மாநில கட்சிகளின் பிளவால் ராஜாவான பாஜக..! மகாராஷ்டிரா தேர்தல் முடிவுகள் உணர்த்துவது என்ன?

2024 மகாராஷ்டிரா சட்டப்பேரவைத் தேர்தல் முடிவுகள் உத்தவ் தாக்கரே மற்றும் சரத் பவார் ஆகியோருக்கு அரசியல் களத்தில் பெரும் பின்னடைவை ஏற்படுத்தியிருக்கிறது.

ஹைதராபாத்:ஜனநாயக நாட்டில் மக்களுக்கு நல்லாட்சியை உறுதிசெய்ய, பலம் பொருந்திய எதிர்க்கட்சிகள் மிக முக்கியம். ஆனால் எதிர்க்கட்சிகளின் தாக்கம் நாளுக்குநாள் குறைந்து கொண்டிருக்கிறது. இதை மெய்ப்பிக்கும் விதமாக மகாராஷ்டிரா சட்டப்பேரவைத் தேர்தல் முடிவுகள் இருக்கின்றன. இதில், எதிர்க்கட்சிகளின் அரசியல் அஸ்திவாரமே ஆட்டம் கண்டிருக்கிறது. மகாராஷ்டிராவில் புதிதாக அமையும் சட்டப்பேரவையில் ஆளுங்கட்சிகளின் ஆதிக்கமே மேலோங்கும் நிலையில், எதிர்க்கட்சிகளின் குரல் மங்கிவிடும் ஆபத்து ஏற்பட்டுள்ளது.

இந்த முறை மகாராஷ்டிரா சட்டப்பேரவைத் தேர்தல் பலருக்கும் பெரும் அதிர்ச்சியை ஏற்படுத்தியது. குறிப்பாக, சரத் பவாரின் தேசியவாத காங்கிரஸ் (NCP) மற்றும் உத்தவ் தாக்ரேவின் சிவசேனா (UBT) சிறப்பாக செயல்பட்டு சட்டப்பேரவையில் அதிக இடங்களை பிடிப்பார்கள் என எதிர்பார்த்தவர்களுக்கு, ஏமாற்றம் மட்டுமே மிஞ்சியது.

2024 தேர்தல் மாற்றங்கள்:2019 தேர்தலில், ஒருங்கிணைந்த தேசியவாத காங்கிரஸ் 54 இடங்களில் வெற்றி பெற்றது. அதேபோல ஒருங்கிணைந்த சிவசேனா 56 இடங்களில் வெற்றிபெற்றது. அப்போது சிவசேனா பாஜகவைச் சேர்ந்த கூட்டணியுடன் போட்டியிட்டது. தேசியவாத காங்கிரஸ், இந்திய காங்கிரஸ் கட்சியுடன் கூட்டணி சேர்ந்து களம் கண்டிருந்தது குறிப்பிடத்தக்கது.

ஆனால், 2024 தேர்தலில், தேர்தல் ஆணையத்தின் தரவுகளின்படி, ஷிண்டேவின் சிவசேனா (SHS) 57 இடங்களில் வெற்றி பெற்றுள்ளது.அதேபோல தேசியவாத காங்கிரஸ் 41 இடங்களில் வெற்றி பெற்றிருக்கிறது. இதற்கு மாறாக, உத்தவ் தாக்ரேவின் சிவசேனா (UBT) மற்றும் சரத் பவாரின் தேசியவாத காங்கிரஸ் (NCPSP) மிக மோசமான தேர்தல் முடிவை சந்தித்துள்ளன. NCPSP வெறும் 10 இடங்களையும், சிவசேனா (UBT) 20 இடங்களை மட்டுமே தக்க வைக்க முடிந்துள்ளது.

தவறுகள் ஏற்படுத்திய தாக்கம்:சகோதரர் மகனான அஜித் பவார் தலைமையிலான தேசியவாத காங்கிரஸ் பிளவால், சரத் பவார் பெரும் நெருக்கடியை எதிர்கொள்கிறார். அவருடைய அரசியல் வாழ்க்கையின் இறுதிக் கட்டத்தில், தன் குடும்பம், குறிப்பாக மகள் சுப்ரியா சுலே மீது காட்டிய அன்பின் விளைவாக, அவரின் பாரம்பரியமும் கட்சியின் ஒருமைப்பாடும் பாதிக்கப்பட்டது.

