சென்னை: பிரபல நடிகை த்ரிஷா நடித்துள்ள வெப் சீரியஸ் ‘பிருந்தா’ டீசர் நேற்று வெளியானது. இது த்ரிஷா நடிப்பில் வெளியாகும் முதல் வெப் சீரியஸாகும். நடிகை த்ரிஷா விஜய்யுடன் நடித்து கடந்த வருடம் வெளியான திரைப்படம் லியோ. இதனையடுத்து தற்போது அஜித்துடன் விடாமுயற்சி, கமலுடன் தக் லைஃப் உள்ளிட்ட படங்களில் நடித்து வருகிறார். இதனிடையே சூர்யா மனோஜ் வாங்கலா இயக்கத்தில், ஆடிங் அட்வர்டைசிங் LLP தயாரிப்பில் ‘பிருந்தா’ என்ற இணையத்தொடரில் த்ரிஷா முன்னணி கதாபாத்திரத்தில் நடித்துள்ளார்.
சக்திகாந்த் கார்த்திக் இசையமைத்துள்ள இந்த வெப் தொடருக்கு தினேஷ் கே பாபு ஒளிப்பதிவு செய்துள்ளார். இந்திரஜித் சுகுமாரன், ஜெய பிரகாஷ், ஆமணி, ரவீந்திர விஜய், ஆனந்த் சாமி, ராகேந்து மௌலி ஆகியோர் பிருந்தா வெப் சீரியஸில் முக்கிய கதாபாத்திரத்தில் நடித்துள்ளனர். பிருந்தா வெப் சீரியஸ் சஸ்பென்ஸ் கலந்த க்ரைம் த்ரில்லராக உருவாகியுள்ளது. பிருந்தா வெப் சீரியஸ் Sony LIV ஓடிடி தளத்தில் தெலுங்கு, தமிழ், கன்னடம், மலையாளம், மராத்தி, பெங்காலி மற்றும் ஹிந்தி ஆகிய மொழிகளில் வரும் ஆகஸ்ட் 2ஆம் தேதி வெளியாகிறது.