இலங்கை: மறைந்த இலங்கை தமிழ் தேசியக் கூட்டமைப்பின் முன்னாள் தலைவர் இரா.சம்பந்தனின் உடல் திருகோணமலையில் உள்ள இந்து மயானத்தில் இன்று மாலை தகனம் செய்யப்பட்டுள்ளது. அவரின் இறுதிச் சடங்குகளில் அதிபர் ரணில் விக்ரமசிங்க, தமிழக பாரதிய ஜனதா கட்சியின் தலைவர் அண்ணாமலை, இலங்கைக்கான இந்திய தூதரகர் சந்தோஷ் ஜா உள்ளிட்ட அரசியல் தலைவர்கள், பொதுமக்கள் என பலரும் கலந்து கொண்டனர்.
வயது மூப்பு, உடல்நலக்குறைவு காரணமாக கொழும்பில் உள்ள தனியார் மருத்துவமனையில் சிகிச்சை பெற்றுவந்த இரா.சம்பந்தன் கடந்த ஜூன் 30ஆம் தேதி இரவு தனது 91வது வயதில் சிகிச்சை பலனின்றி காலமானார். இதனையடுத்து, கொழும்பில் அஞ்சலிக்காக வைக்கப்பட்டிருந்த அவரது உடல், புதன்கிழமை நாடாளுமன்றத்தில் அஞ்சலிக்காக வைக்கப்பட்டது. பின்னர், யாழ்ப்பாணத்துக்கு கொண்டு செல்லப்பட்டு அஞ்சலிக்காக வைக்கப்பட்டது.
இதையடுத்து, திருகோணமலையில் உள்ள அவரது இல்லத்தில் இன்று மாலை வரை அஞ்சலிக்காக வைக்கப்பட்டிருந்தது. பின்னர், இறுதிச் சடங்குகள் நடைபெற்று சம்பந்தனின் உடல் தகனம் செய்யப்பட்டது. இறுதி அஞ்சலி நிகழ்வில் பல்வேறு முக்கிய தலைவர்கள் உரையாற்றினர்.