ହାଇଦ୍ରାବାଦ: ସ୍ମାର୍ଟଫୋନ ନିର୍ମାତା କମ୍ପାନୀ Nothing ନିଜର ଆଗାମୀ Nothing Phone (3) ସ୍ମାର୍ଟଫୋନ ଲଞ୍ଚ ସହିତ ଫ୍ଲାଗସିପ୍ ସ୍ମାର୍ଟଫୋନ ଦୌଡ଼ରେ ସାମିଲ ହେବାକୁ ଯାଉଛି । ଡିଭାଇସକୁ ନେଇ ଅନେକ ଲିକ୍ ଖବର ସାମ୍ନାକୁ ଆସିବାରେ ଲାଗିଛି, ଯେଉଁଥିରେ ଏହାର ସ୍ପେଶିଫିକେସନ ସମ୍ପର୍କରେ ଜଣାପଡ଼ିଛି । ଲିକ୍ ତଥ୍ୟ ଅନୁସାରେ କମ୍ପାନୀର ସହ-ପ୍ରତିଷ୍ଠାତା କାର୍ଲ ପେଇ (Carl Pei) ଦ୍ବାରା କମ୍ପାନୀର କର୍ମଚାରୀଙ୍କୁ ପଠାଇଥିବା ଏକ ଇ-ମେଲ୍ରୁ ସ୍ମାର୍ଟଫୋନର ଲଞ୍ଚ ଟାଇମଲାଇନ ସମ୍ପର୍କରେ ଜଣାପଡ଼ିଛି ।
ଟିପଷ୍ଟର ଇବାନ ପ୍ଲାସ ସୋସିଆଲ ମିଡିଆ ପ୍ଲାଟଫର୍ମ Xରେ ଏହି ଇ-ମେଲ୍କୁ ସେୟାର କରିଛନ୍ତି, ଯେଉଁଥିରେ ପେଇ 2025 ଲାଗି କମ୍ପାନୀର ଯୋଜନା ସମ୍ପର୍କରେ କହିଛନ୍ତି । ଏହାକୁ ବ୍ରାଣ୍ଡର 'ଏଯାବତ ସବୁଠୁ ବଡ଼ ବର୍ଷ' ଓ 'ନଥିଙ୍ଗର ଇନୋଭେସନର ବର୍ଷ' ବୋଲି କୁହାଯାଇଛି । ବର୍ଷ 2025ର ପ୍ରଥମ ତ୍ରୟମାସରେ Nothing Phone (3) ଲଞ୍ଚ ସମ୍ପର୍କରେ କହିଛନ୍ତି । ଏହାର ଅର୍ଥ ସ୍ମାର୍ଟଫୋନର ଘୋଷଣା ମାର୍ଚ୍ଚ 2025 ପର୍ଯ୍ୟନ୍ତ ହୋଇପାରେ ।
ଲିକ୍ ହୋଇଥିବା ଇ-ମେଲର ସ୍କ୍ରିନସଟ୍ରେ Phone (3)ର ଘୋଷଣାକୁ 'ଏକ ଐତିହାସିକ ସ୍ମାର୍ଟଫୋନ' ଲଞ୍ଚ ବୋଲି କୁହାଯାଇଛି । ଫଳରେ ଏହାକୁ ଦେଖିବା ଓ ବ୍ୟବହାର କରିବା ଲାଗି ୟୁଜର ବେଶ ଉତ୍ସାହିତ ହୋଇପଡ଼ିଛନ୍ତି । କିନ୍ତୁ ଫୋନ ସମ୍ପର୍କରେ ବିଶେଷ କିଛି ସୂଚନା ଦିଆଯାଇନାହିଁ । ଆଶା କରାଯାଉଛି ସ୍ମାର୍ଟଫୋନ ଲଞ୍ଚ ସହିତ କମ୍ପାନୀର AI-ସଞ୍ଚାଳିତ ପ୍ଲାଟଫର୍ମ ଦିଗରେ ପ୍ରଥମ ପଦକ୍ଷେପ ହେବ ।
