'விளையாட விரும்புகிறேன், ஆனால் டிரஸ்ஸிங் ரூமில் இல்லை' - ஓய்வு குறித்து மனம் திறக்கும் அஸ்வின்!

சர்வதேச கிரிக்கெட் போட்டிகளில் இருந்து ஒய்வு அறிவித்துள்ள சுழற்பந்து வீச்சாளர் அஸ்வின் தனது ஓய்வு குறித்து சில விஷயங்களை பகிர்ந்துள்ளார்.

ஹைதராபாத்:அனைத்து விதமான சர்வதேச கிரிக்கெட்டிலிருந்தும் ஓய்வு பெறுவதாக அறிவித்து ரசிகர்களை அதிர்ச்சியில் ஆழ்த்தினார் ரவிச்சந்திரன் அஸ்வின் (38). தமிழ்நாட்டை சேர்ந்த சுழற்பந்து வீச்சாளர் அஸ்வின் இந்திய அணியில் பல ஒருநாள், டெஸ்ட் மற்றும் டி-20 போட்டிகளில் விளையாடி ரசிகர்கள் மத்தியில் குறிப்பாக தமிழ் ரசிகர்களை கவர்ந்தவர்.

அண்மையில் ஆஸ்திரேலியாவில் நடந்த பார்டர்-கவாஸ்கர் டெஸ்ட் கோப்பையில் இடம்பெற்றிருந்த அஸ்வின் போட்டி முடிவடையும் முன்பே தனது ஓய்வை அறிவித்துவிட்டார். இது பல்வேறு விவாதங்களை கிளப்பியது. அஸ்வின் விடைபெற்ற அந்த டெஸ்ட் தொடருக்கு (பார்டர்-கவாஸ்கர்) தகுதியானவர் என்று கபில் தேவ் உட்பட பல முன்னாள் கிரிக்கெட் வீரர்கள் கருத்து தெரிவித்தனர். இருப்பினும், அஸ்வின் தனது ஓய்வை குறித்து பெரிதாக அலட்டிக்கொள்ளவில்லை. இந்த நிலையில், யூடியூப் சேனலில் தனது ஓய்வை குறித்து அஸ்வின் மனம் திறந்து பேசியிருப்பது சோசியல் மீடியாவில் கவனத்தை ஈர்த்துள்ளது.

மனம் திறக்கும் அஸ்வின்

''நான் இன்னும் பல கிரிக்கெட் விளையாட விரும்புகிறேன்... ஆனால், எந்த இடத்தில்? கண்டிப்பாக இந்திய டிரஸ்ஸிங் அறையில் இல்லை, வேறு எங்காவது விளையாட வேண்டும். விளையாட்டில் நான் நேர்மையாக இருக்க விரும்புகிறேன். நான் ஒரு பிரியாவிடை டெஸ்டில் விளையாட விரும்பினாலும், அந்த இடத்திற்கு தகுதி பெறவில்லை என்றால் நினைத்து பாருங்கள். எனது கிரிக்கெட்டில் இன்னும் பலம் இருப்பதாக நான் உணர்ந்தேன்''.

''நான் பல ஆண்டுகளாக கிரிக்கெட் விளையாடி ஒரு விஷயத்தைக் கற்றுக்கொண்டேன். எல்லாம் நீங்கள் விரும்பியபடி நடக்காது. இது நன்றாக இருந்திருக்கலாம் அல்லது அது நடந்திருக்க வேண்டும் என்று நாங்கள் அடிக்கடி நினைக்கிறோம். ஆனால், எனது கேரியரைப் பற்றி எனக்கு எந்த வருத்தமும் இல்லை. எனது தோல்விகள் மற்றும் வெற்றிகள் இரண்டிலிருந்தும் நான் பாடம் கற்றுள்ளேன். அந்த மகிழ்ச்சி இருக்கும் வரை நான் தொடர்ந்து விளையாடுவேன்'' என்றார்.

இதையும் படிங்க:70 பந்துகளில் அதிவேக சதம்... பெண்கள் கிரிக்கெட்டில் புதிய சாதனையை படைத்தார் ஸ்மிருதி மந்தனா!

மேலும் அஸ்வின், ''நான் பந்துடன் வெளியே வரும்போது மக்கள் கைதட்டினால் என்ன வித்தியாசம் இருக்க போகிறது? அந்த கைதட்டல் எவ்வளவு காலம் நீடிக்கும்?. சமூக ஊடகங்கள் இல்லாத காலத்தில், மக்கள் இதைப் பற்றி பேசி ஒரு வாரத்தில் மறந்துவிடுவார்கள். விடைபெற வேண்டிய அவசியம் இல்லை. இந்த கிரிக்கெட் எங்களுக்கு மிகுந்த மகிழ்ச்சியை அளித்துள்ளது, நாங்கள் மகிழ்ச்சியுடன் விளையாடினோம்'' என்று தெரிவித்துள்ளார்.

சர்வதேச போட்டிகளில் இருந்து விடைபெற்றுள்ள ரவிச்சந்திரன் அஸ்வின் 2015 ஆம் ஆண்டுக்கு பிறகு மீண்டும் ஐபிஎல்-இல் சென்னை சூப்பர் கிங்ஸ் அணியில் இந்தாண்டு விளையாடவுள்ளார். இது அவரது ரசிகர்களுக்கு கண்டிப்பாக ஆறுதலையும், மகிழ்ச்சியையும் தரும். சிஎஸ்கே நிர்வாகம் அஸ்வினை 9.75 கோடிக்கு ஏலம் எடுத்துள்ளது குறிப்பிடத்தக்கது.