ଅନୁଗୋଳ:ଆକାଶରୁ ହେଉଛି ନିଆଁ ବର୍ଷା । ପ୍ରବଳ ଖରାରେ ସିଝୁଛି ଅନୁଗୋଳ ଜିଲ୍ଲା । ପ୍ରାୟ ସପ୍ତାହେ ହେଲା ଜିଲ୍ଲାର ତାପମାତ୍ରା ୩୫ ଡିଗ୍ରୀ ଉପରକୁ ରହୁଥିବା ବେଳେ ବୁଧବାର ୩୭ ଓ ଗୁରୁବାର ୩୮ ଡିଗ୍ରୀକୁ ଛୁଇଁଛି ତାପମାତ୍ରା । ଆଜି ଅର୍ଥାତ୍ ଶୁକ୍ରବାର ଯେଉଁଭଳି ଖରା ଅନୁଭୂତ ହେଉଛି ତାପମାତ୍ରା ୪୦ଡିଗ୍ରୀ ଅତିକ୍ରମ କରିବା ଆଶଙ୍କା କରାଯାଉଛି । ଅସହ୍ୟ ଗରମ ଏବଂ ଗୁଳଗୁଳି ଅନୁଭୂତ ହେଉଥିବା ବେଳେ କଲବଲ ହେଲାଣି ଜନଜୀବନ ।
ପ୍ରବଳ ଖରା ଯୋଗୁଁ ସକାଳ ୧୦ଟା ବାଜିଲେ ଲୋକଙ୍କୁ ବାହାରକୁ ବାହାରିବା କଷ୍ଟକର ହୋଇପଡୁଛି । ଦୋକାନ ବଜାର ଖାଁ ଖାଁ ଲାଗୁଛି। ରାସ୍ତାଘାଟ ଶୂନସାନ ହୋଇପଡୁଛି । ଗତ ବର୍ଷ ମାର୍ଚ୍ଚ ମାସ ଅଧାରେ ତାପମାତ୍ରା ୩୦ କିମ୍ୱା ୩୧ ଡିଗ୍ରୀ ଥିଲା । ହେଲେ ଚଳିତ ବର୍ଷ ଏବେଠାରୁ ୪୦ଡିଗ୍ରୀକୁ ଛୁଇଁ ଥିବାରୁ ଆଗକୁ ପ୍ରବଳ ଗ୍ରୀଷ୍ମ ପ୍ରବାହ ଆଶଙ୍କା କରାଯାଉଛି । ଯାହାକୁ ନେଇ ଚିନ୍ତାରେ ଜିଲ୍ଲାବାସୀ।
ସେପଟେ ଜିଲ୍ଲାରେ ଦିନକୁ ଦିନ ଖଣି ଓ ବିଭିନ୍ନ କାରଖାନା ବୃଦ୍ଧି ପାଉଛି । ଫଳରେ ବ୍ୟାପକ ଜଙ୍ଗଲ କାଟି ସଫା କରି ଦିଆଯାଉଛି । ଏହାର ପ୍ରଭାବରେ ଗତ କିଛି ବର୍ଷ ହେଲା ପ୍ରତିବର୍ଷ ହାରାହାରି ତାପମାତ୍ରା ପ୍ରାୟ ୨/୩ ଡିଗ୍ରୀ ବଢୁଛି । ମାର୍ଚ୍ଚ ମାସରେ ସକାଳୁ କଅଁଳିଆ ଶୀତ ଅନୁଭୂତ ହେବା କଥା କିନ୍ତୁ ଏବେ ଏହାର ବିପରିତ ପ୍ରଭାବ ପଡୁଛି । ଚଳିତ ବର୍ଷ ମାର୍ଚ୍ଚ ମାସରେ ସକାଳୁ ସକାଳୁ ସକାଳୁ ପ୍ରବଳ ଖରା ସାଙ୍ଗକୁ ଓ ଗୁଳୁଗୁଳି ଅନୁଭୂତ ହେଉଛି । ୧୦ଟା ବାଜିଲେ ଖରା ତେଜ ଆଶାତୀତ ଭାବେ ବୃଦ୍ଧି ପାଉଛି । ଫଳରେ ଦିନ ମଜୁରିଆ, ରିକ୍ସା ଚାଳକ ଓ ରାସ୍ତା କଡରେ ଛୋଟ ଛୋଟ ବ୍ୟବସାୟୀ ବେଶ ପ୍ରଭାବିତ ହେଉଛନ୍ତି । ଲୋକେ ଘରୁ ବାହାରକୁ ଆସୁନଥିବାରୁ ଚାରିଆଡେ ଖାଁ ଖାଁ ଲାଗୁଛି ।