ଆଶା କରାଯାଉଛି Nothing ଆଗାମୀ ସ୍ମାର୍ଟଫୋନରେ AI ଫିଚର ସାମିଲକୁ ଦ୍ବିଗୁଣିତ କରିବ । ପେଇ ଏ ନେଇ କହିଛନ୍ତି, "ଆମର ଲକ୍ଷ୍ୟ ବ୍ୟକ୍ତିଗତ କମ୍ପ୍ୟୁଟିଂ ଉପକରଣଗୁଡ଼ିକୁ ୟୁଜର ଏକ୍ସପରିଏନ୍ସକୁ ପୁନଃପରିଭାଷିତ କରିବା । ଏପରି ଟେକ୍ନୋଲୋଜି ସୃଷ୍ଟି କରିବା ଯାହା ଆପଣଙ୍କୁ ଜାଣେ, ଆପଣଙ୍କ ଜୀବନକୁ ସହଜ କରିଥାଏ । ଟେକ୍ନୋଲୋଜି ଯାହା ଆମକୁ ଆମର ସର୍ବଶ୍ରେଷ୍ଠ ସୃଜନଶୀଳ ସାମର୍ଥ୍ୟ ହାସଲ କରିବାକୁ ସକ୍ଷମ କରେ ।"
Nothing Phone (3)ର ଲିକ୍ ସ୍ପେଶିଫିକେସନ
- ଲିକ୍ ତଥ୍ୟ ଅନୁସାରେ, Nothing Phone (3)ରେ 6.67 ଇଞ୍ଚର LTPO AMOLED ଆସିପାରେ, ଯାହାକି 120Hz ରିଫ୍ରେସ୍ ରେଟ୍ ଓ HDR10+କୁ ସପୋର୍ଟ କରିବ ।
- ଏହି ଫୋନ କ୍ବାଲକମ୍ ସ୍ନାପଡ୍ରାଗନ 8 Gen 3 ଚିପସେଟ୍ରୁ ଶକ୍ତି ପାଇପାରେ । କିନ୍ତୁ ଏହି ପ୍ରୋସେସର ସ୍ନାପଡ୍ରାଗନ୍ 8 ଏଲିଟ୍ SoC ଦ୍ବାରା ଚାଳିତ ପ୍ରିମିୟମ୍ ଡିଭାଇସ ତୁଳନାରେ ଏକ ପିଢି ପୁରୁଣା ତଥାପି ଏହା ଏକ ଫ୍ଲାଗସିପ୍ ଚିପସେଟ୍ ।
- ଫୋନରେ 12GB ପର୍ଯ୍ୟନ୍ତ RAM ଓ 512GB ପର୍ଯ୍ୟନ୍ତ USF 4.0 ଷ୍ଟୋରେଜ ରହିପାରେ ।
- ଏଥିରେ 5,000mAh ବ୍ୟାଟେରୀ ରହିପାରେ, ଯାହାକି 45W ଫାଷ୍ଟ ଚାର୍ଜିଂକୁ ସପୋର୍ଟ କରିବ ।
- ଆଶା କରାଯାଉଛି ନୂଆ ଫୋନ NothingOS 3.0 ଦ୍ବାରା ଚାଲିବ ଓ ଏଥିରେ AI ସହ ଜଡ଼ିତ ଅନେକ ଫିଚର ମିଳିବ ।
- ଏଥିରେ ଏକ ନୂଆ ଆକ୍ସନ ବଟନ୍ ହୋଇପାରେ, ଯାହାକି Appleର iPhoneରେ ଦିଆଯାଇଛି ।
- ଡିଭାଇସର କ୍ୟାମେରା ସ୍ପେଶିଫିକେସନ ସମ୍ପର୍କରେ କିଛି ତଥ୍ୟ ମିଳିନାହିଁ ।
- ଏହି ଫୋନର ଦାମ 50,000 ପାଖାପାଖି ରହିପାରେ ।
