சென்னை:தமிழ் சினிமாவின் முன்னணி நடிகர்களுள் ஒருவர் நடிகர் அருண் விஜய். இவர் தற்போது இயக்குநர் பாலா இயக்கத்தில் வணங்கான் படத்தில் நடித்து வருகிறார். இப்படத்தை வி ஹவுஸ் புரோடக்சன்ஸ் நிறுவனமும் மற்றும் பி ஸ்டூடியோஸ் நிறுவனமும் இணைந்து தயாரிக்கிறது. இதற்கு இசையமைப்பாளர் ஜி.வி.பிரகாஷ் குமார் இசையமைக்கிறார்.
இப்படத்தில் ரோஷினி பிரகாஷ் கதாநாயகியாகவும், சமுத்திரக்கனி, மிஷ்கின் ஆகியோர் முக்கிய கதாபாத்திரத்தில் நடித்துள்ளனர். பாடல் வரிகளை பாடலாசிரியர் வைரமுத்து எழுதி உள்ளார். சண்டைக் காட்சிகளை சிவா மேற்கொள்ள, எடிட்டிங் பணிகளை சுதர்சன் கையாண்டுள்ளார். சமீபத்தில், படத்தின் டப்பிங் பணிகள் தொடங்கியதாக அறிவிப்பு வெளியானது.
முன்னதாக, படத்தின் ஃப்ர்ஸ்ட் லுக் மற்றும் டீசர் வெளியாகி ரசிகர்கள் மத்தியில் வரவேற்பைப் பெற்ற நிலையில், இன்று ட்ரெய்லர் வெளியாகி உள்ளது. ட்ரெய்லரில் பின்னணி இசையை ஜி.வி.பிரகாஷ் நொறுக்கி உள்ளார் என ரசிகர்கள் தெரிவிக்கின்றனர்.