அதேபோல், சிவசேனா தலைவரான உத்தவ் தாக்கரே, தனது கட்சியைத் தனக்கு சொந்தமெனக் கூறிய போதிலும், ஏக்நாத் ஷிண்டேவுக்கு மதிப்பான இடத்தை வழங்கி அவரை சமாதானமாக வைத்திருக்கவில்லை. இதன் விளைவாக, சிவசேனா பிளவுபட, ஏக்நாத் ஷிண்டே மக்களிடமிருந்து நேரடியாக ஆதரவைப் பெற்று தனது குரலை ஒலிக்கச் செய்தார். தனது உறவினர் ராஜ் தாக்கரேவுடனேனும் ஒரு ஒப்பந்தத்தை ஏற்படுத்தியிருக்கலாம். ஆனால், அரசியல் விளையாட்டில் அதுவும் சாத்தியமில்லாமல் போனது.

பாரம்பரியம் vs புதிய தலைமுறைகள்:மகாராஷ்டிரா சட்டப்பேரவைத் தேர்தல் 2024 மீது சரத் பவார், உத்தவ் தாக்ரே மற்றும் காங்கிரஸ் தலைவர்களுக்கு அதீத நம்பிக்கைகள் இருந்தன. இதனால் இவர்களின் மெத்தனம், உட்கட்சி பூசல்கள், வாக்காளர்களின் அதிருப்தியை தூண்டியது. இதன் விளைவாக பா.ஜ.க-வுக்கு மகாராஷ்டிராவில் அரசியல் களம் திறந்தவெளியானது.

இந்த தேர்தல் முடிவுகள் பாரம்பரியம் மற்றும் புதிய தலைமுறையின் மோதலை நேரடியாக வெளிப்படுத்தி இருக்கின்றன. மகள்களுக்கு ஆதரவான திட்டங்கள் மற்றும் அரசியல் கனவுகளின் மீதான பொதுமக்களின் பார்வையும் இப்போது மாறிவிட்டது. உதாரணமாக, மக்கள் ஏக்நாத் ஷிண்டேவின் தலைமையை பாரம்பரிய அரசியல் தளத்திற்கு மாறாக, உழைக்கும் நம்பிக்கையாக எடுத்துக்கொண்டனர்.

உட்கட்சி பூசலை பயன்படுத்தி சாதித்த பாஜக:என்னதான், பிரிந்துசென்ற ஏக்நாத் ஷிண்டேவின் சிவசேனா, அஜித் பவாரின் தேசியவாத காங்கிரஸ் ஆகிவற்றுக்கும் இந்த தேர்தலில் சில சிக்கல்கள் இருக்கத்தான் செய்கின்றன. பா.ஜ.க பெருவாரியான இடங்களைக் கைப்பற்றியதால், இவர்களுக்கும் ஆபத்து தொற்றிக்கொண்டுள்ளது.

பாஜகவை ஒப்பிடும்போது, இவர்களுக்கு குறைந்த அளவிலான இடங்கள் மட்டுமே இருப்பதால், அரசு அமைக்கும்போது ஷிண்டே, அஜித் பவார் ஆகியோரின் குரல்கள் ஓங்கி ஒலிக்காது. மாநில கட்சிகளில் ஏற்பட்ட பிளவால், தேசியக் கட்சியான பாஜக தனிப்பெரும்பான்மையைப் பெற்று தற்போது ராஜாவாக மகாராஷ்டிராவில் வலம் வருகிறது.

உள்ளூர் பிரச்னைகள்:மகாயுதிக்கு ஆட்சி செய்ய வாய்ப்பளித்துள்ள மக்கள், உள்ளூர் அரசியல் சூழலை மாற்றியமைத்துள்ளனர் என்றே சொல்லலாம். உத்தவுக்கு பதிலாக ஏக்நாத், சரத் பவாருக்கு பதிலாக அஜித் பவார் என அனைத்தையும் தங்கள் வாக்குகள் வாயிலாக தலைகீழாக மாற்றியுள்ளனர். இது தேசிய கட்சிகள் மாநில சட்டப்பேரவையில் ஆதிக்கம் செலுத்துவதற்கு வழிவகுத்துள்ளது.

உள்ளூர் பிரச்னைகளைக் கூறி தேர்தல் சமயங்களில் கட்சிகள் வாக்கு சேகரிக்கும். ஆனால், இம்முறை மகாராஷ்டிரா தேர்தலில், இந்து தேசியம் ஆக்கப்பூர்வமான அதிகாரத்தை செலுத்தியுள்ளது. 46 ஆண்டுகளுக்கு முன் உள்ளூர் பிரச்னைகளைக்கு குரல் கொடுத்து தான் சரத் பவார் அரியணை ஏறினார். பின்னர், தேசியவாத காங்கிரஸ் எனும் தனிக்கட்சியைத் தொடங்கினார்.

