ବିଜେଡିରେ ମିଶିଲେ ବିଜେପିର ପୂର୍ବତନ କାଉନସିଲର ପ୍ରାର୍ଥୀ ଓ କର୍ମୀ - Balasore bjd - BALASORE BJD

ବାଲେଶ୍ୱର: ସଦର ବିଜେଡି କାର୍ଯ୍ୟାଳୟରେ ବିଜେଡି ଛାଡି ପୌର ନିର୍ବାଚନ ବେଳେ ଅନ୍ୟ ଦଳରେ ମିଶିଥିବା ନେତା ଓ କର୍ମୀମାନେ ପୁଣି ଘରବାହୁଡା ହୋଇଛନ୍ତି । ଏନେଇ ସଦର ବିଧାୟକ ପ୍ରାର୍ଥୀ ସ୍ୱରୂପ ଦାସ ନେତା ଓ କର୍ମୀମାନଙ୍କୁ ଦଳୀୟ ଉତ୍ତରୀୟ ପକାଇ ଦଳକୁ ପୁଣି ଥରେ ସ୍ୱାଗତ କରିଥିଲେ । ଗତ ପୌର ନିର୍ବାଚନରେ ୱାର୍ଡ ନଂ-୯ ରେ ବିଜେପିର କାଉନସିଲର ପ୍ରାର୍ଥୀ ଦିନେଶ ପଟ୍ଟନାୟକ ଏବଂ ୧୩ ନଂ ୱାର୍ଡର ସ୍ବାଧୀନ ପାର୍ଥୀ ଲକ୍ଷ୍ମୀଧର ବେହେରା ବିଧିବଦ୍ଧ ଭାବେ ବିଜୁ ଜନତା ଦଳରେ ସାମିଲ ହୋଇଥିଲେ ।

ଏହି ଅବସରରେ ବାଲେଶ୍ବର ଆଜିମାବାଦ ସ୍ଥିତ ବିଜୁ ଜନତା ଦଳ ବାଲେଶ୍ବର ସଦର ନିର୍ବାଚନ ମଣ୍ଡଳୀ କାର୍ଯ୍ୟାଳୟରେ ଅନୁଷ୍ଠିତ ମିଶ୍ରଣ କାର୍ଯ୍ୟକ୍ରମରେ ଭାରତୀୟ ଜନତା ପାର୍ଟିରୁ ଇସ୍ତଫା ଦେଇ ଯୁବନେତା ଦୀନେଶ ପଟ୍ଟନାୟକ ଆନୁଷ୍ଠାନିକ ଭାବେ ବିଜୁ ଜନତା ଦଳ (ବିଜେଡି)ରେ ଯୋଗ ଦେଇଛନ୍ତି । ଗତ ପୌର ନିର୍ବାଚନରେ ସେ ବିଜେପିରୁ ପ୍ରାର୍ଥୀ ହୋଇଥିଲେ ମଧ୍ୟ ପରାଜିତ ହୋଇଥିଲେ । ତେବେ ସେ ବିଜେପିରେ ଯୋଗ ଦେବା ପୂର୍ବରୁ ଦୀର୍ଘ ଦଶବର୍ଷ ଧରି ବିଜେଡିର ସକ୍ରିୟ ସଦସ୍ୟ ଭାବେ ୯-ନଂ ୱାର୍ଡରେ ଜନ ସେବା କରିଆସୁଥିଲେ । 

ଏହି ଅବସରରେ ବିଧାୟକ ସ୍ବରୂପ ମୁଖ୍ୟମନ୍ତ୍ରୀ ତଥା ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକଙ୍କୁ ଷଷ୍ଠ ଥର ମୁଖ୍ୟମନ୍ତ୍ରୀ କରିବା ଲାଗି ନବାଗତମାନେ ୯ନଂ ୱାର୍ଡରେ ସକ୍ରିୟ ଭାବେ କାମ କରିବାକୁ ପରାମର୍ଶ ଦେଇଥିଲେ। ଏହି ମିଶ୍ରଣ କାର୍ଯ୍ୟକ୍ରମରେ ପୌରପାଳିକାର ଉପାଧକ୍ଷ କୈଳାଶ ଚନ୍ଦ୍ର ସେଠୀ, ପୂର୍ବତନ ଉପନଗରପାଳ ମନୋଜ ରାଉତ, ରାଜ୍ୟ ଯୁବ ବିଜେଡି ସାଧାରଣ ସମ୍ପାଦକ ଧିରେନ ନାୟକ, କାଉନସିଲର ଶେଖ ଆୟୁବ,ବିଜେଡି ରାଜ୍ୟ ଯୁଗ୍ମ ସମ୍ପାଦକ ସତ୍ୟରଞ୍ଜନ ଦାସ ପ୍ରମୁଖ ଉପସ୍ଥିତ ରହିଥିଲେ । 

ଇଟିଭି ଭାରତ, ବାଲେଶ୍ବର