ଶଙ୍ଖ ଧରିଲେ ପୂର୍ବତନ ବିଜେପି ବିଧାୟକ କୁମରମଣି ଶବର - Kumarmani Sabar joined BJD
Published : May 3, 2024, 9:21 PM IST
BJD Joining Program: ଭବାନୀପାଟଣା: ବଢୁଛି ବିଜେଡିର ଶକ୍ତି । ଦଳରେ ସାମିଲ ହେଉଛନ୍ତି ଅନେକ ପୁରୁଖା ନେତା । ନିର୍ବାଚନ ଯେତିକି ପାଖେଇ ଆସୁଛି ନେତାଙ୍କ ଦଳ ଡିଆଁ ମଧ୍ୟ ସେତିକି ଜୋରରେ ବୃଦ୍ଧି ପାଇବାରେ ଲାଗିଛି । ଯାହାକି କଳାହାଣ୍ଡି ରାଜନୀତିକୁ ବେଶ ସରଗରମ କରୁଛି । ଆଜି ବିଜେପିରୁ ମୁହଁ ଫେରାଇ ନେଇ ବିଜେଡିରେ ସାମିଲ ହୋଇଛନ୍ତି ପୂର୍ବତନ ବିଜେପି ବିଧାୟକ କୁମରମଣି ଶବର । ତାଙ୍କ ସହ କେସିଙ୍ଗା ବ୍ଲକ ପୂର୍ବତନ ଅଧ୍ୟକ୍ଷ ତଥା ବରିଷ୍ଠ ବିଜେପି ନେତା ସନ୍ତୋଷ ସାହୁ, କର୍ଲାମୁଣ୍ଡା ବ୍ଲକ ପୂର୍ବତନ ଅଧ୍ୟକ୍ଷ ପବିତ୍ର ଭୋଇ ମଧ୍ୟ ଆଜି ବିଜେଡିରେ ସାମିଲ ହୋଇଛନ୍ତି ।
କୁମରମଣି ଶବର ଶିକ୍ଷକତା ଛାଡି ୧୯୮୫ ମସିହାରେ ରାଜନୀତିକୁ ଆସିଥିଲେ । ପ୍ରଥମ ଥର ନର୍ଲା ନିର୍ବାଚନ ମଣ୍ଡଳୀ ପାଇଁ କଂଗ୍ରେସରୁ ବିଧାୟକ ପ୍ରାର୍ଥୀ ହୋଇ ବିଜୟ ହୋଇଥିଲେ । ଏହାପରେ ବ୍ଲକ ଅଧକ୍ଷ ଓ ତା ପରେ ସରପଞ୍ଚ ହୋଇ ରାଜନୀତିରେ ବେଶ ସକ୍ରିୟ ଭୂମିକା ଅଂଶ ଗ୍ରହଣ କରି ପରେ ବିଜେପିରେ ସାମିଲ ହୋଇଥିଲେ । ଦୀର୍ଘ ବର୍ଷ ଧରି ବିଜେପିରେ ରହି କାର୍ଯ୍ୟ କରି ଆସୁଥିଲେ ସୁଦ୍ଧା ତାଙ୍କୁ ଦଳ ଅଣଦେଖା କରିଥିବାରୁ ବିଜେପିରୁ ଇସ୍ତଫା ଦେଇ ଆଜି ବିଜେଡିରେ ସାମିଲ ହୋଇଛନ୍ତି କୁମରମଣି ଶବର । ଆଜି ବିଜେଡି ପକ୍ଷରୁ ମିଶ୍ରଣ ପର୍ବ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଅନୁଷ୍ଠିତ କାର୍ଯ୍ୟକ୍ରମରେ କଳାହାଣ୍ଡି ବିଜେଡି ପର୍ଯ୍ୟବେକ୍ଷକ ପ୍ରଣବ ବଳବନ୍ତ ରାୟ, କଳାହାଣ୍ଡି ଲୋକସଭା ପ୍ରାର୍ଥୀ ଲମ୍ବୋଦର ନିଆଲ ଉପସ୍ଥିତ ରହିଥିବା ବେଳେ ପୂର୍ବତନ ବିଧାୟକ କୁମର ମଣି ଶବରଙ୍କୁ ଦଳକୁ ସ୍ଵାଗତ କରିବା ସହ ସମ୍ବର୍ଦ୍ଧିତ କରିଥିଲେ।
ଇଟିଭି ଭାରତ, କଳାହାଣ୍ଡି