ହାଇଦ୍ରାବାଦ: ମହାକାଶରେ ଭାରତୀୟ ସ୍ପେଶ ଷ୍ଟେସନ ସ୍ଥାପିତ ହେବ । 2047 ସୁଦ୍ଧା ମହାକାଶ ଗବେଷଣା କ୍ଷେତ୍ରରେ ଭାରତ କଣ କଣ କରିବ ସେ ସମ୍ପର୍କରେ ସୂଚନା ଦେଇଛନ୍ତି ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ଚେୟାରମ୍ୟାନ ଏସ ସୋମନାଥ । ନୂଆଦିଲ୍ଲୀ ସ୍ଥିତ ରଙ୍ଗ ଭବନରେ ଆଯୋଜିତ ସର୍ଦ୍ଦାର ପଟେଲ ମେମୋରିଆଲ୍ ଲେକ୍ଚର୍ ଅଭିଭାଷଣରେ ଭାରତୀୟ ମହାକାଶ ଗବେଷଣା ସମ୍ପର୍କରେ ଇସ୍ରୋ ମୁଖ୍ୟ ସୂଚନା ଦେଇଛନ୍ତି ।
ଇସ୍ରୋ ମୁଖ୍ୟ ନିଜ ଅଭିଭାଷଣରେ ଚନ୍ଦ୍ରପୃଷ୍ଠରେ ଭାରତର ସଫଳ ଅବତରଣ ସମ୍ପର୍କରେ ମଧ୍ୟ ଆଲୋଚନା କରିଥିଲେ । ଚନ୍ଦ୍ର ବିଷୟରେ ଆହୁରି ଅଧିକ ତଥ୍ୟ ହାସଲ କରିବା ଲାଗି ଭାରତୀୟ ସ୍ପେଶ ଷ୍ଟେସନ ସ୍ଥାପିତ କରିବା ସହିତ ଏମିତି ରକେଟ ଯାହାକୁ ଏକାଧିକ ଥର ମହାକାଶ ପଠାଯାଇପାରିବ ତାହାର ନିର୍ମାଣ ସମ୍ପର୍କରେ ମଧ୍ୟ କହିଥିଲେ । ଡକ୍ଟର ସୋମନାଥ ଲ୍ୟାଣ୍ଡର ଟେକ୍ନୋଲୋଜି ଦିଗରେ ଇସ୍ରୋର ବଡ଼ ଅଗ୍ରଗତିକୁ ହାଇଲାଇଟ୍ କରିଥିଲେ ।
ଚନ୍ଦ୍ର ଏବଂ ମଙ୍ଗଳ ଗ୍ରହର ସଫଳ ମିଶନକୁ ଅନୁସରଣ କରି ଶୁକ୍ର ଗ୍ରହକୁ ଏହାର କକ୍ଷପଥ, ପୃଷ୍ଠ ଅଧ୍ୟୟନ ପାଇଁ ଇସ୍ରୋ ଯୋଜନା କରିଥିବା ମିଶନ କଥା କହିଥିଲେ । ଖାଲି ସେତିକି ନୁହେଁ ଦେଶର ବିକାଶ ପାଇଁ କିପରି ସ୍ପେଶ ଟେକ୍ନୋଲୋଜିକୁ ବ୍ୟବହାର କରିବାକୁ ସଂସ୍ଥା ଲକ୍ଷ୍ୟ ରଖିଛି ସେ ବିଷୟରେ କହିଥିଲେ । ପ୍ରାକୃତିକ ସମ୍ପଦ ପରିଚାଳନା ତଥା ଉପଗ୍ରହ ଯୋଗାଯୋଗ ଏବଂ ନାଭିଗେସନରେ ଉନ୍ନତି ଆଣିବା ପାଇଁ ISRO ପ୍ରକଳ୍ପଗୁଡିକ ଉପରେ କାର୍ଯ୍ୟ କରୁଛି ।
| ଏହା ବି ପଢନ୍ତୁ |