ଭୁବନେଶ୍ବର:ଧରାପଡିଲେ ବନ୍ଧୁକ ଧରି ବୁଲୁଥିବା ଗ୍ୟାଙ୍ଗଷ୍ଟାର । ଅଭିଯୁକ୍ତମାନେ ବଟି ଆଦାୟଠୁ ଆରମ୍ଭ କରି ହତ୍ୟା, ଅପହରଣ ଓ ଡ୍ରଗ୍ସ କାରବାର ଭଳି ସାଙ୍ଘାତିକ ଘଟଣା ଘଟାଉଥିଲେ । ଖାଲି ସେତିକି ନୁହେଁ, ଜମି ଓ ପ୍ଲଟ ଆଦି ବ୍ୟବସାୟିକ କାରବାରେ ନାଲି ଆଖି ଦେଖାଉଥିଲେ । ଖଣି ଓ ବାଲିଘାଟରେ ମଧ୍ୟ ଭୟ ଦେଖାଇ ଦାଦବଟି ଆଦାୟ କରିବା ନେଇ ଅଭିଯୋଗ ରହିଥିଲା । ଏଭଳି ୬ ଦୁର୍ଦ୍ଦାନ୍ତ ଅପରାଧୀଙ୍କୁ ଗିରଫ କରିଛି କମିଶନରେଟ ପୋଲିସ । ଯାହାଙ୍କ ନାଁରେ ରହିଛି ଅପରାଧର ଲମ୍ବା ତାଲିକା ।
Gangsters Arrested (ETV Bharat Odisha) ବନ୍ଧୁକଧାରୀ ଗ୍ୟାଙ୍ଗଷ୍ଟାର ଗିରଫ:କମିଶନରେଟ ପୋଲିସର ସ୍ପେଶାଲ ସ୍କ୍ବାଡ ୬ ଜଣଙ୍କୁ କାବୁ କରିଛି । ପୋଲିସ କମିଶନର ସଞ୍ଜୀବ ପଣ୍ଡା କହିଛନ୍ତି, "ସେମାନେ ହେଲେ ଗ୍ୟାଙ୍ଗର ମୁଖ୍ୟ ରଶ୍ମି ରଞ୍ଜନ ସ୍ବାଇଁ, ଉତ୍କଳ କେଶରୀ ଖୁଣ୍ଟିଆ, ଆକାଶ ଓରଫ କୃଷ୍ନ ଚନ୍ଦ୍ର ଜେନା,ଚିରଞ୍ଜୀବି ଜେନା, ମହମ୍ମଦ ସମସେର ଓ ସେଖ ଆଜାରଉଦ୍ଦିନ । ସେମାନଙ୍କଠାରୁ ୫ଟି ବନ୍ଧୁକ ସହ ୯ ରାଉଣ୍ଡ ଗୁଳି ଜବତ ହୋଇଛି । ଅପରାଧରେ ବ୍ୟବହୃତ ଦୁଇଟି ଗାଡି ମଧ୍ୟ ଜବତ ସହ ଆପରାଧୀଙ୍କୁ କୋର୍ଟ ଚାଲାଣ କରାଯାଇଛି । ଆବଶ୍ୟକ ପଡ଼ିଲେ ରିମାଣ୍ଡରେ ଆଣି ପଚରା ଉଚରା କରାଯିବ । ବିଶେଷ କରି ଏମାନେ ବିହାରରୁ ବନ୍ଧୁକ ଆଣି ଏପରି ବଡ଼ ଅପରାଧରେ ସାମିଲ ହେଉଥିଲେ ।"
ଅପରାଧିଙ୍କ ନାଁରେ ବିଭିନ୍ନ ଥାନାରେ ମାମଲା: ଅଭିଯୁକ୍ତମାନଙ୍କ ମଧ୍ୟରୁ ମହମ୍ମଦ ସମସେର ଓରଫ ହାମା ହତ୍ୟା ଅପରାଧରେ ସାମିଲ ଥିଲା । ଗତ ବର୍ଷ ଜୁନ ମାସରେ ଖୋର୍ଦ୍ଧା ଟାଉନ ଥାନା ଅଞ୍ଚଳର ଜଣେ ଡ୍ରଗ୍ସ ବ୍ୟବସାୟୀଙ୍କ ହତ୍ୟା କରାଯାଇଥିଲା । ତା ନାଁରେ ଭୁବନେଶ୍ୱର ଓ ଖୋର୍ଦ୍ଧାରେ ୮ଟି ମାମଲା ରହିଛି । ସେ ଓ୍ବାଣ୍ଟେଡ ତାଲିକାରେ ମଧ୍ୟ ରହିଥିଲା । ଅନ୍ୟତମ ଅଭିଯୁକ୍ତ ଉତ୍କଳ ଖୁଣ୍ଟିଆ ମାର୍ଶାଘାଇରେ ୨୦୨୩ରେ ଗ୍ୟାଙ୍ଗ ଓ୍ବାରକୁ ନେଇ ଜଣଙ୍କୁ ପେଟ୍ରୋଲ ପକାଇ ଜାଳିଦେବା ଘଟଣାରେ ମଧ୍ୟ ଓ୍ବାଣ୍ଟେଡ ରହିଥିଲା । ରଶ୍ମି ରଞ୍ଜନ ନାଁରେ ୫ଟି ମାମଲା ରହିଛି । ସେହିପରି ଅଜୁ ନାଁରେ ଜଟଣୀ ଥାନାରେ ମଧ୍ୟ ୫ଟି ମାମଲା ରହିଛି ।
ପ୍ଲଟ ଓ ଫ୍ଲାଟ୍ କିଣିଲେ ବଟି ନେଉଥିଲେ:କିଛି କିଛି ବିଲଡର ଓ ଜମି ମାଲିକଙ୍କଠୁ ଜମି କିଣୁଥିବା ଗ୍ରାହକଙ୍କ ପାଇଁ ଏମାନେ ସାଜୁଥିଲେ ମଧ୍ୟସ୍ଥି । ବିଲଡରକୁ ଧମକାଇ ନିର୍ଦ୍ଧାରିତ ମୂଲ୍ୟରୁ କମ ମୂଲ୍ୟରେ ଲୋକଙ୍କୁ ଜମି ଓ ପ୍ଲଟ ଦେଉଥିଲେ । ବଦଳରେ କମିଶନ ହିସାବରେ ଟଙ୍କା ନେଉଥିଲେ । ଦାଦାବଟି ଆଦାୟ କରିବା,ବାଲିଘାଟରେ ଭୟ ଦେଖାଇବା । ବେଆଇନ କାଠ ଚାଲାଣଠୁ ଆରମ୍ଭ କରି ବେଆଇନ ଖଣି ଖାଦାନ ସହ ଜମି ଜବରଦଖଲ ମାମଲାରେ ଜଡିତ ଥିଲେ ।
ଏହା ବି ପଢନ୍ତୁ...ହୁସିଆର! ମାତିଛନ୍ତି ନାଇଜେରିଆ ଠକ, ୨ କୋଟିରୁ ଊର୍ଦ୍ଧ୍ବ ଟଙ୍କା ଚୁନା ଲଗାଇ ୨ ଗିରଫ - Nigerian Fraudsters Arrested
ଗାଡି ସିଟ ତଳେ ବନ୍ଧୁକ ଲୁଚାଇ ଆଣୁଥିଲେ:
ଏକ ଉତ୍ତରପ୍ରଦେଶ ନମ୍ବର ଥିବା ବାଇକର ସିଟ୍ ଭିତରେ ଏମାନେ ବନ୍ଧୁକ ଚୋରାଚାଲାଣ କରୁଥିଲେ । ବନ୍ଧୁକ ଲୁଚାଇ ଗାଡି ଯୋଗେ ଆଣି ବିଭିନ୍ନ ଅଞ୍ଚଳରେ ସପ୍ଲାଏ କରୁଥିଲେ । ଏଥିପାଇଁ ୪୦ରୁ ୬୦ହଜାର ପର୍ଯ୍ୟନ୍ତ ବନ୍ଧୁକ ପିଛା ନେଉଥିବା ପୋଲିସ ଜାଣିବାକୁ ପାଇଛି ।
ଗୋଚାଲାଣରେ ବି ଥିଲେ ସାମିଲ:
ଗୋ ଚାଲାଣରେ ମଧ୍ୟ ଏମାନେ ସାମିଲ ଥିବା ଜଣାପଡ଼ିଛି । ଗୋଚାଲାଣକାରୀଙ୍କୁ ଚାଲାଣବେଳେ ଏସକର୍ଟ ଦେଇ ସେମାନଙ୍କୁ ନେବା ଆଣିବା କରୁଥିଲେ । ହାମ୍ମା ଓରଫ ମହମ୍ମଦ ସମସେର ରାତିରେ ବୁଲି ବୁଲି ଗାଇ ଚୋରି କରୁଥିବା ଜଣାପଡ଼ିଛି । ଏପରିକି ବେଣାପଞ୍ଜରିରେ ମଧ୍ୟ ଏକ ମାମଲାରେ ସେ ଧରାପଡ଼ିଥିଲା ।
ଇଟିଭି ଭାରତ, ଭୁବନେଶ୍ବର