அதேபோல தான் உத்தவ் தாக்ரே, மராட்டிய பெருமைகளைக் கொண்டாடி, அம்மக்களுக்கு இருக்கும் கவலைகளை தீர்ப்பதாக அரசியலில் நிலைத்து நின்றார். இம்முறை மாநிலக் கட்சிகள் பிளவுபட்டதன் விளைவு, இந்த அரசியல் பாரம்பரியம் அனைத்தும் பொய்த்துப் போனது.

மோடி மீது நம்பிக்கை:தேர்தல் முடிவுகள் அறிவிக்கப்படும் வரை, பல கருத்துகளை பதிவிட்டு வந்த மாநில கட்சிகள், தோல்வியைத் தழுவியப் பிறகு அமைதி காத்தன. ஆனால், முடிவுகள் வெளியானப் பிறகு கட்சித் தொண்டர்களிடையே மாநில பாஜக தலைவர் தேவேந்திர ஃபட்னாவிஸின் உரை, கர்ஜிக்கும் சிங்கத்தைப் போல் இருந்தது. இது பிற கட்சிகள் அடிபணிந்து நடக்க வேண்டும் என்பதை உணர்த்தும் வகையில் இருந்தது.

தேர்தலில் தங்களுக்கு ஆதரவாக இருந்த ஒன்றிய அரசுக்கு நன்றி தெரிவித்த அவர், ‘இது சித்தாந்தங்களின் போர்’ எனக் குறிப்பிட்டு பேசினார். மேலும், மக்கள் மோடி மீது நம்பிக்கை வைத்துள்ளனர் என்றும், அவர் தவிர்க்கமுடியாத நபர் எனவும் புகழாரம் சூட்டினார். இது வளர்ச்சி மற்றும் லட்லி பெஹ்னா யோஜ்னா (பெண்கள் முன்னேற்ற திட்டம்) ஆகியவற்றைக் கருத்தில் கொண்டு மக்கள் அளித்த வாய்ப்பு என மகாராஷ்டிரா பாஜக பிரமுகர்கள் தெரிவித்துள்ளனர்.

மகாராஷ்டிராவின் மேற்குப் பகுதியைத் தவிர, மாநிலத்தின் பிற அனைத்துப் பகுதிகளும் பாஜக மற்றும் அதன் கூட்டணிக் கட்சிகளுக்கு அமோக ஆதரவைக் காட்டியுள்ளன. இதுவே மகாயுதி கூட்டணிக்கு அமோக பெரும்பான்மையைத் தேடித் தந்துள்ளது.

எதிர்கட்சிகளின் எதிர்காலம்: முன்னாள் முதல்வர் பிருத்விராஜ் சவான், 8 முறை எம்.எல்.ஏ.வாக இருந்த பாலாசாகேப் தோரட், யஷோமதி தாக்கூர் ஆகியோர் தோற்கடிக்கப்பட்டதையடுத்து, எதிர்க்கட்சிகள் சட்டப்பேரவையில் பிரதிநிதித்துவப்படுத்த ஒரு முகத்தை கண்டுபிடிக்க வேண்டும் என்ற சூழலுக்கு தள்ளப்பட்டிருக்கிறது மகாராஷ்டிரா அரசியல். எதிர்கட்சி தலைவராக (LoP) இருக்க குறைந்தது 29 இடங்களைக் கைப்பற்றியிருக்க வேண்டும்.

ஆனால், மகாயுதி கூட்டணிக்கு எதிராக களம் கண்ட ஒரு கட்சி கூட இந்த அடிப்படை புள்ளியைத் தாண்டவில்லை. எனவே, இனிவரும் ஐந்தாண்டுகளை எதிர்கட்சிகள் கடக்க, சீரான திட்டங்களை வகுக்கும் சூழலுக்கு தள்ளப்பட்டுள்ளனர். ஓய்வெடுக்கும் வயதில் இருக்கும் தலைவர்களுக்கு மாற்றாக உறுதியான தலைமையை தேர்வு செய்ய எதிர்கட்சிகள் ஆயத்தமாக வேண்டும். அரியணையில் இருப்பவரின் அதே திறனுடன் செயல்பட்டால் மட்டுமே எதிர்கட்சிகளால் இனி பிழைத்திருக்க முடியும் என்பதை உணர்த்தி இருக்கிறது மகாராஷ்டிரா சட்டப்பேரவைத் தேர்தல்.