பிக் சாம்பியனான ஜப்பான் வீராங்கனை சுசய் யுய் (Susai Yui) எதிர்கொண்டார்.

இதில் கடைசி நிமிடம் போராடிய அவர், ஜப்பான் வீராங்கனையை 3-க்கு 2 என்ற புள்ளிகள் கணக்கில் வீழ்த்தி கால் இறுதிச் சுற்றுக்கு தகுதி பெற்றார். 2010ஆம் ஆண்டு முதல் மல்யுத்தம் போட்டியில் விளையாடி வரும் சுசாகி இதுவரை 5 போட்டிகளில் மட்டுமே தோல்வி அடைந்துள்ளார்.

மேலும் 4முறை உலக சாம்பியன்ஷிப் போட்டிகளில் தங்க பதக்கங்களை வென்றார். தோல்வியே தழுவாத ஜப்பான் வீராங்கனையை வினேஷ் போகத் அதிரடியாக வீழ்த்தி, காலிறுதி சுற்றுக்கு தகுதி பெற்றர் வினேஷ் போகத்.

அதனைத் தொடர்ந்து நடைபெற்ற போட்டியில் உக்ரைனை சேர்ந்த ஒக்ஸானா லிவாச் என்பவரை 7-க்கு 5 என்ற புள்ளிகள் கணக்கில் வீழ்த்தினார். வினேஷ் போகத்திடம் தோல்வியைத் தழுவிய உக்ரைன் வீராங்கனை ஒக்ஸானா லிவாச், 2018 ஆம் ஆண்டு நடைபெற்ற உலக சாம்பியன்ஷிப் போட்டியில் 50 கிலோ எடைப் பிரிவில் வெண்கலப் பதக்கம் வென்றவர். அதேபோல் 2019 ஐரோப்பிய சாம்பியன்ஷிப்பில் தங்கம் வென்றவர் என்பது குறிப்பிடத்தக்கது.

சொந்த நாட்டிலேயே பல்வேறு இன்னல்களை சந்தித்து இருந்தாலும், தன்னுடைய விடாமுயற்சியாலும் கடுமையான பயிற்சியாலும் ஒலிம்பிக் மல்யுத்தத்தில் இறுதிப் போட்டிக்குள் நுழைந்து தாய்நாட்டுக்குப் பெருமை சேர்த்துள்ளார் வினேஷ் போகத். அவருக்குப் பலரும் தங்களது பாராட்டுகளைத் தெரிவித்து வருகின்றனர்.

இதையும் படிங்க:ஒலிம்பிக் ஹாக்கி: இறுதிவரை போராடிய இந்திய அணி.. அரையிறுதியில் ஜெர்மனியிடம் தோல்வி!