ଭାରସାମ୍ୟ ହରାଇ ଗଛରେ ପିଟିହେଲା ବାଇକ, ଦୁର୍ଘଟଣାରେ ଫରେଷ୍ଟର ମୃତ
Published : Feb 19, 2024, 10:06 PM IST
ଢେଙ୍କାନାଳ: ଭାରସାମ୍ୟ ହରାଇ ଗଛରେ ପିଟି ହୋଇ ବାଇକ ଚାଳକଙ୍କ ମୃତ୍ୟୁ । ଏଭଳି ଏକ ଦୁଃଖଦ ଦୁର୍ଘଟଣା ଢେଙ୍କାନାଳରେ ଘଟିଛି । ଏକ ସଡକ ଦୁର୍ଘଟଣାରେ ନୟାଗଡ଼ ୱାଇଲ୍ଡ ଲାଇଫ ଡିଭିଜନ ଫରେଷ୍ଟର ତରୁଣସେନ ପଟ୍ଟନାୟକଙ୍କର ମୃତ୍ୟୁ ଘଟିଛି । ମୃତ ତରୁଣସେନଙ୍କ ଘର ଢେଙ୍କାନାଳ ଜିଲ୍ଲାର ରାସୋଳ ଥାନା ଅନ୍ତର୍ଗତ ଗିରିଧରପ୍ରସାଦ ଗ୍ରାମରେ । ସେ ନୟାଗଡ ଜିଲ୍ଲା ମହାନଦୀ ୱାଇଲଡ ଲାଇଫ ଡିଭିଜନର ଫରେଷ୍ଟର ଭାବେ କାର୍ଯ୍ୟ କରୁଥିଲେ । ଛୁଟିରେ ନିଜ ଗ୍ରାମ ଗିରିଧର ପ୍ରସାଦକୁ ଆସିଥିଲେ । ଆଜି କୌଣସି ଏକ କାର୍ଯ୍ୟରେ ବାଇକ ଯୋଗେ ବାହାରକୁ ଯାଇଥିବା ସମୟରେ ବାଇକ ଦୁର୍ଘଟଣାର ସମ୍ମୁଖୀନ ହୋଇଛନ୍ତି । ଗୁଡି଼ଆକାଟେଣି ହିନ୍ଦୋଳ ମୁଖ୍ୟ ରାସ୍ତାର କାରନ୍ଦା ନିକଟରେ ତାଙ୍କ ବାଇକ ଭାରସାମ୍ୟ ହରାଇ ରାସ୍ତା ପାର୍ଶ୍ବ ଏକ ଗଛରେ ଧକ୍କା ହୋଇଛି ।
ଏହା ମଧ୍ୟ ପଢନ୍ତୁ ...ବିଏମ୍ସି ଅଫିସ ଆଗରେ ମର୍ମନ୍ତୁଦ ସଡକ ଦୁର୍ଘଟଣା, ଫଳ ଦୋକାନୀ ମୃତ
ତାଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ଲୋକମାନେ ଉଦ୍ଧାର କରି 108 ଆମ୍ବୁଲାନ୍ସ ଯୋଗେ ଚିକିତ୍ସା ପାଇଁ ହିନ୍ଦୋଳ ଉପଖଣ୍ଡ ଡାକ୍ତରଖାନାକୁ ପଠାଇଥିଲେ । ପରିବାର ଲୋକଙ୍କୁ ପୋଲିସ ଖବର ଦେଇଥିଲା l ମାତ୍ର ବାଟରେ ତାଙ୍କର ମୃତ୍ୟୁ ଘଟିସାରିଥିବା ଡାକ୍ତରଖାନାରେ ଡାକ୍ତର ଘୋଷଣା କରିଥିଲେ । ରାସୋଳ ପୁଲିସ ଘଟଣାସ୍ଥଳରୁ ଦୁର୍ଘଟଣାଗ୍ରସ୍ତ ବାଇକ ଜବତ କରିଛି । ପରେ ମୃତଦେହର ବ୍ୟବଛେଦ କରିଥିବା ଜଣାପଡ଼ିଛି । ଦୁର୍ଘଟଣାରେ ତାଙ୍କର ଏପରି ଅକାଳ ମୃତ୍ୟୁକୁ ନେଇ ପରିବାର ଲୋକେ ମର୍ମାହତ ହୋଇପଡିଛନ୍ତି । ଏହି ଦୁର୍ଘଟଣା ଖବର ଶୁଣି ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
ଇଟିଭି ଭାରତ, ଢେଙ୍କାନାଳ